Tahaporluhon do hepeng laho paradehon na porlu tu keluarga. (Poda 30:8) Jala boi do hepeng ”songon parlindungan.” (Parjamita 7:12, Bibel siganup ari) Alai, olo do ra maol manaringoti parhepengon di parsaripeon. Nang pe songon i, unang tapaloas hepeng gabe mambahen parungkilon di parsaripeon. (Epesus 4:32) Ingkon marpos ni roha ma tu dongan saripe tingki mamangke hepeng jala masiurupan ma mangatur parhepengon.

SONGON ON MA HATA NI BIBEL: ”Ai ise hamu na giot pajongjong palaspalas, na so jumolo hundul mangetongi sipalahoonna tusi, manang na tuk laho patulushon?” (Lukas 14:28) Ringkot do mardos ni roha laho mamangke hepeng na adong di hamu. (Amos 3:3) Pingkiri ma aha na laho situhoron jala sadia godang hepeng laho manuhor i. (Poda 31:16) Nang pe adong hepengmuna, unang ma sude dituhori na so dihaporluhon. Unang ma marutang. Tuhor ma na porlu hombar tu hepeng na adong di hamu.​—Poda 21:5; 22:7.

NA BOI ULAHONONMU:

• Molo adong dope lobi ni hepengmuna dung dituhor angka na porlu, rap manontuhon ma tudia do pangkeonmuna lobi ni hepeng i

• Alai molo ndang sae hepeng na sinarimuna, orui ma situhoronmu. Umpamana, tumagon do mangalompa sian na sai manuhor sipanganon

SONGON ON MA HATA NI BIBEL: ”Ganup ma mandok hata hasintongan tu donganna.” (Sakaria 8:16) Unang ma margabus tu dongan saripemu taringot tu hepeng na sinarimuna dohot na pinangkemuna.

Masisungkunan ma dohot dongan saripemuna tingki mambahen haputusan laho mamangke hepeng. (Poda 13:10) Molo denggan hamu masisungkunan tingki mamangke hepeng, on boi manjaga hadameon di parsaripeonmuna. Ingot ma rap marnampuna do hamu di hepeng na sinarimuna i.​—1 Timoteus 5:8.

NA BOI ULAHONONMU:

• Rap manontuhon ma sadia godang hepeng na boi dipangke, unang pola ingkon disungkun halak

• Unang jolo tubu parbadaan asa dihatai taringot parhepengon