1. Songon dia do asa boi marale-ale hita tu sasahalak?

SOMALNA, asa boi hita marale-ale tu sasahalak, ikkon jotjot do hita rap dohot ibana. Dung makkata-hatai hita taringot pakkilalaanta dohot aha na tapikkirhon, boi ma hita marale-ale tu ibana. Alai, dang mura asa boi marale-ale tu Jesus. Boasa?

2. Boasa dang mura di hita marale-ale tu Jesus?

² Alasan na parjolo, i ma ala dang hea hita pajuppang langsung dohot Jesus. Halak Kristen di abad na parjolo pe godang do na so hea pajuppang dohot ibana. Alai nang pe songon i, didok apostel Petrus do, “Nang pe ndang hea diida hamu ibana, dihaholongi hamu do ibana. Nang pe ndang diida hamu ibana saonari, dipatuduhon hamu do haporseaon tu ibana.” (1 Ptr. 1:8) Alani i, boi do hita marale-ale tu Jesus nang pe dang hea dope hita pajuppang dohot ibana.

3. Aha do alasan na paduahon boasa dang mura di hita lao marale-ale tu Jesus?

³ Alasan na paduahon, ala dang boi hita makkatai tu Jesus. Tikki martangiang hita, tu Jahowa do tapasahat aha na di rohatta. Memang, di bagasan goar ni Jesus do hita martangiang, alai dang hea hita makkatai langsung tu Jesus. Jala,  Jesus pe dang lomo rohana molo hita martangiang tu ibana. Boasa? Alana ulaon panombaon do martangiang i. Jala holan Jahowa do na ikkon tasomba. (Mat. 4:10) Alai nang pe songon i, boi do tapatudu holongta tu Jesus.

4. Aha do alasan na patoluhon, jala aha do na lao taulas di parsiajaran on?

⁴ Alasan na patoluhon, ala di surgo do Jesus. Jadi dang boi hita rap dohot ibana. Alai, boi do tatanda Jesus nang pe dang di lambungta ibana. Saonari, lao taulas ma opat cara na boi taulahon asa boi marale-ale tu ibana. Alai, jolo taulas ma boasa rikkot marale-ale tu Kristus.

5. Boasa hita ikkon marale-ale tu Jesus? (Ida ma kotak “ Molo Marale-ale Hita tu Jesus, Gabe Marale-ale ma Hita tu Jahowa” dohot “ Ikkon Seimbang do Caratta Patuduhon Holong tu Jesus”.)

⁵ Ikkon marale-ale do hita tu Jesus asa boi marale-ale tu Jahowa. Boasa songon i? Adong dua alasan. Na parjolo, didok Jesus do tu akka siseanna, “Ai holong do roha ni Ama i tu hamu, ala holong do rohamuna tu ahu.” (Joh. 16:27) Jala didok ibana do, “Ndang adong na boi ro tu Ama i molo so marhite ahu.” (Joh. 14:6) Molo naeng marale-ale hita tu Jahowa alai dang olo hita marale-ale tu Jesus, dos do hita songon naeng masuk tu sada bangunan alai dang sian pintuna. I do tong na didok Jesus tikki dipatudos ibana dirina songon “pintu ni biru-biru i.” (Joh. 10:7) Alasan na paduahon, ala Jesus do na takkas maniru parange ni Amana. Didok ibana do tu akka siseanna, “Manang ise na mangida ahu, nunga diida ibana Ama i.” (Joh. 14:9) Jadi asa boi tatanda Jahowa, ikkon taparsiajari do taringot Jesus. Lam godang na taboto taringot Jesus,  lam holong ma rohatta tu ibana. Jala, lam togu parale-aleonta tu Jesus, gabe lam balga ma holongta tu Amana.

6. Aha do muse alasanna boasa hita ikkon marale-ale tu Jesus? Patorang ma.

⁶ Ikkon marale-ale do hita tu Jesus asa boi dialusi tangiangta. Dang cukup holan mandok “di bagasan goar ni Jesus” tikki hita martangiang. Porlu do taattusi songon dia Jahowa mangalusi tangiangta marhite Jesus. Didok Jesus do tu akka apostelna, “Ulahononku do manang aha na pinangidomuna marhite goarhu.” (Joh. 14:13) Nang pe Jahowa na manangihon jala mangalusi tangiangta, Jesus do na disuru Ibana lao mandalanhon keputusanna. (Mat. 28:18) Andorang so dialusi Jahowa tangiangta, ikkon dipastihon Ibana do naung taulahon poda ni Jesus. Umpamana, didok Jesus do, “Molo disesa hamu sala ni halak tu hamu, sesaon ni Amamuna na di banua ginjang i do hasalaanmuna. Alai molo ndang disesa hamu sala ni halak tu hamu, ndang sesaon ni Amamuna nang hasalaanmuna.” (Mat. 6:14, 15) Jadi, rikkot do di hita asa burju tu halak na asing, songon Jahowa dohot Jesus na burju tu hita!

