Taon 1913, bapakku i ma si John Mills tardidi di kota New York tingki marumur 25 taon. Donganta si Russel do na pasahathon jamita pandidion. Ndang sadia leleng, laho ma bapakku tu Trinidad. Disi, marhasohotan ma ibana dohot si Constance Farmer sahalak Parsiajar Bibel na ringgas. Jotjot do bapa mangurupi si William R. Brown patuduhon “Drama-Foto Penciptaan” tu angka halak. Ndang sadia leleng, ditugashon ma donganta si Brown dohot istrina tu Afrika Barat taon 1923. Alai bapa dohot omak tongtong do tading di Trinidad. Na miniahan do nasida nadua.

Sia ma hami na marhaha maranggi. Siangkangan, dibahen ma goarna si Rutherford, sarupa dohot goar ni presiden Menara Pengawal tingki i. Tubu ma ahu tanggal 30 Desember 1922. Dibahen ma goarhu sarupa tu donganta si Clayton J. Woodworth, sahalak na dohot paradehon sijahaon The Golden Age (saonari goarna Sadarlah!). Disingkolahon halak bapa do hami, alai dijujui do hami asa marcita-cita laho mangalehon gumodang tingki tu Jahowa. Malo do omak mangajari dohot patorangkon angka ayat na di Bibel. Molo bapa, lomo do rohana manceritahon taringot angka halak na disurat di Bibel. Jala jotjot do i diperagahon asa mura dibayangkon hami.

Marhasil do nasida mangajari hami. Ahu dohot dua anggingku dohot tu Singkola Gilead. Tolu ibotongku gabe perintis do saleleng martaon-taon di Trinidad dohot Tobago. Gabe dos ma hami songon “na sinuan di bagasan bagas joro ni Jahowa” ala denggan do hami diajari jala sitiruon na denggan do nasida di hami. Sai dipatogu nasida do hami asa marbunga “di bagasan angka alaman ni Debatanta”.​—Ps. 92:14.

Di jabunami do dibahen pertemuan dinas. Jotjot do angka perintis marpungu disi, jala diceritahon nasida ma taringot donganta si George Young, sahalak misionaris sian  Kanada na hea ro tu Trinidad. Natua-tuanami pe, jotjot do marcerita taringot donganna si Brown, naung di Afrika Barat. On ma na mangonjar rohangku gabe penyiar tingki umur 10 taon.

Tingki i, tangkas dipaboa di majalahta taringot agama palsu, angka pengusaha na jahat, dohot pamarenta na korupsi. Alani i, taon 1936, dijujui angka pemimpin agama ma pamarenta Trinidad, asa mangalarang sude publikasinta. Ditabunihon hami ma angka publikasi i, alai dipangke hami do i sampe habis. Marbarita ma hami mamangke plangkat jala mambagihon selebaran huhut marbaris dohot marsepeda. Rap ma ahu marbarita dohot piga-piga donganta na sian Tunapuna mamangke mobil pengeras suara. Sahat do hami tu inganan na pinjil di Trinidad. Mansai las do rohanami! Alani i, gabe taronjar ma rohangku asa tardidi tingki umur 16 taon.

Angka pengalaman dohot sitiruon sian keluarganami, mangonjar rohangku asa gabe misionaris. Jala sai hupingkiri do i sahat tu na laho ahu tu pulo Aruba taon 1944, rap dohot donganta si Edmund W. Cummings. Las do rohanami ala boi digokkon hami sampulu halak ro tu Borngin Parningotan taon 1945. Dung sataon, dibahen ma sada huria disi.

Sada tingki, marbarita ma ahu tu dongan karejongku, goarna si Oris Williams. Didok ibana, sintong do sude na dihaporseai ibana saleleng on. Alai dung marsiajar Bibel, gabe diboto ibana ma hasintongan sian Bibel. Tardidi ma ibana tanggal 5 Januari 1947. Lam leleng, tubu ma holong di hami nadua, dung i marhasohotan. Mulai ma ibana merintis November 1950. Mansai sonang do rohangku rap dohot si Oris.

Taon 1955, digokkon ma hami tu Singkola Gilead. Sada hasangapon do on di hami. Alani i, kaluar ma hami sian parkarejoannami, dijual hami ma jabu dohot angka barangnami. Jala ditinggalhon hami ma Aruba. Tanggal 29 Juli 1956, wisuda ma hami kelas-27 jala ditugashon tu Nigeria.

