Rap tading do si Lot dohot udana si Abraham di tano Kanaan. Alai, lam leleng lam godang ma pinahan ni si Abraham dohot si Lot. Alani godangna, ndang siat be inganan i tu nasida. Didok si Abraham ma tu si Lot, ‘Ndang boi be hita rap di sada inganan. Pillit ma tudia lomo ni roham, hupillit pe inganan na asing.’ Sian hatana on, ndang mangkaringkothon diri si Abraham kan?

Diida si Lot ma sada inganan na bagak, jonok ni kota Sodom. Godang do aek dohot rumput disi. Alani i, pinda ma ibana dohot keluargana tusi.

Mansai jahat do halak Sodom dohot halak Gomorra. Alani jahatna, naeng dipamate Jahowa ma angka halak di kota i. Alai, paluaonna do si Lot dohot keluargana. Disuru Jahowa ma dua suru-suruan manang malaikat pasingothon si Lot. Didok ma, ‘Hatop! Kaluar ma sian kota on! Laho pamateon ni Jahowa nama halak dison.’

Alai, ndang pintor laho si Lot, sai dipaleleng ibana do. Alani i, ditiop suru-suruan i ma tanganna, istrina, dohot dua boruna. Ditogu ma nasida kaluar sian kota i. Didok ma, ‘Lari ma hamu, asa selamat hamu! Unang ida tu pudi. Molo diida hamu tu pudi, mate ma hamu!’

Dung sahat nasida tu kota Zoar, dibahen Jahowa ma udan api dohot barerang di kota Sodom dohot Gomorra. Diripashon ma kota na dua i. Alai ndang dioloi istri ni si Lot Jahowa. Diida ibana do tu  pudi, gabe batu sira ma ibana! Alai selamat do si Lot dohot dua boruna ala mangoloi Jahowa. Tontu lungun do roha ni nasida ala ndang dioloi istri ni si Lot Jahowa. Sian on taboto ma, porlu do mangoloi Jahowa.