1-2. (a) Boasa adong piga-piga naposo ni Jahowa na gabe ragu? (b) Aha do na lao tabahas di artikel on?

 DANG soal poso manang matua hita, olo do sipata hita merasa ragu na marguna do hita di Jahowa, manang denggan do keputusan naung tabahen lao melayani Ibana di tikki naung salpu. Pikkirhon ma contoh on. Na parjolo, sahalak penyiar na poso ragu na tutu do diparrohahon Jahowa ibana. Akibatna, gabe ragu ma ibana lao tardidi. Contoh na paduahon, sahalak donganta bawa ragu tu keputusanna di tikki naung salpu. Tikki poso dope ibana, dipillit ibana do lao melayani Jahowa jala dang mangalului godang hepeng. Alai saonari nga lam matua be ibana, jala holan otik nama hepengna lao paradehon kebutuhan ni keluargana. Contoh na patoluhon, sahalak donganta borua naung matua merasa dang marguna be di Jahowa. Alana nga moru be gogona, jala dang godang be na boi diulahon ibana songon na uju i. Hea do dihilala hamu songon i? Sukkun-sukkun do ra rohamuna: ‘Tutu do diparrohahon Jahowa au? Mararga do di Jahowa sude pengorbanan naung hubahen lao melayani Ibana? Marguna dope au di Jahowa?’

² Molo dang berupaya hita mangalului alus ni akka sukkun-sukkun i, boi do annon gabe mago haporseaotta tu Jahowa. Jala na upparah, gabe dang olo be hita manomba Ibana. Alani i di artikel on, lao tabahas ma songon dia prinsip ni Bibel boi mangurupi hita tikki (1) ragu hita na diparrohahon Jahowa do hita manang na daong, (2) ragu hita denggan do keputusan  na tabahen di tikki naung salpu, manang (3) ragu hita na marguna dope hita tu Jahowa manang na daong.

CARA ASA UNANG TORUS MERASA RAGU

3. Aha do na ikkon taulahon molo adong sukkun-sukkun na mambahen hita ragu?

³ Molo adong sukkun-sukkun na mambahen hita ragu, porlu do talului alusna sian Bibel. Molo taulahon songon i, boi ma toktong jonok hubungatta tu Jahowa, jala boi toktong “togu di haporseaon”.—1 Kor. 16:13.

4. Boha do carana lao ‘manguji sasude jala mamastihon dia na sittong’? (1 Tessalonik 5:21)

⁴ Jaha 1 Tessalonik 5:21. Didok di Bibel, “Uji hamu ma sasude, pastihon hamu ma dia na sittong.” Boha do caratta mangulahon on? Molo adong sukkun-sukkun na mambahen hita ragu, porlu do taida aha do na didok Bibel taringot tu situasitta i. Misalna, taingot ma penyiar na poso na tabahas nakkin. Ragu do ibana memang tutu do diparrohahon Jahowa ibana manang na daong. Alai, denggan do molo dipasombu ibana perasaan sisongon i? Daong. Ikkon diparsiajari ibana do Bibel, jala ikkon ‘dipastihon do dia na sittong’. Tujuanna, asa boi diboto ibana songon dia pandangan ni Jahowa taringot tu dirina.

5. Songon dia do hita “manangihon” Jahowa mangalusi sukkun-sukkunta?

⁵ Tikki tajaha Bibel, songon na “manangihon” Jahowa ma hita disi. Alai asa boi tadapot alus ni sukkun-sukkunta, dang cukkup holan manjaha Bibel. Ikkon talului jala taparsiajari do akka ayat na mangurupi hita asa unang ragu. Tabahen ma riset sian akka publikasitta. (Poda 2:​3-6) Martangiang ma tu Jahowa jala pangido ma tu Ibana asa diurupi hita. Dung i, lului ma akka prinsip ni Bibel dohot hatorangan sian publikasi na cocok tu situasitta. Jala denggan do tong molo tariset taringot akka halak na disurat di Bibel, na sarupa situasina songon hita.

6. Songon dia do parpunguan mangurupi hita?

⁶ Na manangihon Jahowa do tong hita tikki ro tu parpunguan. Molo toktong hita ro tu parpunguan, bisa jadi adong jamita manang komentar ni akka dongan na mangalusi sukkun-sukkunta. (Poda 27:17) Attong, tabahas ma jo aha do na ikkon taulahon molo ragu hita na tutu do diparrohahon Jahowa hita.

TUTU DO DIPARROHAHON JAHOWA AU?

7. Sukkun-sukkun aha do na olo ro tu rohatta?

⁷ Hea do sukkun-sukkun rohamuna, ‘Tutu do diparrohahon Jahowa au?’ Molo merasa dang mararga hamu, olo do ra didok rohamuna dang mungkin boi hamu jonok tu Jahowa, Sitoppa saluhutna. Hea do Raja Daud makkilala sisongon i. Longang do rohana dung mamboto na diparrohahon Jahowa do akka jolma. Didok ibana, “Ale Jahowa, tung aha ma jolma i umbahen na diingot Ho ibana? Tung aha ma anak ni jolma i umbahen na diparrohahon Ho ibana?” (Ps. 144:3) Didia do boi tadapot alus ni sukkun-sukkun i?

