Taon 1934 ma au tubu. Natua-tuakku pinda sian Swiss tu Timmins, sada kota pertambangan di Ontario, Kanada. Hira-hira taon 1939, mulai ma dijaha omakku majalah Menara Pengawal jala ro tu parpunguan ni Saksi Jahowa. Pitu do hami sude gelleng ni omak, jala diboan omak ma hami sude tu parpunguan. Dang leleng dukkon i, gabe Saksi Jahowa ma ibana.

Dang lomo roha ni bapakku tu keputusan ni omak. Alai bertekad do omak toktong mangihutton hasittongan jala setia tu Jahowa. Diulahon ibana do toktong songon i nang pe diorai ulaon marbarita na uli di Kanada taon 1940. Sai toktong do dibahen omak na denggan tu bapak. Diargai ibana do bapak nang pe jotjot kasar hatana tu omak. Jadi, teladan na luar biasa na dipatudu omak mambahen hami mamillit lao melayani Jahowa. Massai las do rohanami tikki muba sikap ni bapak jala gabe burju ibana tu hami sude.

Di bulan Agustus 1950, ro ma au tu Kebaktian Pertambahan Teokrasi di New York City. Dung pajuppang dohot akka dongan na ro sian marragam negara jala mambege wawancara ni akka lulusan Sikkola Gilead, gabe taronjar ma rohakku mangalehon gumodang tikki lao melayani Jahowa. Gabe lam bertekad ma au asa dohot tu dinas sepenuh waktu. Dung mulak sian kebaktian i, huisi ma formulir lao gabe perintis biasa. Kantor cabang Kanada mangirim surat tu au jala didok ikkon jolo tardidi do au. Jadi tardidi ma au di tanggal 1 Oktober 1950. Sabulan dukkon i, gabe perintis biasa ma au jala dapottu ma penugasan na parjolo di Kapuskasing. Massai dao do kota i sian jabunami.

Di taon 1951, dipangido kantor cabang ma akka dongan na boi marbahasa Prancis asa pinda tu provinsi di Quebec, ala godang disi akka  halak na marbahasa Prancis. Massai dihaporluhon do akka penyiar lao mangurupi disi. Hujalo ma undangan i, alana boi do au marbahasa Prancis dohot Inggris. Ditugasson ma au tu Rouyn. Dang hutanda manang ise disi. Songon na hudok nakkin, holan alamat ma na adong di au. Alai denggan jala lancar do sude ulaonnami di tikki i. Gabe marale-ale ma au dohot si Marcel, jala las hian do rohakku boi melayani di Quebec saleleng opat taon, dung i gabe perintis istimewa disi.

Tikki di Quebec, las do rohakku mandapot undangan lao tu Sikkola Gilead kelas ke-26 di South Lansing, New York. Diwisuda do au tanggal 12 Februari 1956 jala ditugasson ma au tu negeri na saonari digoari Ghana, b di Afrika Barat. Alai sebelum lao au tusi, ikkon mulak muse au tu Kanada lao mangurus akka surat na dihaporluhon asa boi pinda tu Ghana. Hurippu holan dua manang tolu minggu do au di Kanada.

Hape sappe pitu bulan do au di Toronto lao mangurus akka surat i. Saleleng na di Toronto i au, manginap do au di jabu ni Om Cripps. Gabe hutanda ma boruna si Sheila. Saling jatuh cinta do hami. Sasittongna naeng hulamar do ibana, hape nungnga kaluar be visakku asa boi borhat tu Ghana. Jadi martangiang ma au dohot si Sheila taringot on, jala diputusson hami ma ikkon lao do au tu tempat tugashu. Alai tetap do hami saling mangirim surat jala mangida atik na boi do hami menikah piga-piga taon nai. Memang, dang keputusan na mura on. Alai di pudian ni ari disadari hami ma, keputusan na denggan do on.

Hira-hira sabulan ma au di pardalanan mamakke kareta api, kapal barang, dohot pesawat. Ujungna, sahat ma au di Akra, Ghana. Ditugasson ma au gabe pengawas distrik. Jadi ikkon hukunjungi do sude daerah di Ghana, suang songon i akka negara na di jonok ni Ghana, i ma Pantai Gading dohot Togoland (saonari digoari Togo). Jotjot do holan sahalakku lao tusi mamakke  mobil jeep na dilehon kantor cabang. Las hian do rohakku boi mangunjungi akka dongan di tikki i.

Di ari Sabtu dohot Minggu, dapottu do tugas di kebaktian wilayah. Tikki i dang adong dope Bale Kebaktiannami. Jadi dibahen akka dongan ma atap sian pohon bambu, jala dilapisi ma i mamakke daun palem asa terlindung akka na ro sian las ni ari. Ala dang adong kulkas di kantin, disippan akka dongan ma binatang na mangolu dope di jonok ni kantin i, jala diseat ma i annon asa adong allangon ni akka na ro tu kebaktian i.

