Diboto halak Jahudi na maringanan di sabola barat ni Laut Galilea ma, na naeng mulak Jesus sian Dekapolis. Ra, nunga dibege nasida na binahen ni Jesus, i ma pasohon badai manang haba-haba, dohot pamalumhon baoa na sinonggopan ni suru-suruan na jahat. Alani i, “mansai torop” ma jolma na marpungu disi laho paimahon Jesus, ra jonok tu Kapernaum. (Markus 5:21) Dung turun Jesus sian parau i, pintor didapothon nasida ma ibana.

Sahalak sian nasida na naeng pajumpang dohot Jesus, i ma si Jairus pamimpin ni sinagoga na adong di Kapernaum. Marsinggang ma ibana tu pat ni Jesus jala ninna ma, “Mansai posi do nuaeng sahit ni borungku. Ro ma jolo ho mangampehon tanganmu, asa malum ibana jala mangolu.” (Markus 5:23) Marumur 12 taon ma boru ni si Jairus i jala holan i do boruna. Songon dia do pangkilalaan ni Jesus tu pangidoan ni si Jairus i?​—Lukas 8:42.

Tingki di pardalanan tu jabu ni si Jairus, marsionjaran do angka halak laho mangihuthon Jesus. Didok roha ni nasida, naeng bahenon ni Jesus do mukjizat manang tanda halongangan. Alai adong ma sahalak borua na marsahit na posi na mangihuthon Jesus sian pudi.

Nunga 12 taon borua i marsitaonon ala ndang hea so bulanna. Nunga godang dokter na mangubati ibana jala nunga habis hepengna marubat. Alai ndang marnamalum ibana, gariada “lam posi do sahitna i”.​—Markus 5:26.

Asing ni i, gale do ibana dibahen sahitna i jala maila. Jotjot do ndang hea dihatai di jolo ni godang halak sahit sisongon i. Jala mangihuthon Patik ni si Musa, ramun do sahalak borua na ro bulanna. Manang ise na manjama manang na dais tu abitna, ingkon maridi do ibana jala ramun do ibana sahat tu na bonom mata ni ari.​—3 Musa 15:25-27.

Nunga “dibege ibana barita taringot tu Jesus”. Alani i do dilului ibana Jesus. Alai ala ramun do ibana, sipsip ma ibana mardalan di tonga-tonga ni angka jolma i. Huhut ma didok ibana di bagasan rohana, “Holan abitna i pe hujama, malum do sahithon.” Dung dijama ibana ujung ni abit ni Jesus i, pintor so ma dihilala ibana bulanna i! Jala “nunga malum sahitna i”.​—Markus 5:27-29.

Dung i disungkun Jesus ma, “Ise na manjama ahu?” Tontu tarsonggot do borua i tingki disungkun Jesus songon i. Alai didok si Petrus ma, “Guru, torop do halak na mangkaliangi jala na manosak ho.” Alai, didok Jesus ma, “Adong do na manjama ahu. Ai huboto do adong huaso na kaluar sian ahu.”​—Lukas 8:45, 46.

Dung dibege borua i hata ni Jesus i, marsinggang ma ibana tu pat ni Jesus. Mabiar jala hitir-hitir ma ibana. Dipaboa ibana ma di jolo ni jolma i taringot tu sahitna jala songon dia ibana malum. Alai, lambok ma didok Jesus tu ibana, “Ale borungku, haporseaonmi do mambahen ho malum. Mulak ma ho di bagasan dame jala malum ma sahitmi.”​—Markus 5:34.

Tontu las do rohanta mamboto na lambok do Raja na pinillit ni Debata laho mamarenta tano on. Parasi roha do ibana jala dipangke do huasona mangurupi angka jolma!