Dipillit Jahowa ma si Jeremia gabe panurirang di halak Juda. Disuru ma ibana marbarita jala pasingothon nasida asa unang sai mangulahon angka na jahat. Didok si Jeremia ma, ‘Alai Jahowa, poso dope ahu jala ndang malo ahu mangkatai.’ Didok Jahowa ma tu ibana, ‘Unang ho mabiar. Paboaonku do na laho sidokkononmu. Jala urupanku do ho.’

Didok Jahowa ma tu si Jeremia asa dipapungu angka malim jala didanggurhon hudon tano manang gunci di jolo ni nasida. Didok ma, ‘Ingkon songon on ma parhancur ni Jerusalem.’ Dung didok si Jeremia songon i, muruk situtu ma angka malim i. Dipungkul sahalak malim na margoar si Pashur ma si Jeremia. Dung i dipasung ma ibana. Borngin i, ndang boi si Jeremia bergerak. Manogotna i dipalua si Pashur ma ibana. Didok si Jeremia ma, ‘Ndang ulahononku be on. Ndang olo be ahu marbarita.’ Alai tutu do i? Daong. Dipingkiri si Jeremia ma muse, jala didok, ‘Dos songon api do hata ni Jahowa di bagasan rohangku. Ingkon tongtong do baritahononku i.’ Tongtong do marbarita si Jeremia.

Dung piga-piga taon, adong sada raja na baru di Juda. Adong do malim dohot panurirang na jahat na sogo rohana tu si Jeremia. Didokkon nasida ma tu angka pemimpin, ‘Ingkon dipamate do baoa on.’ Didok si Jeremia ma, ‘Molo dipamate hamu ahu, na pamatehon halak na so marsala do hamu. Hata ni Jahowa do na hupaboa, ndang hatangku.’ Gabe didok angka pemimpin i ma, ‘Ndang patut pamateon baoa on.’

 Muruk do angka malim ala sai marbarita si Jeremia. Didok nasida ma tu raja asa dipamate si Jeremia. Didokkon raja i ma asa dibahen nasida lomo ni roha ni nasida tu si Jeremia. Dung i, ditangkup nasida ma si Jeremia jala dipamasuk tu sumur na marlumpur asa mate ibana. Lam bagas ma si Jeremia masuk tu lumpur i.

Sahalak pejabat istana na margoar si Ebedmelek mandok tu raja i, ‘Nunga didabuhon angka malim i si Jeremia tu sumur! Molo ndang tapakaluar ibana sian i, mate ma ibana.’ Didok raja i ma tu si Ebedmelek asa disuru 30 baoa manarik si Jeremia sian sumur i. Olo do hamu maniru si Jeremia na tongtong marbarita nang pe adong na mangorai?