1-3. Aha do parnidaan na didapot si Petrus, jala boasa porlu taboto artina?

 MARTANGIANG ma si Petrus di ruangan parginjang di sada jabu di topi ni laut, na di kota pelabuhan Joppe. Tikki i musim gugur taon 36 M. Nappunasa jabu i si Simon, tukkang kulit. Biasana dang sude halak Jahudi olo tinggal di jabu ni halak na karejona songon i. a Alai si Petrus olo do manginap disi sappe piga-piga ari. On patuduhon ditiru ibana do Jahowa na so mambeda-bedahon halak. Alai adong dope parsiajaran na asing na dapot ni si Petrus taringot Jahowa.

² Tikki martangiang si Petrus, mandapot parnidaan ma ibana. Diida ma songon kain na bidang turun sian langit. Herbang do kain i jala adong di bagasanna sude ragam ni binatang na diorai diallang di Patik ni si Musa. Pasti magigi do halak Jahudi mangallang akka binatang i. Alai disuru do si Petrus maneat jala mangallang i. Dialusi si Petrus ma, “Dang olo au Tuan! Ai dang hea dope huallang sipanganon na ramun.” Alai sappe tolu hali diparettahon tu ibana lao mangallang i jala didokkon, “Molo dung didok Debata ias, dang boi be dohononmu i ramun.” (Ul. 10:14-16) Gabe bingung do si Petrus alani parnidaan i.

³ Aha do arti ni parnidaan i? Porlu do taboto aha arti ni parnidaan i, ala i patuduhon cara pandang ni Jahowa tu akka halak. Tikki marbarita na uli, ikkon tatiru do cara pandang ni Debata i. Jadi asa taboto arti ni parnidaan ni si Petrus i, taida ma akka peristiwa na masa di tikki i.

4, 5. Ise do si Kornelius, jala aha do na terjadi tu ibana tikki martangiang?

⁴ Di na so pamotoan ni si Petrus, sadari sebelumna adong do bawa na mandapot parnidaan di Kaesarea, hira-hira 50 kilometer di sabola  utara. Goarna si Kornelius, sahalak perwira ni tentara Rom. b Tulus do rohana jala “halak na makkabiari Debata do ibana, songon i nang keluargana”. Dang proselit Jahudi si Kornelius, dang halak Jahudi ibana, jala dang marsunat. Alai godang do diurupi ibana akka halak Jahudi na pogos, jala “toktong do ibana martangiang tu Debata”.—Ul. 10:2.

⁵ Hira-hira jam 3 sore, martangiang ma si Kornelius jala mandapot parnidaan ma ibana. Didok suru-suruan ma tu ibana, “Ditangihon Debata do sude tangiangmi jala las do rohana mangida ho. Diida Ibana do songon dia burjum mangurupi akka na pogos.” (Ul. 10:4) Diparettahon suru-suruan i do asa disuru si Kornelius halak manjou Apostel Petrus, jala diulahon ibana ma i. Begeon ni si Kornelius nama barita na uli na boi menyelamatton ibana. Dang hea dope dilehon kesempatan on tu halak na so Jahudi jala na so marsunat.

6, 7. (a) Ceritahon ma pengalaman na patuduhon dialusi Debata do tangiang ni halak na tulus rohana. (b) Aha ma na boi tasimpulhon sian pengalaman i?

⁶ Saonari pe ditangihon Debata do tangiang ni halak na tulus rohana lao mananda Ibana. Contohna, adong sahalak borua di Albania manjalo majalah Menara Pengawal taringot cara mangajari ianakkon. c Dipaboa ibana ma tu donganta na marbarita tu jabuna i, “Diboto hamu do, baru sae dope au martangiang tu Debata asa diurupi au pagodang-godakkon akka borukkon. Jala disuru Ibana ma hamu ro! Cocok hian do on tu au!” Marsiajar Bibel ma ibana dohot akka boruna. Di pudian ni ari, suamina pe dohot do marsiajar Bibel.

