TU NATUA-TUA
8: Mambahen Contoh na Denggan
LAPATANNA
Asa boi diulahon dakdanak na denggan na diajarhon natua-tuana, ikkon parjolo do natua-tuana mangulahon i. Contohna, diajarhon hamu do molo ianakkonmuna ikkon jujur. Alai tikki adong tamu, disuru hamu ma ianakkonmuna i mandokkon, “Dang di jabu bapa.” Molo songon i do na diulahon hamu, pasti maol do ianakkonmuna gabe halak na jujur.
“Dang boi diharappon natua-tua asa diulahon ianakkonna aha na didok nasida, molo nasida sandiri pe dang mangulahon i. Songon spon mura do diserap manang aha pe. Suang songon i ma ianakkonmuna, mura do ditiru nasida manang aha pe diulahon dohot na didok hamu. Jala molo dang sesuai na tadok tu na taulahon, pasti diprotes nasida do hamu.”—Si David.
NA DIDOK BIBEL: “Diajarhon hamu do, ‘Unang ho manakko,’ alai boasa manakko hamu?”—Rom 2:21.
BOASA PENTING ON
Biasana ise do na ditiru dadanak? Natua-tuana. Unjotjot do natua-tuana na ditiru dakdanak sian apala maniru akka donganna. I do alana ikkon natua-tua do na mangajari ianakkonna. Alai ikkon parjolo do natua-tua mangulahon aha na diajarhon ibana.
“Olo do hita sappe loja mandok hata tu ianakkotta. Alai, dang taboto ditangihon do i manang na dang. Alani i molo dang taulahon aha na tadok tu ianakkotta, diboto nasida do i. Jala aha na taulahon diparrohahon nasida do i.”—Si Nicole.
NA DIDOK BIBEL: “Na parjolo sian sudena i, . . . dang munafik.”—Jakobus 3:17.
NA BOI DIULAHON HAMU
Sukkun ma dirimuna. Film na songon dia do na hutonton? Songon dia do au tu dongan saripekku dohot tu dakdanak? Halak na songon dia do akka donganku? Parduli do au tu halak na asing? Molo hupangido ianakkokku mangulahon na dihalomohon rohakku, nga parjolo au mangulahon i?
“Dang disuru hami ianakkonnami mangulahon na so diulahon hami.”—Si Christine.
Minta maaf ma hamu molo adong na sala na diulahon hamu. Diboto ianakkonmuna do molo hamu jolma na so sempurna. Jadi, molo olo hamu “minta maaf” tu dongan saripemuna dohot tu ianakkonmuna, on mangurupi ianakkonmuna asa jujur jala marserep ni roha.
“Porlu do ianakkotta mambege hita mangakku sala jala minta maaf. Molo dang taulahon songon i, nasida pe dang olo mangakku sala.”—Si Robin.
“Balga do pengaruh ni natua-tua tu ianakkonna, contoh na dibahen hamu gabe sitiruon do tu nasida. Alana hamu do na diida nasida ganup ari. Manang aha pe na diajarhon hamu tu ianakkonmuna ikkon hamu do na parjolo mangulahon i.”—Si Wendell.
