Dung mate si Saul, gabe raja ma si Daud. Marumur 30 taon ma ibana tingki i. Di sada borngin, diida si Daud ma sada borua na bagak sian loteng ni istanana. Si Batseba do goar ni borua i jala istri ni si Uria do ibana. Diboan si Daud ma si Batseba tu istana. Mangulahon seks ma nasida, ujungna hamil ma si Batseba. Alai ndang lomo roha ni si Daud adong na mamboto i. Alani i, didok ma tu jendralna, asa si Uria na di baris parjolo tingki marporang. Mate ma si Uria jala kawin ma si Daud dohot si Batseba.

Diida Jahowa do sude na masa i. Alani i, disuru ma panurirang Natan manjumpangi si Daud. Didok si Natan ma tu si Daud, ‘Adong ma sahalak baoa na mamora jala gok dombana. Adong ma muse sahalak baoa na pogos. Holan sada do dombana jala holong do rohana tusi. Hape dibuat na mora i ma domba ni na pogos i.’ Muruk ma si Daud jala didok ma, ‘Ingkon dipamate do na mora i!’ Dialusi si Natan ma, ‘Ho ma baoa na mora i!’ Marsak ma si Daud, jala didok ma, ‘Nunga mardosa ahu tu Jahowa.’ Dihukum Jahowa do si Daud alani dosana i. Susa do ibana dohot keluargana. Alai, tongtong do ibana mangolu ala jujur do ibana jala toruk rohana.

Lomo do roha ni si Daud laho mambangun joro ni Jahowa. Alai, anakna do na dipillit Jahowa laho mambangun i. Goarna si Salomo. Dilehon si Daud ma angka na porlu tusi. Didok ma, ‘Ingkon bagak do  joro ni Jahowa i. Alai poso dope si Salomo. Alani i, huurupi ma ibana paradehon i.’ Dilehon si Daud ma godang hepeng, jala dilului ma partungkang na malo laho mambangun i. Dipapungu ma mas dohot perak, jala diboan ma hau aras sian Tirus dohot Sidon. Tingki laho mate si Daud, dipaboa do tu si Salomo gombar ni joro i. Didok ma, ‘Nunga disuru Jahowa ahu manurathon on tu ho. Urupan ni Jahowa do ho. Unang ho mabiar. Togu ma ho jala ulahon ma.’