⁷ Godang nai dope pengalaman ni akka donganta sisongon i. Dang kebetulan i terjadi! Attong aha ma na boi tasimpulhon? Na parjolo, dialusi Jahowa do tangiang ni akka halak na tulus rohana mangalului Ibana. (1 Raj. 8:41-43; Ps. 65:2) Na paduahon, diurupi suru-suruan do hita tikki marbarita na uli.—Pgk. 14:6, 7.

8, 9. Aha do na dipaboa Debata marhite tondi parbadia tu si Petrus, jala songon dia do tanggapanna?

⁸ “Bingung” dope si Petrus jala dipikkiri ibana dope arti ni parnidaan i. Alai nungnga sahat be halak na disuru si Kornelius i. (Ul. 10:17) Tikki i tolu hali ma didokkon si Petrus na so olo ibana mangallang binatang na ramun na di parnidaan i. Alai olo do ibana lao rap dohot bawa na disuru si Kornelius i jala masuk tu jabu ni halak na so Jahudi? Marhite tondi parbadia dipaboa Debata ma tu si Petrus, “Ida ma! Adong tolu bawa na mangalului ho. Jongjong ma ho, turun ma ho tu toru, ihutton ma nasida. Unang pola ragu ho, ai Au do na manuru nasida.” (Ul. 10:19, 20) Jadi parnidaan taringot binatang na ramun i mangurupi si Petrus asa rade mangoloi petunjuk na dilehon tondi parbadia.

⁹ Dung diboto si Petrus na marhite petunjuk sian Debata do si Kornelius manuru akka halak manjuppangi ibana, ditogihon ma nasida masuk tu jabu i jala “disi ma nasida marborngin”. (Ul. 10:23a) Sian on tarida ma, nungnga mulai be disesuaihon si Petrus cara pandangna tu cara pandang ni Debata taringot halak na so Jahudi.

10. Songon dia do Jahowa manogu-nogu naposona, jala aha do sukkun-sukkun na porlu tapikkirhon?

¹⁰ Sahat tu saonari, secara bertahap ditogu-togu Jahowa do naposona mangihutton lomo ni rohana. (Poda 4:18) Ditogu-togu Ibana do “naposo haposan jala na marbisuk” marhite tondi parbadiana. (Mat. 24:45) Sipata adong do pemahamanta na disesuaihon manang pengaturan ni organisasi na berubah. Jadi tasukkun ma diritta, ‘Boha do tanggapanku molo adong penyesuaian sisongon i? Huoloi do pengarahan na dibahen marhite tondi parbadia?’

11, 12. Aha do na diulahon si Petrus dung sahat ibana di Kaesarea, jala aha do na diboto ibana taringot Debata?

¹¹ Marsogotna i borhat ma si Petrus rap dohot utusan ni si Kornelius na tolu halak i dohot ‘onom [halak Jahudi] dongan sahaporseaon’ na sian Joppe. Borhat ma nasida tu Kaesarea. (Ul. 11:12) Nungnga dipaima si Kornelius be si Petrus, jala nungnga dijou ibana asa marpungu “keluargana dohot akka ale-alena”, mungkin dang halak Jahudi nasida. (Ul. 10:24) Dung sahat, masuk ma si Petrus tu jabu ni halak na so Jahudi na so marsunat i! Dang hea dope on diulahon ibana sebelumna. Didok si Petrus ma, “Takkas do diboto hamu, diorai do halak Jahudi mardongan manang ro mandapotton halak na sian bangso na asing. Alai, nungnga dipatuduhon Debata tu au na so boi dohonokku manang ise pe ramun manang dang ias.” (Ul. 10:28) Ujungna diattusi si Petrus ma molo parnidaanna i dang holan paboahon taringot sipanganon, alai dohot do taringot jolma. Alana didok ibana do, ‘Dang boi dohonokku manang ise pe [bahkan halak na so Jahudi] ramun manang dang ias.’

