1. Aha do na dipaboa di pertemuan tahunan 2023?

 DI PERTEMUAN tahunan 2023, a las do rohatta ala adong piga-piga pangattusionta naung dipadenggan. Jala las do rohatta ala dipaboa perubahan taringot ulaon marbarita. Contohna, nungnga taboto adong do piga-piga halak na mandapot kesempatan lao marpihak tu Jahowa dung dihancurhon Babel na Balga. Jala taboto do, mulai November 2023 akka penyiar dang porlu be melaporhon sadia leleng ibana marbarita jala piga godang publikasi dohot video na ditempatton ibana. Alani perubahan i, na gabe hurang penting do ulaon marbarita? Daong.

2. Boasa gabe urrikkot ulaon marbarita di tikkitta saonari? (Markus 13:10)

² Sian tikki tu tikki, gabe urrikkot do ulaon marbarita di tikkitta saonari. Boasa? Alana satokkin nai naeng ro nama ari ni Jahowa. Taida ma aha na didok Jesus taringot ulaon marbarita saleleng ari parpudi. (Jaha Markus 13:10.) Di bukku Mateus, didok Jesus do lao dibaritahon ma barita na uli di liat portibi on andorang so ro “ujungna”. (Mat. 24:14) Pamarettaon  ni Sibolis do na lao marujung na didok Jesus di ayat on. Nungnga ditottuhon Jahowa be “ari dohot jamna”. (Mat. 24:36; 25:13; Ul. 1:7) Jala lam salpu tikki, lam jonok ma hita tu ari i. (Rom 13:11) Huhut paimahon i ikkon toktong do hita marbarita.

3. Aha do na mangonjar rohatta marbarita na uli?

³ Adong sukkun-sukkun na porlu tapikkirhon: Boasa marbarita na uli hita? Alani holongta do. Tikki marbarita hita, tapatudu do na holong rohatta tu barita na uli, tu akka halak, jala na uppetting tu Jahowa dohot tu goarna. Saonari, tabahas ma i sada-sada.

ALANI HOLONGTA TU BARITA NA ULI

4. Songon dia do perasaanmuna tikki mandapot barita na denggan?

⁴ Bayakkon ma sadia las rohamuna tikki mandapot barita na denggan. Misalna, olo do ra adong tubu sada dakdanak di keluargamuna. Manang, dapotmuna karejo na saleleng on dipaima-ima hamu. Alani las ni rohamuna, tottu dipaboa hamu do taringot i tu keluarga dohot tu donganmuna. Songon i do tong perasaanmuna tikki parjolo sahali hamu mambege barita na luar biasa taringot Harajaon ni Debata?

5. Songon dia do perasaanmuna tikki parjolo sahali mamboto hasittongan? (Ida gambar.)

⁵ Ingot ma muse songon dia perasaanmuna tikki parjolo sahali mandapot hasittongan sian Bibel. Gabe diboto hamu ma na holong do roha ni Debata tu hamu, jala lomo rohana asa boi hamu gabe bagian sian keluargana. Gabe diboto hamu do muse janji ni Debata na lao apusanna hasusaatta, jala boi muse hamu pajuppang dohot akka halak naung mate na dihaholongi hamu di tano na imbaru. Jala godang nai dope hasittongan na diboto hamu. (Mrk. 10:​29, 30; Joh. 5:​28, 29; Rom 8:​38, 39; Pgk. 21:​3, 4) Las do rohamuna mamboto hasittongan on. (Luk. 24:32) Holong do rohamuna tu na diparsiajari hamu, jala lomo do rohamuna paboahon i tu halak na asing.—Bandingkon tu Jeremia 20:9.

6. Aha do na boi taparsiajari sian pengalaman ni si Ernes dohot si Ros?

 ⁶ Taida ma pengalaman ni sahalak donganta na margoar si Ernes. b Tikki marumur sappulu taon ibana, mate ma bapakna. Ninna rohana do di tikki i, “Naung tu surgo do bapa manang torus do di kuburan i? Mangimburu do au mangida donganku na marbapa dope.” Sai jotjot do si Ernes lao tu kuburan. Marsinggang ma ibana disi jala martangiang. Didok ibana do, “Tuhan, paboa ma tu au didia do saonari bapa.” Hira-hira 17 taon dukkon mate bapakna, adong ma na menawarhon asa marsiajar Bibel ibana. Jala pittor dijalo ibana do i. Longang do rohana mamboto taringot dang diboto na mate agia aha. Songon halak na renges modom do nasida. Jala adong do dipaboa di Bibel na lao dipahehe do akka halak naung mate. (Pjm. 9:​5, 10; Ul. 24:15) Ujungna dapotna ma alus ni sukkun-sukkun naung martaon-taon dilului ibana. Las hian do rohana mamboto taringot hasittongan na sian Bibel. Istrina si Ros pe dohot do marsiajar Bibel, jala las do rohana tu na diparsiajarina i. Tardidi ma nasida di taon 1978. Las hian do roha ni nasida paboahon haporseaonna tu keluarga, dongan ni nasida, dohot tu akka halak na olo manangihon. Hasilna, adong lobi 70 halak na diurupi nasida sappe tardidi.