Adong piga-piga pengalaman na lucu tikki kebaktian hami. Misalna, hea ma sada tikki donganku misionaris, i ma si Herb Jennings pasahatton jamita. c Hape, toppu ma ro lombu sian kantin. Lari ma lombu i tu jolo ni mimbar. Gabe dipaso si Herb ma makkatai, jala lombu i pe gabe songon na bingung idaon. Ujungna, adong ma opat donganta bawa na gogo na boi manakkup lombu i jala diboan ma muse lombu i tu kantin. Gabe marsurak ma akka na ro di kebaktian i, ala nungnga ditakkup be lombu i.

Saleleng minggu kebaktian, hupatudu ma film Masyarakat Dunia Baru Sedang Beraksi tu akka halak di huta na jonok tusi. Carana, hupasang ma kain na bottar di antara dua tiang manang dua pohon. Dung i hupancarhon ma filmna sian proyektor tu kain i. Las hian do roha ni akka halak manonton i. Alana, godang do sian nasida na so hea dope manonton film. Gogo hian do soara tepuk tangan ni nasida tikki mangida akka halak na tardidi di film i. Gabe boi ma diida nasida sian film on, na marsada do Saksi Jahowa jala adong di liat portibi on.

Dung hira-hira dua taon au di Afrika, las do rohakku boi ro tu kebaktian internasional di New York City taon 1958. Tamba ma muse las ni rohakku tikki pajuppang dohot si Sheila di kebaktian i. Ro do ibana sian Quebec, jala gabe perintis istimewa do ibana disi. Saleleng on saling mangirim surat do hami. Alai saonari boi do hami pajuppang muse. Tikki hulamar ibana, olo do ibana menikah dohot au. Hukirim ma surat tu donganta si Knorr. d Husukkun ma atik na boi do si Sheila dohot tu Sikkola Gilead jala ditugasson tu Afrika mandongani au. Setuju do donganta si Knorr. Ujungna sahat ma si Sheila di Ghana. Menikah ma hami di Akra tanggal 3 Oktober 1959. Boi do  dirasahon hami pasu-pasu ni Jahowa ala torus hami manjumolohon Ibana di ngolunami.

Di taon 1961, ditugasson ma hami tu Kamerun. Dipangido akka dongan do au lao mambahen kantor cabang na baru. Jadi sibuk hian do au tikki i. Jala, ala baru dope au gabe hamba cabang, godang do na ikkon huparsiajari. Alai di taon 1965, hamil ma si Sheila. Dang hea tarpikkir hami gabe natua-tua. Sasittongna, las do rohanami mandapot tugas na baru on. Jadi berencana ma hami naeng mulak tu Kanada. Alai dang leleng dukkon i, masa ma situasi na mambahen lungun rohanami.

Keguguran ma si Sheila. Didok dokter, bawa do anaknami i. Memang nungnga lobi 50 taon naung salpu i terjadi. Alai dang tarhalupahon hami dope situasi i. Nang pe massai lungun rohanami di tikki i, torus do diulahon hami tugasnami, jala massai las do rohanami mangulahon i.

Di Kamerun, jotjot do akka dongan dianiaya ala dang olo nasida marpihak tu politik. Jala lam parah do situasina tikki adong pemilihan presiden. Di tanggal 13 Maret 1970, masa ma situasi na dihabiari hami saleleng on. Diorai ma ulaonta di Kamerun. Disita pamaretta do kantor cabangnami na baru. Hape baru lima bulan dope hami pinda tusi. Dang sahat dope saminggu, diusir ma sude misionaris sian negara i, termasuk ma au dohot si Sheila. Massai maol do maninggalhon akka dongan, alana holong hian do rohanami tu nasida. Jala khawatir do hami aha na lao masa tu nasida.

Lao ma hami tu kantor cabang di Prancis. Disi ma hami saleleng onom bulan. Alai torus do au berupaya mangurupi paradehon kebutuhan ni akka dongan na di Kamerun. Di bulan Desember, ditugasson ma hami tu kantor cabang Nigeria, na mulai mengawasi ulaonta di Kamerun. Dijakkon akka dongan na di Nigeria do hami, jala las do rohanami melayani disi saleleng piga-piga taon.

