Takkas do didok Bibel, boi do dipaboa Jahowa aha na lao masa di ari na naeng ro. (Jes. 45:21) Alai dang boi taattusi sude taringot kesanggupan ni Jahowa on. Alana dang sude dipaboa di Bibel taringot songon dia jala andigan dipakke Jahowa kesanggupanna i. Nang pe songon i, adong piga-piga na boi taboto.

Boi do dibahen Jahowa manang aha pe lomo ni rohana, alai dang di sude situasi diulahon Ibana i. Ala bagas do bisuk ni Jahowa, boi do diboto Ibana manang aha pe. (Rom 11:33) Alai diorom Ibana do dirina. Jala diputusson Ibana do dang mamboto sude na lao masa.—Bandingkon tu Jesaya 42:14.

Boi do dibahen Jahowa saut lomo ni rohana. Aha do kaitan ni i tu kesanggupan ni Jahowa lao paboahon na masa di ari na naeng ro? Jesaya 46:10 mandok, “Sian mulana nungnga hupaboa hian songon dia ujungna, jala mulai sian najolo nungnga hupaboa akka na so masa dope. Hudok do, ‘Ikkon saut do akka na hutottuhon, jala ulahonokku do manang aha pe lomo ni rohakku.’”

Boi do Jahowa pasautton manang aha pe lomo ni rohana. I do alana boi dipaboa Ibana aha na lao masa. Dang sarupa Jahowa songon jolma. Contohna, molo hita manonton film jala naeng mamboto songon dia ujung cerita ni film i, olo do tapahatop film i. Alai molo Jahowa, dang porlu dilului Ibana aha na lao masa di ari na naeng ro. Alana nungnga ditottuhon Ibana andigan pasautonna lomo ni rohana, jala pasti saut do i.—2 Mus. 9:​5, 6; Mat. 24:36; Ul. 17:31.

Alani i ma jotjot do dipakke di Bibel istilah “huparade”, “hubahen”, dohot “hurencanahon” lao patuduhon na boi do Jahowa paboahon na masa di ari na naeng ro. (2 Raj. 19:25; surat na di toru; Jes. 46:11) Akka istilah on diterjemahon sian bahasa aslina na adong kaitanna tu hata “sitopa hudon”. (Jer. 18:​3, 4) Songon sitopa hudon na boi mambahen tano liat gabe vas bunga na bagak, boi do dibahen Jahowa manang aha pe lao pasautton lomo ni rohana.—Eps. 1:11.

Dipaloas Jahowa do jolma mambahen keputusanna sandiri. Dang ditottuhon Ibana songon dia ngolu ni sasahalak. Jala dang Jahowa na mambahen halak na burju mangulahon akka na boi parohon jea tu nasida. Dipaloas Ibana do hita sude mamillit lomo ni rohatta sandiri. Alai diajari Ibana do hita asa denggan ngolutta.

Taida ma dua contoh. Na parjolo i ma halak Ninive. Nungnga dipaboa Jahowa hian, na lao dihancurhon do kota Ninive ala massai jahat do akka halak na tinggal disi. Alai dung bertobat nasida, “gabe muba ma sakkap ni Debata, jala dang saut be diparo Ibana jea tu nasida”. (Jona 3:​1-10) Dung dibege halak Ninive barita panguhuman sian Jahowa, bertobat do nasida. Tikki diida Jahowa i, diuba Ibana do keputusanna.

Contoh na paduahon, i ma surirang taringot si Sirus. Ibana do na paluahon halak Jahudi sian Babel. Jala ibana do na mamarettahon asa dipajongjong muse bagas joro ni Jahowa. (Jes. 44:26–45:4) Raja Sirus sian Persia do na dipakke Jahowa lao pasautton surirang on. (Esr. 1:​1-4) Nang pe songon i, dang sisomba Jahowa si Sirus. On patuduhon dang dipaksa Jahowa si Sirus asa manomba Ibana.—Poda 21:1.

Sasittongna godang nai dope na dipikkirhon Jahowa tikki mamutusson naeng dipakke Ibana do kesanggupanna i manang na dang. Jala taboto do dang adong jolma na boi takkas mangattusi sude pikkiran ni Jahowa. (Jes. 55:​8, 9) Nang pe songon i, pasti gabe lam togu do haporseaotta tu Jahowa ala taboto sai sittong do sude na diulahon Ibana. Termasuk ma i songon dia Ibana mamakke kesanggupanna lao mamboto na masa di ari na naeng ro.