7. Aha do na taulahon molo nungnga bagas tarsuan hasittongan i di bagasan rohatta? (Lukas 6:45)

⁷ Molo nungnga bagas tarsuan hasittongan i di rohatta, gabe taronjar do rohatta paboahon i tu akka halak. (Jaha Lukas 6:45.) Sarupa do perasaanta songon akka sisean ni Jesus di abad na parjolo. Didok nasida do, “Ikkon dipaboa hami do aha naung diida hami dohot na dibege hami.” (Ul. 4:20) Molo holong hian rohatta tu hasittongan i, pasti marsitutu do hita paboahon i tu akka halak.

ALANI HOLONGTA TU AKKA HALAK

8. Boasa taronjar rohatta paboahon barita na uli tu halak na asing? (Ida kotak “ Haholongi ma Akka Halak—Urupi ma Nasida Gabe Sisean”.) (Ida gambar.)

⁸ Songon Jahowa dohot Jesus, hita pe holong do rohatta tu akka halak. (Poda 8:31; Joh. 3:16) Asi do rohatta tu akka halak na so mananda Debata jala na so adong harapanna. (Eps. 2:12) Alani godang ni sitaonon ni nasida, songon na madabu do nasida tu lubang na massai bagas. Alai adong do di hita tali na boi manarik nasida kaluar sian lubang i, i ma barita na uli taringot Harajaon ni Debata. Ala holong rohatta jala asi rohatta tu nasida, tottu marsitutu do hita paboahon barita na uli. Tikki dibege akka halak barita na uli i gabe  adong ma harapan ni nasida. Gabe boi ma nasida marlas ni roha saonari, jala gabe boi ma annon nasida mandapot “hangoluan na saleleng ni lelengna” di tano na imbaru.—1 Tim. 6:19.

9. Barita aha do muse na tapaboa tu akka halak, jala boasa? (Hesekiel 33:​7, 8)

⁹ Holongta tu akka halak pe mangonjar rohatta paboahon tu nasida, nungnga jonok be ujung ni portibi na jahat on. (Jaha Hesekiel 33:​7, 8.) Asi do rohatta tu akka halak, termasuk ma i keluargatta na so manomba Jahowa. Godang do halak na sibuk mangulahon ulaon ni nasida ganup ari, alai dang diboto nasida naeng ro nama “hasusaan bolon na so hea dope masa sian mulai adong portibi on sahat tu saonari. Jala dang na lao masa be i muse”. (Mat. 24:21) Lomo do rohatta asa diboto nasida aha na lao masa saleleng hasusaan bolon i. Lao dihancurhon nama sude agama na so sittong, jala lao dipaujung nama pamarettaon ni Sibolis di Armagedon. (Pgk. 16:​14, 16; 17:​16, 17; 19:​11, 19, 20) Tatangiakkon ma asa godang halak na manjakkon baritatta jala rap dohot hita manomba Jahowa. Alai boha do akka halak dohot keluargatta na so manjakkon barita na uli di tikkitta saonari?

10. Boasa gabe urrikkot ulaonta marbarita di tikkitta saonari?

¹⁰ Songon na dipaboa di artikel sebelumna, olo do ra adong akka halak na gabe porsea tu Jahowa dung mangida Babel na Balga dihancurhon. Lomo do roha ni Jahowa paluahon nasida. Alani i, massai penting do di hita asa toktong marbarita sian saonari. Pikkirhon ma on: Aha na tapaboa tu nasida saonari, olo do annon diingot nasida i. (Bandingkon tu Hesekiel 33:33.) Olo do ra gabe diingot nasida barita na hea tapasahat. Gabe taronjar ma roha ni nasida rap manomba Jahowa dohot hita, biccan adong dope tikki. Songon sahalak penjaga penjara di Pilippi na gabe porsea tu Debata dung masa “gempa na gogo”, dos songon i ma haduan akka halak. Olo do ra akka halak na so manjalo baritatta saonari, gabe porsea tu Debata dung mangida Babel na Balga dihancurhon.—Ul. 16:​25-34.