8. Songon na disurat di 1 Samuel 16:​6, 7, 10-12, aha do na diida Jahowa sian ganup halak?

⁸ Di Bibel, boi ma taboto na diparrohahon Jahowa do akka halak na so dianggap penting di portibi on. Contohna, hea do disuru Jahowa si Samuel tu jabu ni si Isai lao mangalantik sada sian akka anakna gabe raja na baru di Israel. Sian ualu anak ni si Isai, holan pitu do na dijou si Isai lao manjuppangi si Samuel. Dang dohot si Daud, anakna siappudan. a Hape, si Daud do na dipillit Jahowa gabe raja. (Jaha 1 Samuel 16:​6, 7, 10-12.) Jadi diboto Jahowa  do halak na songon dia si Daud sasittongna. Diboto Jahowa do na massai holong do roha ni si Daud tu Ibana.

9. Boasa boi pos rohamuna na diparrohahon Jahowa do hamu? (Ida gambar.)

⁹ Rimangi ma songon dia Jahowa patuduhon na tutu do Ibana mamparrohahon hamu. Contohna, dilehon Ibana do nasehat na terbaik, na cocok tu situasimuna. (Ps. 32:8) On gabe bukti naung takkas do ditanda Jahowa hamu. (Ps. 139:1) Tikki diulahon hamu nasehatna i jala dihilala hamu manfaatna, gabe pos ma rohamuna na diparrohahon Ibana hamu. (1 Kron. 28:9; Ul. 17:​26, 27) Diida Jahowa do sude upaya na dibahen hamu lao melayani Ibana. Diida Jahowa do tong akka sifatmuna na denggan, jala lomo do roha ni Jahowa gabe Ale-alemuna. (Jer. 17:10) Pasti massai las do roha ni Jahowa molo hamu pe olo gabe ale-alena.—1 Joh. 4:19.

TUTU DO DENGGAN KEPUTUSAN NA HUBAHEN DI TIKKI NAUNG SALPU?

10. Tikki taingot akka keputusan na tabahen di tikki naung salpu, sukkun-sukkun aha do na boi ro tu rohatta?

¹⁰ Sipata, adong do piga-piga halak na merasa ragu taringot keputusan ni nasida di tikki naung salpu. Ra ditinggalhon nasida do karejo na timbo gajina. Manang, dipillit nasida do dang marbisnis asa unggodang tikki ni nasida lao melayani Jahowa. Saonari nungnga salpu be martaon-taon. Hape diida nasida ma piga-piga halak na mambahen keputusan na berbeda, hira na tabo do ngoluna jala godang hepengna. Gabe sukkun-sukkun ma roha ni nasida: ‘Memang adong do lapatan ni sude pengorbanan naung hubahen lao melayani Jahowa? Manang tumagon hian do au karejo asa boi godang hepengku saonari?’

11. Boasa gabe metmet roha ni panurat Psalmen 73?

¹¹ Molo songon i do situasimuna, parrohahon ma pengalaman ni panurat Psalmen 73.  Diida ibana do akka halak na so manomba Jahowa hira na tabo ngoluna, mamora, sai sehat, jala dang adong masalahna. (Ps. 73:​3-5, 12) Ala torus dipikkirhon ibana situasi ni nasida, gabe didok rohana dang marguna sude upayana lao melayani Jahowa. Gabe ‘susa ma ibana ganup ari’ ala songon i perasaanna. (Ps. 73:​13, 14) Aha do na diulahon ibana asa unang torus marpikkiran negatif?

12. Aha do na diulahon panurat Psalmen i asa unang torus marpikkiran negatif? (Psalmen 73:​16-18)

¹² Jaha Psalmen 73:​16-18. Lao ma panurat Psalmen i tu inganan ni Debata na badia. Ala rap ibana dohot akka sisomba Jahowa na disi, gabe dame ma dihilala ibana. Jala gabe diattusi ibana ma nang pe hira na tabo ngolu ni akka halak na so manomba Jahowa, alai dang adong harapan ni nasida tu ari na naeng ro. Alani i, gabe dang metmet be rohana jala denggan ma muse cara marpikkirna. Gabe pos do rohana, memang keputusan na terbaik do melayani Jahowa. Hasilna, lam bertekad ma ibana asa toktong setia tu Jahowa.—Ps. 73:​23-28.

