Tingki si Josep dipenjara, marnipi ma si Firaun raja ni Mesir. Ndang adong na boi patorangkon arti nipina i. Adong ma pangurupi ni si Firaun na paboahon molo si Josep boi mamboto arti ni nipina i. Pintor dijou si Firaun ma si Josep.

Disungkun si Firaun ma ibana, ‘Boi do patorangonmu arti ni nipingki?’ Dipaboa si Josep ma tu si Firaun, ‘Gok do sipanganon di Mesir saleleng pitu taon, alai dung i masa ma kelaparan pitu taon nai. Pillit ma sahalak na malo laho manimpan sipanganon asa unang adong kelaparan.’ Didok si Firaun ma, ‘Ho ma hupillit! Ho ma halak na paduahon na marhuaso di Mesir!’ Boasa boi diboto si Josep arti ni nipi ni si Firaun? Ala diurupi Jahowa si Josep.

Saleleng pitu taon, disimpan si Josep ma hasil panen. Dung i, masa ma kelaparan di liat portibi on songon na dipaboa si Josep. Marroan ma angka halak manuhor sipanganon tu si Josep. Diboto si Jakkob do adong sipanganon di Mesir, alani i disuru ibana ma sampulu anakna laho manuhor sipanganon.

Ro ma anak ni si Jakkob tu si Josep. Ditanda si Josep do nasida. Alai, ndang ditanda nasida si Josep. Marsomba ma nasida tu si Josep, songon na masa di nipi ni si Josep tingki poso. Naeng mamboto atik na muba do nasida manang ndang, didok si Josep ma, ‘Mata-mata do hamu kan? Naeng mangalului kelemahan ni negara on do hamu kan?’ Didok nasida ma, ‘Daong! Abang adek do hami sude. Sian Kanaan do hami, jala 12 halak ma hami. Sada adeknami  nunga mate, na sada nai tinggal dohot bapaknami.’ Dung i didok si Josep ma muse, ‘Boan ma adekmuna i tuson, asa porsea ahu tu hamu.’ Alani i mulak ma nasida tu bapakna.

Tingki naeng manuhor sipanganon muse, disuru si Jakkob ma angka anakna tu Mesir. Diboan nasida ma si Benjamin, siampudan ni nasida. Laho manguji angka abangna, dipamasuk si Josep ma cangkirna na sian perak tu goni na diboan si Benjamin. Dung i ditudu ma nasida panangko. Tingki dapot ni pangurupi ni si Josep cangkir i di goni ni si Benjamin, tarsonggot ma angka abangna. Dipangido nasida ma tu si Josep asa unang diuhum si Benjamin, alai nasida ma na diuhum.

Diboto si Josep ma naung muba angka abangna. Ndang tartahan ni si Josep be pangkilalaanna. Tangis ma ibana jala didok, ‘Si Josep do ahu. Mangolu dope bapa?’ Songgot ma roha ni angka abangna. Didok ma tu nasida, ‘Unang be ingot angka na diulahon hamu tu ahu. Debata do na manuru ahu tuson asa selamat hamu. Hatop, boan ma bapa tuson.’

Mulak ma nasida laho paboahon i tu bapakna jala diboan ma bapakna tu Mesir. Ujungna, pajumpang ma muse si Josep dohot bapakna jala rap ma nasida.