ALANI HOLONGTA TU JAHOWA DOHOT TU GOARNA

11. Boha do caratta mangalehon hasangapon, hamuliaon, dohot gogotta tu Jahowa? (Pangungkapon 4:11) (Ida gambar.)

¹¹ Alasan utama boasa marbarita na uli hita ala holong do rohatta tu Debata Jahowa dohot tu goarna na massai badia. Marbarita na uli ma caratta lao mamuji Debata na tahaholongi. (Jaha Pangungkapon 4:11.) Pasti setuju do hita tu hata ni akka toppaan ni Debata na di surgo. Didok nasida do, “Ale  Jahowa Debatanami, na tama do ho manjalo hasangapon, hamuliaon, dohot huaso.” Talehon do hasangapon dohot hamuliaon tu Jahowa molo tapaboa buktina tu akka halak na Ibana “manoppa saluhutna”, jala alani Ibana do hita boi mangolu. Talehon do gogotta tu Ibana, molo talehon tikkitta, ngolutta, dohot sude na adong di hita lao marbarita na uli. (Mat. 6:33; Luk. 13:24; Kol. 3:23) Takkas ma, las do rohatta paboahon taringot Debata na tahaholongi. Jala, taronjar do rohatta paboahon taringot goarna dohot akka sifatna. Boasa?

12. Songon dia do caratta pabadiahon goar ni Jahowa?

¹² Ala holong rohatta tu Jahowa gabe taronjar ma rohatta lao pabadiahon goarna. (Mat. 6:9) Lomo do rohatta paboahon tu akka halak, gabus do sude na didok Sibolis taringot Jahowa. (1 Mus. 3:​1-5; Job 2:4; Joh. 8:44) Marsitutu do hita paboahon taringot Jahowa dohot akka sifatna tu akka halak na olo manangihon. Lomo do rohatta asa diboto nasida Debata parholong do Jahowa, jala adil do Ibana mamaretta. Asing ni i, marhite Harajaonna salpuhononna ma sitaononta jala bahenonna ma marlas ni roha sude jolma. (Ps. 37:​10, 11, 29; 1 Joh. 4:8) Molo tapaboa tu akka halak taringot Jahowa, na pabadiahon goarna do hita disi. Boi do tong hita marlas ni roha ala nungnga taulahon tugasta gabe Saksi Jahowa. Boasa tadok songon i?

13. Boasa gabe sada hasangapon di hita boi gabe Saksi Jahowa? (Jesaya 43:​10-12)

¹³ Dipillit Jahowa do hita gabe ‘saksina’. (Jaha Jesaya 43:​10-12.) Piga-piga taon naung salpu didok do di surat ni Punguan na Mangaradoti Organisasi, “Sada hasangapon na umbalga di sasahalak i ma gabe Saksi Jahowa.” Boasa songon i? Tabayakkon ma contoh on. Molo dituduh hamu mangulahon  na sala, pasti dilului hamu do sasahalak na boi mambela hamu. Ise ma na dipillit hamu? Tottu sasahalak na ditanda hamu jala na dihaporseai hamu. Asing ni i ikkon denggan do reputasina, asa ibana pe boi dihaporseai akka halak. Dos songon i ma tikki dipillit Jahowa hita gabe Saksina. Takkas do ditanda Ibana hita. Jala pos do rohana tu hita na boi do hita paboahon tu akka halak holan Ibana Debata na sittong. Jadi sada hasangapon do di hita boi gabe Saksina. Alani i tapakke ma sude kesempatan lao paboahon goarna jala mambuktihon molo Ibana Debata na sittong. Molo taulahon i, na tapatudu do na tutu hita Saksi Jahowa.—Ps. 83:18; Rom 10:​13-15.

TOKTONG MA MARBARITA NA ULI SAHAT TU UJUNGNA

14. Aha do na tapaima-ima na lao masa satokkin nai?

¹⁴ Las do rohatta paimahon akka na lao masa satokkin nai. Harap do rohatta lam godang halak na diurupi Jahowa asa manomba Ibana andorang so dimulai hasusaan bolon. Jala, tarpaima do hita tu akka na lao masa saleleng hasusaan bolon. Nang pe massai maol annon situasina di tikki i, olo do ra adong akka halak na olo kaluar sian portibi ni Sibolis na jahat on jala rap dohot hita mamuji Jahowa.—Ul. 13:48.

15-16. Aha do na ikkon torus taulahon, jala sahat tu andigan do taulahon i?

¹⁵ Huhut paimahon i, adong dope tugas na ikkon taulahon, i ma paboahon barita na uli taringot Harajaon ni Debata tu saluhut tano on. Tugas na massai penting do on, jala dang taulahon be i annon. Ikkon tapaingot do akka halak taringot akka na lao masa satokkin nai. Ikkon diboto nasida do nungnga lam jonok be ujung ni portibi na jahat on. Tikki ro annon ari ni panguhuman i, gabe diboto nasida ma sian Debata Jahowa do barita na tapasahat saleleng on.—Hes. 38:23.

¹⁶ Holong do rohatta tu akka halak, tu barita na uli, jala na uppetting tu Jahowa dohot tu goarna. Anggiat ma holong ni rohatta i mangonjar rohatta asa toktong semangat marbarita sahat tu na didok Jahowa, “Nungnga sae be i!”