Andorang so laho angka apostel ni Jesus marbarita, nunga dipaboa Jesus hian tu nasida carana marbarita. Alai dipaingot do nasida. Ninna ma, “Parrohahon ma on! Husuru do hamu songon biru-biru tu tonga-tonga ni serigala. . . . Manat ma hamu tu angka jolma, ai boanon ni nasida do hamu tu angka pengadilan jala linsinganna do hamu di angka sinagoga ni nasida. Boanonna ma hamu tu jolo ni angka gubernur dohot angka raja alani ahu.”​—Mateus 10:16-18.

Nang pe dibahen na hansit tu angka na mangihuthon Jesus, alai didok ibana do, “Tingki diboan hamu, unang ma holsohon hamu taringot tu sidohononmuna. Ai laos di tingki i do paboaonna hata sidohononmuna. Ai ndang sian dirimuna hata sidohononmuna, alai urupan ni tondi parbadia do hamu.” Didok Jesus ma muse, “Asing ni i, pasahaton ni na marhaha maranggi ma haha anggina tu hamatean, jala songon i ma nang ama tu anakna. Aloon ni ianakhon ma natua-tuana jala pasahatonna tu hamatean. Jala dihasogohon sude jolma ma hamu alani goarhu, alai paluaonna do na manahan ro di ujungna.”​—Mateus 10:19-22.

Ala ringkot do ulaon marbarita i, dipaboa Jesus ma tu nasida asa manat tingki marbarita. Didok Jesus ma, “Molo dibahen na hansit tu hamu di sada kota, lari ma hamu tu kota na asing. Situtu do na hudok on tu hamu, ndang na tardalani hamu sude kota di Israel sahat tu na ro Anak ni jolma i.”​—Mateus 10:23.

Dilehon Jesus do tudu-tudu, sipaingot, dohot janji tu apostelna na 12 i andorang so marbarita nasida! Jala dung hehe Jesus, marlaba dope sudena i tu angka parbarita. Songon i ma nang tu hita saonari. Taboto ma i sian hata ni Jesus na mandok, “dihasogohon sude jolma” do angka siihuthon ibana. Tangkas ma, ndang holan halak na di tingki ni apostel i na marsogo ni roha tu barita na uli. Asing ni i ndang dipaboa di Bibel, tingki marbarita angka apostel i di Galilea, diboan nasida tu jolo ni gubernur dohot tu jolo ni raja. Jala ndang hea nasida diboan keluarga ni nasida asa diuhum mate. Tutu ma, marlangku do tu hita sipasingot ni Jesus i.

Tangkas ma, taringot tu na laho masa di ari na naeng ro do na pinaboa ni Jesus tu angka apostelna i. Sian hata ni Jesus i, taboto ma ndang sae dope ulaon ni angka apostel i “sahat tu na ro Anak ni jolma i”. Lapatanna, tingki  ro Jesus Kristus gabe Raja dohot Panguhum na pinillit ni Debata, ndang sae dope ulaon marbarita i.

Ndang songgot be roha ni angka apostel molo adong na marsogo ni roha tu nasida tingki marbarita. Ai didok Jesus do, “Ndang tumimbo sisean sian guruna, manang tumimbo hatoban sian tuanna.” Lapatanna, molo dibahen na hansit tu Jesus bahenonna do nang na hansit tu siseanna. Alai didok Jesus do, “Unang ma habiari hamu halak na boi mambunu daging alai ndang boi mangago hangoluan. Alai, habiari ma Ibana na boi mangaripashon hangoluan dohot daging di Gehena.”​—Mateus 10:24, 28.

Dibahen Jesus do sitiruon tu angka siseanna. Marsihohot do ibana tu Jahowa sahat tu na mate. Holan Jahowa do na umgogo sian sasude. Jala holan Ibana do na boi “mangago hangoluan” ni sasahalak. Lapatanna, holan Jahowa do na boi mangago pangkirimonna laho mangolu saleleng ni lelengna, manang na boi pahehehon ibana. Tontu lam pos ma roha ni angka siseanna mambege i.

Dipaboa Jesus do muse tu nasida songon dia holong ni Jahowa tu nasida marhite sada tudosan. Didok ma, “Nda salimper do digadis dua amporik? Alai, ndang adong nanggo sada pe sian i na madabu tu tano na so pamotoan ni Amamuna. . . . Alani i unang ma mabiar, ummarga do hamu sian godang amporik.”​—Mateus 10:29, 31.

Boi do parohon parsoalan di keluarga barita na uli i. Ai ndang sude keluarga olo manjalo barita na uli i. Jesus mandok, “Unang dirimpu hamu na mamboan dame ahu ro tu tano on.” Alani i, ingkon barani do sasahalak na olo manjalo hasintongan i. Jesus mandok, “Manang ise na humolong rohana tu ama manang tu inana sian tu ahu, ndang tama ibana siseanku. Jala manang ise na humolong rohana tu anak manang tu boruna sian tu ahu, ndang tama ibana siseanku.”​—Mateus 10:34, 37.

Alai adong do na olo manjalo barita na pinaboa ni angka sisean i. Jesus mandok, “Manang ise na mangalehon sasangkir aek siinumon tu sahalak sian na metmet on ala siseanku ibana, ndang mago upana.”​—Mateus 10:42.

Dung dijalo angka sisean i tudu-tudu, sipaingot dohot janji na patoguhon roha, “didalani nasida ma sian huta tu huta, dibaritahon barita na uli jala dipamalum angka halak”.​—Lukas 9:6.