Di taon 1973, ikkon dibahen hami do keputusan na massai maol. Adong piga-piga masalah kesehatan na diadopi si Sheila. Tikki naeng kebaktian hami di New York, tangis ma ibana jala didok ma tu au, “Nga loja au jala haccit hian huhilala. Dang sanggup be au!” Nungnga rap hami melayani di Afrika Barat saleleng lobi sian 14 taon. Bangga hian do au ala toktong ibana setia. Jadi porlu do dibahen hami piga-piga penyesuaian. Dibahas hami ma on jala torus do hami martangiang taringot on. Ujungna, diputusson hami ma na ikkon mulak do hami tu Kanada, asa boi si Sheila mandapot perawatan kesehatan na dumenggan. On ma keputusan na paling maol di hami, maninggalhon tugasnami gabe misionaris dohot dinas sepenuh waktu.

Dung sahat hami di Kanada, dapottu ma karejo sian donganku nappuna bisnis jual beli mobil di sada kota di sabola utara ni Toronto. Disewa hami ma apartemen, jala dituhor hami ma barang bekas asa boi dipakke hami di apartemen i. Hasilna, boi ma hami pinda dang pola marutang. Lomo do rohanami manjaga asa toktong sederhana  ngolunami, atik boha boi muse hami dohot tu dinas sepenuh waktu. Hape dang disangka, hatop do hami boi muse dohot tu dinas sepenuh waktu.

Gabe relawan ma au tiap ari Sabtu di pembangunan ni Bale Kebaktian na baru di Norval, Ontario. Dung i, ditugasson ma au gabe pengawas ni Bale Kebaktian. Lam sehat do si Sheila. Jala didok rohanami, nungnga boi be ibana mangulahon tugas na baru on. Jadi di bulan Juni 1974, pinda ma hami tu apartemen ni Bale Kebaktian. Las hian do rohanami ala boi muse dohot tu dinas sepenuh waktu.

Nungnga lam denggan be kesehatan ni si Sheila. Jadi dua taon dukkon i, boi ma hujalo tugas gabe pengawas wilayah. Wilayahnami goarna Manitoba, sada provinsi di Kanada na terkenal massai ngali. Disambut akka dongan na disi do hami. Sian on hami marsiajar, dang soal didia hita melayani, na uppetting toktong ma hita melayani Jahowa.

Dung piga-piga taon au gabe pengawas wilayah, diundang ma hami melayani di Betel Kanada di taon 1978. Dang leleng dukkon i, masa ma pengalaman na so tabo huhilala. Alai sian i dapottu ma parsiajaran na penting. Hea do au ditugasson lao marjamita saleleng sada satonga jom marbahasa Prancis di sada pertemuan istimewa di Montreal. Alai dang menarik jamita na hupasahat i. Dukkon i, adong ma sahalak donganta bawa sian Departemen Dinas na mangalehon nasehat tu au taringot on. Sasittongna ikkon husadari do dang malo au marjamita. Alai dang hujalo nasehat ni donganta i. Gabe dang tabo ma pakkataionnami. Jala jut do rohakku tu ibana. Didok rohakku, kritis do ibana jala dang dipuji ibana upayakki. Sala do au disi ala pittor hutolak nasehatna i. Dang denggan pandanganku tu ibana jala dang lomo rohakku tu cara ni ibana pasahatton nasehat i.

Piga-piga ari dukkon i, makkatai ma sahalak anggota Panitia Cabang tu au taringot masalah on. Huakkui do dang denggan sikaphu tikki dinasehati jala minta maaf do au. Dung i makkatai ma au tu donganta na menasehati au nakkin. Olo do ibana memaappon au. Dang boi hulupahon pengalaman on, jala sian on marsiajar do au massai penting patuduhon serep ni roha. (Poda 16:18) Jotjot do au martangiang tu Jahowa taringot on, jala bertekad do au asa dang jut be rohakku molo adong na menasehati au.

Saonari, nungnga lobi sian 40 taon au melayani di Betel Kanada. Jala mulai taon 1985, mandapot kesempatan ma au melayani gabe Panitia Cabang. Di bulan Februari 2021, marujung ngolu do istrikku si Sheila. Masihol hian do au tu ibana jala saonari pe marsahit-sahit do au. Alai ala melayani Jahowa, boi ma au marlas ni roha jala tetap sibuk sappe dang huboto be ‘naung salpu ari-arikku’. (Pjm. 5:20) Memang, godang do tantangan na huadopi saleleng ni ngolukkon. Alai unggodang do pengalaman na mambahen au marlas ni roha. Godang do pasu-pasu na hudapot ala nungnga manjumolohon Jahowa di ngolukku, jala dohot tu dinas sepenuh waktu saleleng 70 taon. Martangiang do au asa boi akka dongan na poso torus manjumolohon Jahowa di ngolu ni nasida. Pos do rohakku, nasida pe boi mandapot pasu-pasu jala marlas ni roha ala melayani Jahowa.