Tingki mamarenta Kesar Agustus di Rom, disuru ibana ma asa mulak sude halak Jahudi tu hutana be laho mendaftarhon diri. Alani i, lao ma si Josep dohot si Maria tu Betlehem, ala disi do huta ni si Josep. Hape nunga naeng partus si Maria.

Dung sahat nasida di Betlehem, ndang adong be inganan ni nasida marborngin. Holan kandang ni binatang nama. Disi ma si Maria manubuhon Jesus. Dibungkus ma ibana tu kain lampin jala dipeakkon ma di panggagatan ni binatang i.

Di borngin i, adong ma piga-piga parmahan na marmahan jonok ni Betlehem. Tompu ma ro sada suru-suruan manang malaikat tu jolo ni nasida. Gabe tiur ma inganan i alani hamuliaon ni Jahowa. Mabiar ma angka parmahan i. Alai, didok suru-suruan i ma, ‘Unang mabiar hamu. Na paboahon barita na uli do ahu. Sadari on, nunga tubu  Messias di Betlehem.’ Tarida ma muse godang suru-suruan di langit na mandok, ‘Hasangapon ma di Debata, dame ma di tano on.’ Dung i, ndang tarida be angka suru-suruan i.

Didok angka parmahan i ma, ‘Beta ma hita tu Betlehem saonari.’ Dung sahat, jumpang nasida ma si Josep dohot si Maria. Di kandang ni binatang do nasida rap dohot pese-pese i.

Dipaboa angka parmahan i ma tu angka halak hata ni suru-suruan i. Gabe heran do angka halak mambege i. Jala si Maria pe, sai dipingkiri ibana do i. Dung i, mulak ma angka parmahan i. Mandok mauliate do nasida tu Debata ala nunga dibege nasida barita na uli jala nunga diida nasida na didok suru-suruan i.