ALA lam susa do mangolu “di ari parpudi”, porlu do hita asa lam sabar. (2 Tim. 3:1-5) Saonari godang do halak na so sabar. Mangkaringkothon diri do nasida, lomo rohana marbada, jala ndang boi mangorom diri. Alani i, tasungkun ma dirinta: ‘Gabe ndang sabar do ahu songon godangan halak? Songon dia do halak na sabar? Songon dia do ahu asa tongtong sabar?’

Aha do lapatan ni hata “sabar” na disurat di Bibel? Lapatanna, ndang holan paimahon asa salpu hasusaan na diadopi. Halak na sabar tongtong togu ala adong na tinujuna, jala pos do rohana na boi do situasina lam denggan. Ndang holan dirina sandiri na dipingkirhon ibana. Nang pe dibahen jut rohana manang dibahen na so denggan tu ibana, tongtong do dipingkirhon ibana pangkilalaan na asing. Gariada dipaima ibana do boi sada tingki lam solhot nasida. Alani i didok di Bibel, holong do na mambahen hita boi sabar. * (1 Kor. 13:4) Sada sian “parbue ni tondi” do sabar. (Gal. 5:22, 23) Jadi aha do na porlu taulahon asa boi lam sabar?

Asa boi sabar, martangiang ma hita asa diurupi Jahowa marhite huasona. Jala lehononna do i tu halak na porsea tu Ibana. (Luk. 11:13) Mansai gogo do huaso ni Jahowa, alai ingkon taulahon do hombar tu tangiang i. (Ps. 86:10, 11) Alani i, ingkon marsitutu do hita sabar ganup ari, asa boi gabe halak na sabar. Alai olo do sipata hita gabe ndang sabar. Molo songon i, aha ma na boi taulahon?

Taparsiajari jala taihuthon ma sitiruon sian Jesus. Dung didok si Paulus taringot “pangalaho na imbaru” dijujui do hita asa sabar jala didok do muse, “Dame na sian Kristus i ma na mangarajai rohamuna.” (Kol. 3:10, 12, 15) Alani i, tatiru ma Jesus jala pos ma rohanta na laho pasaehon ni Debata do angka parsoalan di tingkina. Molo taulahon i, tontu sabar do hita ndang soal aha pe na masa di humaliangta.​—Joh. 14:27; 16:33.

Lomo do rohanta asa hatop ro tano na imbaru. Alai, gabe lam sabar do hita paimahon i molo tarimangi hasabaron ni Jahowa tu angka jolma. Bibel paboahon tu hita, “Ndang na lambat Jahowa pasauthon janjina, songon na nidok ni na deba. Sabar do Ibana tu hamu, ai ndang lomo rohana mago manang ise pe, alai naeng ma sude jolma marhamubaon.” (2 Ptr. 3:9) Jadi sabar do Jahowa maradophon hita. Alani i tatiru ma Jahowa asa sabar mangadopi na asing. (Rom 2:4) Di angka situasi songon dia do hita porlu sabar?

Ganup ari godang do situasi na mambahen hita ingkon sabar. Umpamana, ingkon  sabar ma hita paimahon halak sae mangkatai, nang pe adong na ringkot na laho tapaboa. (Jak. 1:19) Jala ingkon sabar do hita tu sasahalak na mambahen jut rohanta. Asa unang pintor muruk, denggan do molo tarimangi songon dia pangkilalaan ni Jahowa dohot Jesus tingki mangida hahuranganta. Ndang sai diingot nasida angka hasalaan na tabahen. Gariada, angka parange na denggan do na diida nasida sian hita. Jala sabar do nasida paimahon hita asa lam burju.​—1 Tim. 1:16; 1 Ptr. 3:12.

Hita pe ingkon sabar ma tingki adong na mandok sala do na taulahon manang na tahatahon. Ra, boi do gabe hansit rohanta jala taampini dirinta. Alai, di Bibel dijujui do hita asa unang songon i. Didok Bibel, “Tagonan do halak na lambas marroha sian halak na ginjang marroha. Unang girgir roham mangoloi piripirion, ai maringan di bagasan roha ni halak na oto do piripiri.” (Pjm. 7:8, 9) Jadi nang pe sala tuduhan i, sabar ma jala manat ma pingkirhon songon dia caranta laho mangadopi i. Songon i do na diulahon Jesus tingki adong na mandok na sala taringot ibana.​—Mat. 11:19.