 ¹² Nungnga rade be sude halak na marpungu i manangihon si Petrus. Didok si Kornelius ma, “Marpungu do hami sude dison, di jolo ni Debata lao manangihon sude hata ni Jahowa na lao dipasahat ho tu hami.” (Ul. 10:33) Bayakkon ma molo didokkon sahalak peminat songon i tu hamu! Dung i didok si Petrus ma, “Nungnga takkas be huboto saonari, na so marimbar jolma di jolo ni Debata. Lomo do roha ni Debata mangida ganup halak na makkabiari Ibana jala na mangulahon na sittong, dang soal sian bangso na dia pe nasida.” (Ul. 10:34, 35) Nungnga diboto si Petrus be cara pandang ni Debata tu akka jolma, sarupa do sude di jolona dang soal aha sukuna, bangsona, dohot latar belakangna. Dipaboa si Petrus ma muse tu nasida taringot pelayanan ni Jesus, hamamatena, jala taringot haheheonna.

13, 14. (a) Aha ma na boi taboto sian peristiwa na masa tu si Kornelius di taon 36 M? (b) Boasa dang boi tahakimi sasahalak sian penampilan dohot latar belakangna?

¹³ Dung i terjadi ma peristiwa na so hea dope masa. “Tikki makkatai dope si Petrus”, mandapot tondi parbadia ma “akka halak na sian bangso na asing” i. (Ul. 10:44, 45) Holan on do peristiwa na disurat di Bibel na paboahon mandapot tondi parbadia akka halak sebelum tardidi. Diboto si Petrus do molo na masa i sada bukti na lomo roha ni Debata mangida nasida. Ujungna “disuru si Petrus ma asa dididi nasida [akka halak na so Jahudi i]”. (Ul. 10:48) Peristiwa di taon 36 M on, gabe sada bukti na patuduhon dang sada bangso na istimewa be halak Jahudi di jolo ni Debata. (Dan. 9:24-27) Ala si Petrus do na berperan penting di peristiwa on, berarti nga dipakke ibana be “kucci ni Harajaon” na patoluhon. (Mat. 16:19) Kucci on ma na mambukka kesempatan tu halak na so Jahudi jala na so marsunat asa gabe halak Kristen na dimiahi.

¹⁴ Sahat tu saonari, “dang marimbar jolma di Debata”. (Rom 2:11) “Lomo do rohana asa malua saluhut jolma.” (1 Tim. 2:4) Alani i unang ma hea tahakimi halak sian penampilan dohot latar belakangna. Ala Debata do na mangalehon tugas tu hita lao marbarita na uli, jadi ikkon marbarita do hita tu sude halak, dang soal negarana, sukuna, penampilanna, manang latar belakang agama ni nasida.

15, 16. Boasa muruk halak Kristen Jahudi tu si Petrus, jala boha do si Petrus mangalusi nasida?

¹⁵ Semangat hian do si Petrus naeng paboahon peristiwa i, pittor lao ma ibana tu Jerusalem. Alai dang sahat dope si Petrus, nungnga diboto sisean na di Jerusalem be naung “manjalo hata ni Debata” akka halak na sian bangso na asing na so marsunat i. Alani i dung sahat si Petrus, muruk do “akka halak na mangihutton patik taringot tu sunat”, ala masuk si Petrus tu ‘jabu ni na so marsunat jala mangan rap dohot nasida’. (Ul. 11:1-3) Na diparsoalhon nasida dang taringot boi do halak na so Jahudi i gabe siihutton Kristus manang na dang. Alai dipaksa nasida do ikkon diihutton halak na so Jahudi i patik taringot sunat asa boi nasida manomba Jahowa. Jadi maol dope halak Jahudi i  maninggalhon Patik ni si Musa, nang pe nungnga gabe sisean ni Jesus nasida.