7. Ise do na boi mandapot laba sian tobusan ni Jesus?

⁷ Holan akka halak na marale-ale tu Jesus do na boi mandapot laba sian tobusan. Sian dia taboto? Didok Jesus ‘dilehon ibana do ngoluna humongkop angka donganna.’ (Joh. 15:13) Adong do akka naposo ni Jahowa na mangolu andorang so ro Jesus tu tano on. Nasida pe ikkon marsiajar do taringot Jesus jala makkaholongi ibana. Lao dipahehe do haduan si Abraham, si Sarah, si Musa dohot si Rahab. Alai dung i, ikkon marale-ale do nasida tu Jesus asa boi mandapot hangoluan salelengna.​—Joh. 17:3; Ul. 24:15; Heb. 11:8-12, 24-26, 31.

8-9. Songon na dipaboa di Johannes 15:4, 5, molo marale-ale hita tu Jesus ulaon aha ma na boi taulahon, jala boasa hita ikkon toktong marsada dohot Jesus?

⁸ Las do rohatta rap saulaon dohot Jesus tikki marbarita na uli jala mangajari akka halak taringot Harajaon ni Debata. Tikki di tano on Jesus, gabe guru do ibana. Jala dung mulak ibana tu surgo, ibana ma na manguluhon huria jala na mangatur sude ulaon marbarita dohot mangajari. Diida jala diargai ibana do hamu ala marsitutu mangurupi godang halak asa mananda ibana dohot Amana. Sasittongna, ala diurupi Jahowa dohot Jesus do umbahen boi taulahon tugas on.​—Jaha Johannes 15:4, 5.

⁹ Takkas do dipaboa di Bibel, ikkon tahaholongi do Jesus asa las roha ni Jahowa. Jadi taulas ma opat cara na boi taulahon asa boi gabe ale-ale ni Jesus.

10. Aha do na parjolo ikkon taulahon asa boi marale-ale tu Jesus?

¹⁰ (1) Ikkon ditanda hamu do Jesus. Carana, jaha ma Bibel di bukku Mateus, Markus, Lukas dohot Johannes. Molo tarimangi carita taringot Jesus na adong di Bibel, gabe lam holong ma rohatta tu Jesus jala gabe taargai ibana ala burju maradoppon akka halak. Misalna, nang pe ibana sahalak guru alai dang dibahen ibana siseanna gabe hatoban. Gariada, olo do ibana paboahon pakkilalaan dohot pikkiranna tu nasida. (Joh. 15:15) Tikki lungun roha ni nasida, tong do lungun roha ni Jesus jala rap do ibana tangis dohot nasida. (Joh. 11:32-36) Haru akka musuna pe boi do diida nasida na marale-ale do Jesus dohot akka halak na manangihon barita na uli sian ibana. (Mat. 11:19) Molo tatiru cara ni Jesus maradoppon siseanna, gabe lam solhot ma parale-aleonta tu halak na asing. Gabe  mararga ma ngolutta jala las ma rohatta. Jala lam tamba ma holongta tu Kristus.

11. Aha do muse na ikkon taulahon asa boi gabe ale-ale ni Jesus?

¹¹ (2) Tiru ma parange ni Jesus dohot cara marpikkirna. Molo taboto cara marpikkir ni Jesus jala tatiru i, gabe lam solhot ma hita tu ibana. (1 Kor. 2:16) Boha carana maniru Jesus? Parrohahon ma sada contoh. Umlomo do roha ni Jesus mangurupi halak na asing sian pasonangkon dirina sandiri. (Mat. 20:28; Rom 15:1-3) Alani i, rade do ibana mambahen pengorbanan jala manalpuhon hasalaan ni halak. Dang mura ibana tersinggung tikki adong na mandok na hurang denggan taringot ibana. (Joh. 1:46, 47) Jala, dang sai diingot-ingot ibana hasalaan ni halak. (1 Tim. 1:12-14) Didok Jesus, “Molo masihaholongan hamu, botoon ni sude jolma ma na siseanku hamu.” (Joh. 13:35) Jadi tasukkun ma di rohatta, ‘Marsitutu do au maniru Jesus lao mardame tu akka dongan?’

