Di sada borngin, marnipi ma si Nebukadnesar. Gabe mabiar ma ibana. Dijou ibana ma angka halak na malo paboahon arti ni nipina i. Alai ndang adong na boi patorangkon. Ujungna, dipaboa raja ma tu si Daniel.

Didok si Nebukadnesar ma tu si Daniel, ‘Di nipingki, huida ma sada hau. Timbona sahat tu langit. Tarida do hau i sian sude liat portibi on. Bagak do bulungna jala godang parbuena. Ro do angka binatang tusi. Angka pidong pe marasar do di dangkana i. Dung i ro ma sada malaikat sian surgo. Didok ma, “Ponggol ma hau on dohot angka dangkana. Alai tinggalhon ma tunggul dohot uratna di tano. Ikat ma muse tunggulna i mamangke bosi dohot tombaga. Songon jolma do pingkiran dohot roha ni hau i. Alai muba ma i gabe songon binatang saleleng pitu taon. Asa diboto halak, Debata do na marhuaso jala dilehon do harajaonna tu halak na dihalomohon rohana.”’

Dipaboa Jahowa do tu si Daniel arti ni nipi i. Gabe mabiar ma si Daniel. Didok ma, ‘Ale rajanami, hupingkir do na laho tu musum on masa. Hape na taringot tu ho do nipi i. Hau na balga na diponggol i, tu ho do masa i. Ndang raja be ho. Gabe mangallang rumput ma ho di ladang, dos songon binatang. Alai ditinggalhon malaikat i do tunggul dohot uratna. On patuduhon gabe raja do ho muse.’

Sataon dungkon i, mardalan-dalan ma si Nebukadnesar di loteng ni istana. Dipuji-puji ibana ma Babel. Didok ma, ‘Ida ma kota na mansai uli on. Ahu do na mambangun on. Jago do ahu kan!’ Dung didok songon i, adong ma soara sian langit mandok, ‘Nebukadnesar! Ndang gabe raja be ho.’

Di tingki i, pintor mago ma pingkiran dohot roha ni si Nebukadnesar. Gabe songon binatang ma ibana. Dipakaluar ma ibana sian istana. Tinggal ma ibana di ladang songon binatang. Ganjang ma obukna songon imbulu ni lali jala sisilonna pe songon sisilon ni pidong.

 Dungkon pitu taon, gabe waras ma muse si Nebukadnesar. Dibahen Jahowa ma muse ibana gabe raja di Babel. Dung i didok si Nebukadnesar ma, ‘Hupuji ma Jahowa, Raja na di surgo. Nunga huboto, Jahowa do na marhuaso. Dipatutoru do halak na ginjang roha. Jala dilehon do harajaon tu halak na dihalomohon rohana.’