Jesaya 60:1 mandok, “Hehe ma ho ale Jerusalem, marsinondang ma ho, ai nungnga ro hatiuronmu. Hamuliaon ni Jahowa marsinondang do di atasmu.” Jerusalem manang Sion ibukota ni Juda di tikki i, manggombarhon bangso Israel. (Jes. 60:14; 62:​1, 2) Adong dua sukkun-sukkun na lao tabahas. Na parjolo, andigan jala songon dia do Jerusalem “hehe” jala “marsinondang”? Na paduahon, na lao saut do muse surirang ni si Jesaya on?

Andigan jala songon dia do Jerusalem “hehe” jala marsinondang? Jerusalem dohot bagas jorona, nungnga hancur tikki halak Jahudi ditawan di Babel saleleng 70 taon. Alai dung ditaluhon Media Persia halak Babel, halak Israel na tinggal di luat na dirajai Babel boi mulak muse tu Jerusalem jala padenggatton ibadat na sittong disi. (Esr. 1:​1-4) On ma na diulahon akka halak na setia sian 12 marga ni Israel di mula ni taon 537 SM. (Jes. 60:4) Mulai ma nasida mangalehon pelean tu Jahowa, mambahen akka perayaan, jala mambangun muse bagas joro. (Esr. 3:​1-4, 7-11; 6:​16-22) Jadi di tikki i dipasu-pasu Jahowa do muse akka naposona. Marsinondang ma muse hamuliaon ni Jahowa tu Jerusalem. Jala gabe songon sinondang ma nasida tu akka bangso na asing na so mananda Jahowa dope.

Alai, holan sabagian dope surirang ni si Jesaya na saut di tikki i. Alana godangan halak Israel dang torus mangoloi Jahowa. (Neh. 13:27; Mal. 1:​6-8; 2:​13, 14; Mat. 15:​7-9) Bahkan ditolak nasida do Messias, i ma Jesus Kristus. (Mat. 27:​1, 2) Akibatna di taon 70 M, dihancurhon ma muse Jerusalem dohot bagas jorona.

Nungnga dipaboa Jahowa hian na ikkon masa do on. (Dan. 9:​24-27) Jadi takkas ma, dang marsakkap Jahowa lao manggohi sude surirang na di Jesaya bindu 60 i tu Jerusalem di tikki i.

Saut do tong surirang ni si Jesaya on di tikkitta saonari? Ido, alai surirang i saut tu “Jerusalem na di banua ginjang”. Didok si Paulus, “Ibana ma omakta.” (Gal. 4:26) Jerusalem na di banua ginjang, i ma bagian sian organisasi ni Jahowa na adong di surgo, na terdiri sian akka suru-suruan na setia. Akka ‘anakna’, i ma Jesus dohot 144.000 halak Kristen na miniahan, songon si Paulus na naeng mangolu salelengna di surgo. Gabe “bangso na badia” ma nasida, i ma “Israel ni Debata”.—1 Ptr. 2:9; Gal. 6:16.

Songon dia do Jerusalem na di banua ginjang “hehe” jala “marsinondang”? Marhite akka anakna na miniahan na mangolu dope di tano on. Ida ma songon dia pengalaman ni nasida sarupa tu surirang na dipaboa di Jesaya bindu 60.

Songon naung disurirakkon, di bagasan haholomon do halak Kristen na miniahan dung masuk halak Kristen na murtad jala dung mate akka apostel di abad na paduahon M. (Mat. 13:​37-43) Nasida ditawan Babel na Balga, i ma sude agama na so sittong di portibi on, sahat tu “panutup ni jaman on” na dimulai taon 1914. (Mat. 13:​39, 40) Dang leleng dukkon i, i ma taon 1919, dipalua ma nasida jala hira na marsinondang do nasida ala pittor marbarita na uli. a Di tikki i ma nasida “hehe”. Saleleng martaon-taon,  ro ma akka halak sian sude bangso tu hatiuron i, dohot ma i akka halak na miniahan na gabe bagian ni Israel ni Debata. Nasida do akka “raja” na dipaboa di Jesaya 60:3.—Pgk. 5:​9, 10.

Di ari na naeng ro, lam marsinondang ma muse 144.000 halak Kristen na miniahan. Songon dia carana? Tikki mate nasida, gabe bagian sian kota “Jerusalem na Imbaru” manang pengantin ni Kristus ma nasida. Lao gabe raja dohot malim ma nasida di surgo.—Pgk. 14:1; 21:​1, 2, 24; 22:​3-5.

Massai penting do na lao diulahon Jerusalem na Imbaru i lao pasautton surirang na di Jesaya 60:1. (Bandingkon Jesaya 60:​1, 3, 5, 11, 19, 20 dohot Pangungkapon 21:​2, 9-11, 22-26.) Najolo, Jerusalem do na gabe pusat pamarettaon di Israel. Suang songon i ma Jerusalem na Imbaru dohot Kristus, lao gabe pusat ni Harajaon ni Debata ma i. Bibel mandok Jerusalem na Imbaru i “turun sian banua ginjang, sian Debata”. Boasa didok songon i? Alana marhite i do Debata lao padenggatton saluhut tano on. “Di bagasan sinondang ni kota i do mardalan” akka halak sian saluhut bangso na makkabiari Debata. Jala dipalua ma nasida sian dosa dohot hamatean. (Pgk. 21:​3, 4, 24) Aha ma hasilna? Songon na dipaboa si Jesaya dohot akka panurirang na asing, ‘lao dipadenggan ma saluhutna’. (Ul. 3:21) Dimulai ma i tikki gabe Raja Jesus jala lao marujung nama i di ujung ni Pamarettaon Saribu Taon.