Hea do didok si Oris, “Diurupi tondi parbadia do sasahalak asa boi marhasil gabe misionaris. Sasintongna, ndang lomo rohangku gabe misionaris. Umlomo do rohangku markeluarga jala marianakhon. Alai ala huboto ringkot ni ulaon on, gabe muba ma pingkiranku. Dung Singkola Gilead, rade ma ahu gabe sahalak misionaris na ringgas marbarita. Laho ma hami markapal tu penugasan. Ro ma dongan sakantor ni si Knorr laho paborhathon hami. Jala didok ibana, tu Betel do hami ditugashon. Dung hubege i, gabe kecewa ma huhilala. Alai lam leleng, gabe lomo do rohangku di Betel ala marragam do angka tugas disi. Sada tugas na huhalomohon, i ma gabe penerima tamu. Alani i, gabe jotjot ma ahu pajumpang dohot angka dongan di Nigeria. Godang do angka dongan na ro i na mauas, loja, male, jala kotor pangkeanna. Las do rohangku ala boi paradehon angka na porlu di nasida. Sada hasangapon do on di ahu jala las do rohangku mangulahon i.” Tutu, ganup tugas na dilehon Jahowa mambahen hami lam togu.

Taon 1961, dibahen hami ma acara keluarga di Trinidad, jala dohot do donganta si Brown. Diceritahon ma pengalamanna di Afrika. Ahu pe, huceritahon ma taringot ulaonta di Nigeria. Dihaol si Brown ma ahu jala didok ma tu Bapa, “Johnny, ndang hea dope ho tu Afrika kan, hape anakmu nunga!” Dialusi Bapa ma, “Mantap do i! Lanjuthon ma!” Lam dipatogu do rohangku mambege hata ni nasida i.

Taon 1962, dohot ma ahu tu pelatihan Singkola Gilead kelas-37 saleleng sampulu bulan. Donganta si Wilfred Gooch na gabe pengawas cabang di Nigeria di tingki i dohot kelas-38, jala ditugashon tu Inggris. Alani i, gabe ahu ma na manggantihon ibana. Songon na dibahen donganta si Brown, jotjot do ahu laho kaliling asa boi hutanda jala huhaholongi angka dongan di Nigeria. Nang pe pogos angka donganta dison, alai tongtong do nasida boi marlas ni roha.  On patuduhon ndang arta dohot hepeng na parohon las ni roha. Nang pe songon i, tongtong do nasida ias, rapi jala pantun tingki ro tu parpunguan. Tingki ro kebaktian, godang do angka donganta i na naik truk dohot bus na goarna bolekajas. * Jala jotjot do dibahen di bus i angka hata na menarik. Umpamana: “Molo sai torus aek manetek, boi do i gabe laut na bolak.”

Tutu do hata i! Nang pe saotik dibahen ganup halak, alai molo dipapungu boi do gabe godang. Taon 1974, Nigeria ma gabe negara na parjolo asing ni Amerika Serikat na penyiarna adong 100.000 halak. Dipasu-pasu do ulaonnami!

Tingki perkembangan i, masa do porang di Nigeria taon 1967 sahat tu 1970. Saleleng piga-piga bulan, ndang diboto kantor cabang kabar ni angka dongan na di Biafra, na di bariba ni Sunge Niger. Alai ingkon boanonnami do angka publikasi tu nasida. Songon na dipaboa di mula ni cerita on, martangiang ma hami tu Jahowa jala pos do rohanami tu Ibana. Boi ma hami menyebrang sunge i piga-piga hali.

Tangkas dope huingot bahaya na adong tingki laho menyebrangi Sunge Niger. Godang angka tentara na manjaga, alani sahit dohot angka bahaya na asing. Mabiar do hami mangalewati angka tentara ni pamarenta, alai umbiar dope hami tu tentara na di Biafra. Sada tingki, hea do ahu menyebrang Sunge Niger mamangke solu tingki borngin, sian Asaba tu Onitsha. Dung i laho ma ahu tu Enugu laho patoguhon angka sintua disi. Di tingki na asing, laho do ahu muse patoguhon angka sintua di Aba. Disi, dipamate do lampu tingki borngin asa unang diida angka musu. Tingki marpungu hami di Port Harcourt, pintor ditutup hami ma parpunguan dohot tangiang, ala ro angka tentara ni pamarenta tu Biafra.

Mansai ringkot do parpunguan di tingki i, asa pos roha ni angka dongan na holong do roha ni Jahowa tu nasida. Dipaingot do nasida asa tongtong netral jala marsada. Tongtong do angka dongan na di Nigeria marsihohot nang pe mangadopi situasi na susa songon i. Masihaholongan do nasida jala tongtong masiurupan. Mansai las do rohangku boi rap dohot nasida mangadopi on sude!

Taon 1969, donganta si Milton G. Henschel gabe ketua di Kebaktian Internasional “Damai di Bumi” di Stadion Yankee New York, jala ahu ma gabe asistenna. Godang do na huparsiajari sian ibana jala marguna do i. Alana taon 1970, dibahen ma Kebaktian Internasional “Orang-Orang yang Mendapat Perkenan” di Lagos Nigeria. Holan alani pangurupion ni Jahowa do boi denggan kebaktian on. Alana baru sae dope porang di tingki i. Adong 17 bahasa dibahen di kebaktian i, jala adong 121.128 halak na ro. Donganta si Knorr, si Henschel dohot angka dongan na asing ro sian Amerika dohot Inggris manewa pesawat tu kebaktian i. Adong 3.775 halak na tardidi di tingki i, gumodang sian halak Kristen na tardidi tingki Ari Pentakosta di abad na parjolo. Ala dohot do ahu na mangorganisasi kebaktian on, di tingki i ma na hea huhilala gumodang ulaonku saleleng ngolungku. Angka penyiar di tingki i, ndang holan martamba, alai martamba-tamba!