12. Aha do cara na patoluhon na ikkon taulahon asa boi gabe ale-ale ni Jesus, jala songon dia carana mangulahon i?

¹² (3) Urupi ma akka anggi ni Kristus. Didok Jesus, molo taurupi akka anggina na miniahan, sasittongna na mangurupi ibana do hita disi. (Mat. 25:34-40) Sada cara lao mangurupi na miniahan, i ma marsitutu di ulaon marbarita dohot mambahen sisean, songon na dipaboa Jesus tu akka na mangihutton ibana. (Mat. 28:19, 20; Ul. 10:42) Ala na diurupi akka ‘biru-biru na asing’ do umbahen gabe boi akka anggi ni Kristus on mangulahon ulaon marbarita di liat portibi on sahat tu saonari. (Joh. 10:16) Molo biru-biru na asing do hamu, marsitutu ma hamu dohot tu ulaon marbarita. Alana on patuduhon, na holong do rohamu tu na miniahan dohot tu Jesus.

13. Songon dia hita boi mangulahon poda ni Jesus na disurat di Lukas 16:9?

¹³ Boi do hita muse gabe ale-ale ni Jahowa dohot Jesus molo tapakke hepengta lao mangurupi ulaon Harajaon. (Jaha Lukas 16:9.) Misalna, boi do hita mangalehon sumbangan tu akka ulaon di liat portibi on. Songon tu ulaon marbarita di luat na dao, mambangun jala mangarawat Bale Harajaon dohot inganan parpunguan na asing, jala mangalehon bantuan tu akka dongan na hona bencana. Boi do muse hita mangalehon sumbangan tu huriatta jala mangurupi akka dongan na porlu diurupi. (Poda 19:17) I ma cara na boi taulahon lao mangurupi akka anggi ni Kristus.

14. Songon na dipaboa di Epesus 4:15, 16, aha do cara na paopathon asa boi gabe sisean ni Jesus?

¹⁴ (4) Unduk ma tu pengaturan na adong di huria Kristen. Gabe lam solhot ma hita tu Jesus molo olo hita unduk tu akka na manguluhon hita. (Jaha Epesus 4:15, 16.) Misalna, marsitutu do hita asa denggan mamakke sude Bale Harajaonta. Alani i, adong do piga-piga huria na gabe dipasada, jala disesuaihon ma luat ni nasida marbarita. Alani pengaturan on, gabe boi ma organisasi menghemat hepeng sumbangan. Alai, porlu do tong penyesuaian di akka parbarita alani pengaturan i. Adong do donganta naung martaon-taon di sada huria jala nungnga solhot tu akka dongan disi. Alai saonari, dipangido ma nasida asa pinda tu huria na asing. Tottu massai las do roha ni Jesus molo olo nasida unduk tu pengaturan i!

15. Songon dia do boi lam togu parale-aleonta dohot Jesus haduan?

¹⁵ Haduan, rap dohot Jesus ma akka na miniahan i saleleng-lelengna. Jala nasida ma na lao mamaretta di Harajaon ni Debata. Boi ma  nasida mangida Kristus, makkatai dohot ibana, jala sai rap ma nasida. (Joh. 14:2, 3) Akka na di tano on pe boi makkilala holong ni Jesus. Nang pe dang hea nasida mangida Jesus, alai boi do lam balga holong ni nasida ala dilehon Jahowa dohot Jesus hangoluan na sonang tu nasida.​—Jes. 9:5, 6.

16. Pasu-pasu aha ma na tadapot molo gabe ale-ale ni Jesus?

¹⁶ Molo olo hita gabe ale-ale ni Jesus, godang ma pasu-pasu na boi tadapot. Misalna, saonari on boi do tahilala holongna jala toktong do diurupi hita. Dilehon do tu hita kesempatan asa boi mangolu saleleng ni lelengna haduan. Jala na urrikkot, ala marale-ale hita tu Jesus gabe boi do tong hita marale-ale tu Amana, i ma Jahowa. Sada hasangapon na massai balga do marale-ale dohot Jesus!