Molo olo do hamu dohot ianakkonmuna paboahon na di bagasan rohamuna dohot pikkiranmuna, on buktina na denggan do komunikasimuna.

Tikki dakdanak ianakkonmuna olo dope nasida paboahon na di rohana. Alai molo dung remaja nasida, maol do nasida paboahon i. Alana, nga jarang be nasida marcerita tu hamu. Gabe maol ma hamu mangattusi aha na di roha dohot di pikkiran ni nasida. Nang pe songon i, sasittongna porlu do nasida makkatai dohot hamu.

Rade ma mangalehon tikkimuna molo naeng makkatai ianakkonmuna tu hamu. Olo do ra dung tonga borngin, baru pe olo ianakkonmuna makkatai tu hamu.

“Olo do ra gabe didok hamu, ‘Boasa dung saonari makkatai ho? Na arian dang olo ho makkatai tu omak!’ Holan olo pe marcerita ianakkotta tu hita, nga denggan i. Sude do natua-tua lomo rohana molo olo ianakkonna paboahon na di rohana.”​—Si Lisa.

“Sasittongna dang lomo rohakku pabornginhu modom. Alai, na saleleng on molo dung tonga borngin do ianakkokku olo paboahon na di rohana tu au.”​—Si Herbert.

NA DIDOK BIBEL: “Ikkon dipikkirhon ganup halak do aha na penting di halak na asing.”​—1 Korint 10:24.

Fokus ma hamu tikki makkatai tu ianakkonmuna. Sahalak ama mandok, “Sipata tikki marcerita ianakkokku, olo do na asing na hupikkirhon alai boi do diboto nasida i.”

Hea do hamu songon i? Molo makkatai ianakkonmuna tu hamu, pamate ma TV jala unang ma sai mar-HP hamu. Denggan ma tangihon nasida nang pe hira na so porlu cerita ni nasida i.

“Ikkon tapapos do roha ni ianakkotta patuduhon na parduli hita tu nasida. Molo dang songon i tabahen, olo do gabe tu halak na asing nasida paboahon na di rohana jala mangido bantuan.”​—Si Maranda.

“Unang ma pittor tasalahon ianakkotta nang pe sala cara marpikkir ni nasida.”—Si Anthony.

NA DIDOK BIBEL: “Parrohahon ma songon dia hamu manangihon.”​—Lukas 8:18.

Santai ma hamu makkatai tu ianakkonmuna. Sipata ummura do dakdanak paboahon na di rohana molo dang dibereng tu bohi ni natua-tuana tikki makkatai.

“Tikki di mobil olo do hami makkata-hatai. Ala di labbungku do ibana hundul dang di jolokku, gabe olo ma ibana paboahon na di rohana alana dang diida ibana bohikku tikki makkatai.”​—Si Nicole.

Boi do muse hamu makkata-hatai dohot ianakkonmuna tikki mangan.

“Tikki mangan hami di bornginna i, diceritahon hami do manang aha pe na masa di bagasan sadari i. Gabe lam kompak ma hami jala gabe diboto hami ma molo adong masalah. Na asing pe boi ma rade mangurupi.”—Si Robin.

NA DIDOK BIBEL: “Hatop manangihon, manat makkatai.”​—Jakobus 1:19.