Didok Jahowa ma tu si Musa, ‘Nangkok ma ho tu dolok asa husurat patikki di dua batu na laho hulehon tu ho.’ Nangkok ma si Musa tu dolok jala disi ma ibana saleleng 40 ari 40 borngin. Disurathon Jahowa ma Sampulu Patik di dua batu, dung i dilehon ma tu si Musa.

Ninna roha ni halak Israel, nunga ditinggalhon si Musa be nasida. Didok ma tu si Aron, ‘Ingkon adong do sasahalak na mamimpin hami. Bahen ma debata di hami!’ Didok si Aron ma, ‘Lehon hamu ma mas tu ahu.’ Dibahen si Aron ma patung anak ni lombu sian mas. Didok bangso i ma, ‘Patung on ma Debata na mamboan hita kaluar sian Mesir!’ Disomba nasida ma patung i, jala dipestahon ma i. Sala do i. Alana, nunga marjanji nasida, holan Jahowa do na disomba nasida.

Diida Jahowa do i jala didok ma tu si Musa, ‘Turun ma ho. Ndang diulahon nasida be na huparentahon i. Nunga disomba nasida debata na asing.’ Turun ma si Musa mamboan dua batu i.

 Dung jonok tu perkemahan i, dibege si Musa ma nasida marendei. Manortori ma nasida huhut manomba patung i. Muruk situtu ma si Musa. Alani murukna, disampathon ma dua batu i tu tano jala gabe puntar ma i. Pintor dipuntari ibana ma patung i. Disungkun ma tu si Aron, ‘Boasa olo ho disuru nasida mangulahon na sala?’ Dialusi si Aron ma, ‘Unang ma muruk ho. Diboto ho do songon dia nasida. Nasida do na manuru ahu mambahen debata di nasida. Alani i, hupapungu ma mas ni nasida jala hubahen ma patung lombu.’ Sasintongna, ndang ingkon dioloi si Aron pangidoan ni bangso Israel. Dung i, nangkok ma muse si Musa tu dolok. Dipangido ma tu Jahowa asa dilupahon Ibana hasalaan ni bangso i.

Dilupahon Jahowa do hasalaan ni angka halak na unduk tu Ibana. Sian on taboto ma, ingkon unduk do halak Israel tu si Musa na memimpin nasida.