Angka natua-tua porlu do sabar tingki pasingothon, jala mangurupi ianakhonna laho pasidingkon pamingkirion na sala. Songon pengalaman ni si Mattias na karejo di Betel Skandinavia. Tingki remaja si Mattias, jotjot do ibana direhei dongan sasingkolana alani haporseaonna. Tingki i, ndang diboto natua-tuana na diadopi si Mattias di singkolana. Alai lam leleng diboto nasida ma nunga mulai ganggu roha ni si Mattias tu haporseaonna. Bapak ni si Mattias i ma si Gillis paboahon, ingkon sabar do ibana dohot istrina mangadopi ianakhonna. Olo do disungkun si Mattias tu nasida, “Ise do Debata? Tutu do Hata ni Debata Bibel i? Sian dia do taboto na Debata na manuru hita mangulahon sada-sada ulaon?” Jala, hea do disungkun ibana tu bapakna, “Sala do molo ndang huihuthon haporseaonmuna?”

Didok si Gillis, “Sipata alani murukna do dibahen anaknami sungkun-sungkun i. Alai ndang na muruk ibana tu omakna manang  tu ahu. Ala dihilala ibana hasintongan do na mambahen gabe susa ngoluna.” Songon dia do si Gillis mangurupi ianakhonna? Didok ibana, “Hundul ma ahu dohot ianakhonku jala mangkata-hatai saleleng piga-piga jom.” Somalna, si Gillis holan manangihon si Mattias jala dibahen ma sungkun-sungkun laho mangantusi songon dia pangkilalaan dohot pandapot ni ianakhonna. Sipata dipatorang si Gillis ma sada hatorangan tu ianakhonna. Jala saleleng piga-piga ari dilehon ma tingki tu ianakhonna asa mangarimangi i. Manang gabe ibana na mangarimangi na didok ni ianakhonna i saleleng piga-piga ari. Marhite cara on, gabe diantusi si Mattias ma lapatan ni tobusan dohot holong ni Jahowa tu hita. Jala diboto ibana ma holan Jahowa do na tama mamarenta jolma. Didok bapakna, “Porlu do tingki, jala somalna maol do on. Alai lam leleng, mulai ma tubu holong tu Jahowa di rohana. Ala sabar do hami mangurupi si Mattias, gabe las ma rohanami. Jala boi ma diantusi hami aha na di rohana.”

Sabar pe si Gillis dohot istrina mangurupi ianakhonna ala pos do roha ni nasida tu pangurupion ni Jahowa. Didok si Gillis, “Jotjot do hupaboa tu si Mattias, alani balga ni holongnami tu ibana sai ditangiangkon hami do asa diurupi Jahowa ibana mangantusi hasintongan.” Las do roha ni nasida ala sabar jala ndang marnaloja mangurupi ianakhonna!

Hita pe ingkon sabar do mangurupi keluarga manang donganta na nunga leleng marsahit. Songon i do pengalaman si Ellen, * na tong tading di Skandinavia.

Hira-hira ualu tahun naung salpu, dua hali ma hona stroke manang mate sambola pamatang ni suami ni si Ellen. Sahitna i manegai otakna, jala mambahen ibana gabe ndang boi mangkilala las ni roha, lungun ni roha, manang asi ni roha. Mansai borat do sitaonon si Ellen. Didok ibana, “Ingkon sabar do ahu jala ingkon jotjot do ahu martangiang. Jala ayat na mangapuli rohangku i ma Pilippi 4:13 na mandok, ‘Margogo do ahu di sude na masa, ala dilehon Debata do huaso tu ahu.’” Ala huaso dohot pangurupion ni Jahowa, boi do si Ellen sabar mangadopi situasina i.​—Ps. 62:6, 7.

Jahowa do sitiruon na dumenggan taringot hasabaron. (2 Ptr. 3:15) Jotjot do tajaha di Bibel taringot Jahowa na mansai sabar. (Neh. 9:30; Jes. 30:18) Umpamana, tingki Jahowa laho mangaripashon huta Sodom, marulak-ulak do disungkun si Abraham taringot i. Alai sabar do Jahowa manangihon ganup sungkun-sungkun dohot holso ni roha ni si Abraham. Didok Jahowa, diantusi Ibana do holso ni roha ni si Abraham. Jala dipapos do rohana ndang na laho ripashononna huta i nang pe holan sampulu halak na tigor disi. (1 Mus. 18:22-33) Sai sabar do Jahowa manangihon jala ndang hea pintor muruk!

Ingkon sabar do halak Kristen. Molo marsitutu hita sabar, tapasangap do Jahowa i ma Ama na parholong jala sabar. Dung i, rap ma hita dohot “angka halak naung manjalo janji i, ala sabar nasida jala marhaporseaon”.​—Heb. 6:10-12.