¹⁶ Aha ma na dipatorang si Petrus asa diattusi nasida boasa diulahon ibana i? Menurut Ulaon ni Apostel 11:4-16, dipatorang ibana do opat bukti na patuduhon molo petunjuk i dijalo ibana sian Debata: (1) parnidaan na dapotna (Ayat 4-10); (2) paretta ni Debata marhite tondi parbadia (Ayat 11, 12); (3) suru-suruan na ro tu si Kornelius (Ayat 13, 14); jala (4) tondi parbadia dilehon tu halak na so Jahudi. (Ayat 15, 16) Ujungna didok si Petrus ma, “Alani i, tung margogo ma au mangabbati Debata? Ai nungnga dilehon Ibana silehon-lehon songon naung dilehon tu hita, akka na porsea tu Tuan Jesus Kristus.”—Ul. 11:17.

17, 18. (a) Dung mambege penjelasan ni si Petrus, aha do na ikkon diputusson halak Kristen Jahudi? (b) Boasa porlu hita berupaya manjaga huria tetap marsada, jala aha do sukkun-sukkun na porlu tapikkiri?

¹⁷ Penjelasan ni si Petrus i manguji haporseaon ni halak Kristen Jahudi. Olo do nasida mambolokkon pikkiran negatif taringot akka halak na so Jahudi jala manjalo akka sisean na baru tardidi i gabe dongan sahaporseaon ni nasida? Didok di Bibel, “Dung dibege nasida [akka apostel dohot halak Kristen Jahudi na asing] i, gabe hohom ma nasida. Dipuji ma Debata, ninna ma, ‘Dilehon Debata do hape tikki tu akka bangso na asing asa muba nasida jala mandapot hangoluan.’” (Ul. 11:18) Sikap ni nasida na positif i mambahen huria marsada.

¹⁸ Saonari pe dang mura manjaga asa toktong marsada huria, ala hita berasal “sian sude bangso, suku, marga, dohot bahasa”. (Pgk. 7:9) Alani i marragam do budaya dohot latar belakang ni halak na di huria. Jadi tasukkun ma diritta, ‘Nungnga hubolokkon be sude sian rohakku pikkiran negatif taringot halak na sian bangso na asing? Hupaloas do cara marpikkir ni portibi on mempengaruhi sikaphu tu akka dongan di huria? Terlalu bangga do au tu sada bangso, sada suku, manang sada budaya?’ Taingot ma, si Petrus (si Kepas) hea do terpengaruh tu cara marpikkir ni akka halak na negatif.  Piga-piga taon dung peristiwa ni si Kornelius, ‘dipadao ibana do dirina’ sian halak Kristen na sian bangso na asing jala ikkon dipasingot si Paulus do ibana. (Gal. 2:11-14) Jadi ikkon torus do hita hati-hati tu cara marpikkir na negatif taringot halak na asing jala unang ma tabeda-bedahon nasida.

19. Tu ise do halak Kristen Jahudi na di Antiokia marbarita, jala aha do hasilna?

¹⁹ Olo do sisean ni Jesus i marbarita tu halak na so Jahudi jala na so marsunat? Taparrohahon ma aha na masa di Antiokia Siria. d Godang do halak Jahudi penduduk ni kota i. Alai dang pola maralo halak Jahudi dohot na so Jahudi di kota i. Jadi dang pola masalah molo marbarita tu halak na so Jahudi. Di kota i do halak Kristen Jahudi marbarita tu akka “halak na marbahasa Junani”. (Ul. 11:20) Dang holan tu halak Jahudi na marbahasa Junani nasida marbarita, dohot do tu halak na so Jahudi jala na so marsunat. Dipasu-pasu Jahowa do upaya ni nasida, “gabe lam godang ma halak na porsea”.—Ul. 11:21.

20, 21. Songon dia do si Barnabas patuduhon na diakkui ibana terbatas kesanggupanna, jala songon dia do hita boi maniru ibana?