Lobi sian 30 taon ahu di Nigeria. Alai sipata, gabe pengawas wilayah dohot pengawas zona do ahu di Afrika Barat. Las do roha ni angka misionaris na disi ala diparrohahon jala dipatogu nasida! Las do rohangku paboahon tu nasida na so dihalupahon naung dibahen nasida i! Sian ulaon on huboto ma, molo tasarihon angka dongan ganup marsada-sada, boi ma lam togu nasida jala tongtong marlas ni roha marsada di organisasi ni Jahowa.

Ala diurupi Jahowa do umbahen na boi diadopi hami angka hasusaan tingki masa porang dohot sahit. Dihilala hami do pasu-pasu ni Jahowa. Didok si Oris ma,

“Nunga piga-piga hali hami nadua hona malaria. Sada tingki, pingsan ma si Worth jala ingkon diboan tu rumah sakit di Lagos. Jala didok tu ahu, ra ndang boi be si Worth selamat, hape  boi do! Dung sadar ibana, dipaboa ibana do taringot Harajaon ni Debata tu sahalak perawat baoa, i ma si Nwambiwe. Di tingki na asing, dijumpangi hami ma muse si Nwambiwe. Olo do ibana manjangkon hasintongan, jala saonari nunga gabe sintua ibana di Aba. Las do rohangku mangurupi godang halak gabe naposo ni Jahowa. Jala adong do sian nasida sian Islam hian. Mansai las do rohanami ala boi ditanda jala dihaholongi hami angka halak di Nigeria, budaya ni nasida, hasomalan, dohot bahasa ni nasida.”

Parsiajaran na asing muse i ma: Asa boi tongtong marlas ni roha di penugasan di luat na asing, ingkon marsitutu do hita mangkaholongi angka donganta, nang pe ndang sarupa budayanta.

Dung leleng melayani di Betel Nigeria, taon 1987 ditugashon ma hami gabe misionaris tu pulo Saint Lucia di Karibia. Las do rohanami tu penugasan i. Alai ndang sarupa situasina disi. Molo di Afrika, somalna sahalak baoa godang istrina. Alai molo di Saint Lucia, godang do halak naung rap sajabu alai ndang marhasohotan dope. Nang pe songon i, godang do parsiajar Bibelnami na olo muba dung mamboto hasintongan.

Ala lam matua, lam moru do gogonami. Taon 2005, dipindahon Punguan na Mangaradoti ma hami tu kantor pusat di Brooklyn, New York, Amerika Serikat. Ganup ari, mandok mauliate do ahu tu Jahowa ala dilehon tu ahu istri na burju. Alai taon 2015, marujung ngolu ma si Oris. Ndang boi tardok ahu manang aha di tingki i. Sahalak istri na mansai burju do ibana. Holong hian do rohangku tu ibana, jala rap do hami saleleng 68 taon. Jala diparsiajari hami do, asa boi tongtong marlas ni roha di parsaripeon dohot di huria, ingkon taargai do halak na manguluhon hita, mura manalpuhon hasalaan, tongtong marserep ni roha jala patuduhon parbue ni tondi.

Tingki kecewa manang marmetmet ni roha, marhaposan tu Jahowa do hami. Dipangido hami do tu Jahowa asa dipasu-pasu angka naung diulahon hami. Godang do angka na muba di ngolunami, alai diida hami lam tu dengganna do sude. Jala di ari na naeng ro, tontu adong do na dumenggan.​—Jes. 60:17; 2 Kor. 13:11.

Di Trinidad dohot di Tobago, dipasu-pasu do angka na diulahon natua-tuangku dohot angka dongan na asing. Laporan na parpudi, adong 9.892 Sitindangi disi. Di Aruba, nunga adong 14 huria na balga. Di Nigeria, lam martamba do penyiar jala adong 381.398 halak. Di pulo Saint Lucia, adong 783 na gabe Sitindangi Ni Jahowa.

Saonari, nunga lobi 90 taon umurhu. Di Psalmen 92:15 Bibel siganup ari didok, molo suan-suanan na di bagas joro ni Debata “tongtong marparbue atik pe dung matua, jala sai tongtong togu jala lomak”. Mansai las do rohangku ala boi marhobas tu Jahowa saleleng ngolungku. Arta na arga sian Debata mangonjar rohangku asa mangalehon gumodang tingki tu Jahowa. Alani holongna, gabe boi ma ahu ‘marbunga di bagasan angka alaman ni Debata’.​—Ps. 92:14.