13. Molo ragu hamu tu keputusan naung dibahen hamu, aha do na porlu diingot hamu? (Ida gambar.)

¹³ Boi do ditiru hamu panurat Psalmen i. Boha carana? Ingot ma pasu-pasu na dilehon Jahowa tu hamu. Jala ingot ma muse, akka halak na so manomba Jahowa dang mandapot pasu-pasu sisongon i. Ala dang adong harapan ni nasida tu ari na naeng ro, gabe berfokus ma nasida mangalului karejo na timbo gajina asa boi tabo ngolu ni nasida. Alai molo hita, godang do pasu-pasu na lao lehonon ni Jahowa tu hita di ari na naeng ro. (Ps. 145:16) Asing ni i, pikkirhon ma on: Molo pe berbeda keputusan na tabahen na uju i, dang  boi tajamin pasti tabo ngolutta saonari. Alai adong do na pasti: Tikki tabahen keputusan alani holongta tu Jahowa dohot tu halak na asing, pasti dang hurangan manang aha pe hita. Jala boi toktong tahilala las ni roha na sian Jahowa.

MARGUNA DOPE AU DI JAHOWA?

14. Boasa adong na merasa dang marguna be ibana di Jahowa?

¹⁴ Adong do naposo ni Jahowa na so boi be mangalehon na unggodang tu Jahowa. Ra ala nungnga matua nasida, marsahit, manang adong keterbatasan fisikna. Alani i, olo do sipata nasida merasa dang mararga di adopan ni Jahowa. Sukkun-sukkun do ra roha ni nasida, ‘Marguna dope au di Jahowa?’

15. Aha do na ujungna diboto panurat Psalmen 71?

¹⁵ Panurat Psalmen 71 pe hea do merasa songon i. Di tangiangna, didok ibana do tu Jahowa, “Molo dung suda gogokki, unang ma tinggalhon au.” (Ps. 71:​9, 18) Nga moru be gogo ni panurat Psalmen i. Alai pos do rohana, molo toktong setia manomba Jahowa, pasti dijaga jala diurupi Jahowa do ibana. Ujungna, diboto ibana ma las do roha ni Jahowa tu akka halak na marsitutu manomba Ibana, nang pe adong keterbatasanna.—Ps. 37:​23-25.

16. Aha do na boi diulahon akka donganta naung matua tu Jahowa? (Psalmen 92:​12-15)

¹⁶ Hamu akka dongan naung matua, rimangi ma songon dia perasaan ni Jahowa mangida hamu. Urupan ni Jahowa do hamu asa toktong setia manomba Ibana, nang pe adong keterbatasanmuna. (Jaha Psalmen 92:​12-15.) Unang ma berfokus hamu tu na so boi be diulahon hamu. Alai berfokus ma hamu tu akka na boi dope diulahon hamu saonari. Misalna, boi do dipatogu hamu roha ni halak na asing marhite teladanmuna, jala patudu ma  na parduli do hamu tu nasida. Boi do diceritahon hamu songon dia Jahowa mangurupi hamu saleleng martaon-taon, jala janji na dia do di Bibel na dipaima-ima hamu di ari na naeng ro. Asing ni i, unang ma lupa hamu, massai balga do pengaruh ni tangiangmuna tu halak na asing. (1 Ptr. 3:12) Jadi manang songon dia pe situasitta, sai adong do na boi talehon tu Jahowa dohot tu halak na asing.

17. Boasa dang porlu tabanding-bandingkon diritta tu halak na asing?

¹⁷ Olo do ra marsak hamu ala dang godang be na boi diulahon hamu tu Jahowa. Alai pos ma rohamuna, manang aha pe na boi diulahon hamu saonari tu Jahowa, massai arga do i di Ibana. Unang ma banding-bandingkon dirimuna tu na asing. Alana, dang hea Jahowa membanding-bandingkon hamu tu na asing. (Gal. 6:4) Sian dia taboto? Najolo, dilehon si Maria do miak na massai arga tu Jesus. (Joh. 12:​3-5) Di tikki na asing, diida Jesus do sahalak ina na mabalu na pogos, pamasukkon dua hepeng logam na otik argana tu poti inganan ni pelean. (Luk. 21:​1-4) Alai, dang hea Jesus membanding-bandingkon dua borua i. Dianggap Jesus do tindakan ni nasida na dua gabe bukti haporseaon ni nasida na togu tu Jahowa. Songon i do tong perasaan ni Jahowa tu hamu. Diargai Jahowa do haporseaon dohot holong na dipatudu hamu tu Ibana. Jadi nang pe hamu merasa holan otik na boi dilehon hamu tu Jahowa, massai arga do i di Ibana.

18. Aha do na boi mangurupi hita asa unang ragu? (Ida kotak “ Hata ni Jahowa Boi Mangurupi Hamu asa Unang Ragu”.)

¹⁸ Sude hita olo do sipata merasa ragu. Alai songon naung tabahas, akka prinsip ni Bibel boi mangurupi hita asa unang ragu. Jadi molo adong sukkun-sukkun na mambahen hamu ragu, marsitutu ma hamu mangalului alusna. Tujuanna, asa unang ragu be hamu jala lam pos rohamuna tu Jahowa. Takkas do diboto Jahowa dirimuna. Diargai Jahowa do sude pengorbananmuna, jala pasti pasu-pasuonna do hamu songon naung dijanjihon Ibana. Pos ma rohamuna, dihaholongi jala dijaga Jahowa do sude naposona na setia ganup marsada-sada.