²⁰ Ala godang do halak na olo manangihon barita na uli di Antiokia, disuru huria na di Jerusalem ma si Barnabas lao tusi. Alani godang ni halak na berminat, dang tolap sahalakna mangulahon i. Pasti si Saulus ma halak na paling cocok mangurupi si Barnabas, ala ibana do na lao gabe apostel tu akka bangso. (Ul. 9:15; Rom 1:5) Dianggap si Barnabas do si Saulus sainganna? Daong. Rendah hati do ibana, diakkui do na terbatas kesanggupanna. Berinisiatif ma ibana lao tu Tarsus, dilului ma si Saulus jala diboan tu Antiokia. Saleleng sataon ma nasida rap mangurupi akka sisean di huria i.—Ul. 11:22-26a.

²¹ Songon dia do hita boi maniru si Barnabas tikki marbarita? Porlu do taakkui na terbatas kesanggupanta, ai marasing-asing do kemampuan ni setiap halak. Misalna adong do halak na terampil mangalean kesaksian tidak resmi manang marbarita sian jabu tu jabu, alai hurang malo manjuppangi muse manang mamukka parsiajaran Bibel. Ala taboto do terbatas kesanggupanta, tapangido ma bantuan ni na asing asa lam denggan hita di ulaon marbarita. Molo taulahon i lam terampil ma hita, jala tamba ma las ni rohatta di ulaon marbarita.—1 Kor. 9:26.

22, 23. Songon dia do akka donganta di Antiokia patuduhon na holong rohana tu halak Kristen na asing, jala songon dia do naposo ni Debata saonari mangulahon na sarupa?

²² Marhite tudu-tudu na sian Debata, “di Antiokia ma parjolo sahali akka sisean i digoari Kristen”. (Ul. 11:26b) Cocok do goar i manggombarhon akka halak na mangihutton Kristus. Dung lam godang akka halak sian bangso na asing gabe halak Kristen, boha do hubungan ni halak Kristen Jahudi dohot  na so Jahudi? Tarida do nasida songon na marhaha maranggi? Taida ma aha na masa tikki adong kelaparan hira-hira taon 46 M. e Lam susa do akka halak na pogos ala dang adong persediaan makanan dohot hepeng ni nasida. Hape halak Kristen Jahudi na tinggal di Judea, godangan halak na pogos do, jadi porlu do nasida diurupi. Tikki dibege akka dongan na di Antiokia na masa i, termasuk halak Kristen na so Jahudi, ‘dipapungu nasida ma silehon-lehon lao mangurupi akka dongan na di Judea’. (Ul. 11:29) On patuduhon dianggap nasida do halak Kristen na asing i songon keluargana sandiri!

²³ Sarupa do i songon na masa di tonga-tonga ni naposo ni Debata saonari. Molo taboto adong donganta na porlu diurupi, di inganatta manang di negara na asing, pittor berupaya do hita mangurupi nasida. Hatop do Panitia Cabang membentuk Panitia Penanggulangan Bencana lao mangurupi akka donganta na hona bencana alam, misalna badai, gempa bumi, dohot tsunami. Upaya ni akka donganta i patuduhon, songon sada keluarga do hita sude.—Joh. 13:34, 35; 1 Joh. 3:17.

24. Aha do na taboto sian parnidaan ni si Petrus, jala songon dia do hita mangulahon i?

²⁴ Massai penting do taboto aha arti ni parnidaan na dapot ni si Petrus di sada jabu na di Joppe. Taboto ma, Debata na tasomba i Debata na so mambeda-bedahon jolma. Lomo do rohana asa tapaboa barita taringot Harajaonna tu sude halak, dang soal aha sukuna, bangsona, manang latar belakangna. Jadi torus ma hita berupaya mangalului akka halak na olo manangihon barita i.—Rom 10:11-13.