Dung tardidi Jesus, pintor ro do Sibolis. Dibahen ibana do sian nasa gogona laho mangambati Jesus mangulahon lomo ni roha ni Debata. Gariada andorang so marbarita Jesus, nunga piga-piga hali ibana diuji Sibolis. Di pudian ni ari, didok Jesus ma, “Ai na ro ma parhuaso ni portibi on. Alai ndang marhuaso i tu ahu.”​—Johannes 14:30.

Di bagasan parnidaan ni si Johannes, diida ibana ma aha na laho masa tu ‘naga na balga i, ulok na parjolo, i ma Sibolis’. Ala nunga didabu ibana sian surgo, gabe “muruk situtu do ibana, ai nunga diboto ibana otik nama tingkina”. (Pangungkapon 12:9, 12) Pos do rohanta na laho didabu nama satongkin nai “naga i, ulok na parjolo i” tu lombang na mansai bagas. Masa ma i tingki mamarenta Jesus saleleng 1.000 taon di Harajaon ni Debata.​—Pangungkapon 20:1, 2.

Aha do na laho masa tu tano on saleleng 1.000 taon i? Ise do na maringanan disi? Dipaboa Jesus ma i marhite sada tudosan. Dipaboa Jesus ma aha na laho masa tu angka halak na mangurupi haha anggi ni Jesus, na dos songon biru-biru. Jala dipaboa do aha na laho masa tu angka halak na mangalo, na dos songon hambing. Didok ma, “Tu hamatean saleleng ni lelengna ma halak sisongon i [hambing], alai ianggo angka halak na mangulahon na sintong [biru-biru] tu hangoluan saleleng ni lelengna.”​—Mateus 25:46.

Hea do didok Jesus tu sahalak parjahat na rap diuhum mate dohot ibana, “Tutu do na hudok on tu ho sadari on, rap do ho dohot ahu di Paradeiso.” (Lukas 23:43) Ndang sarupa na didok Jesus tu parjahat i dohot tu angka apostelna. Ndang didok Jesus na laho mamarenta  ibana rap dohot parjahat i di Harajaonna. Alai na didok Jesus, boi do parjahat i mangolu di Paradeiso, sada porlak na mansai uli di tano on. Alani i, laho mangolu di Paradeiso di tano on do sude jolma na dos songon biru-biru.

Dipaboa apostel Johannes do songon dia parngoluon di tano on haduan. Didok ibana ma, “Joro ni Debata adong di tonga-tonga ni jolma. Maringanan ma Ibana rap dohot nasida jala gabe bangsona ma nasida. Jala Debata sandiri rap dohot nasida. Apusan ni Debata ma nasa ilu-ilu sian mata ni nasida. Ndang adong be hamatean nang arsak ni roha, nang angguk-angguk, nang na hansit, ndang disi be. Ai nunga salpu na parjolo i.”​—Pangungkapon 21:3, 4.

Asa boi parjahat i mangolu saleleng ni lelengna di Paradeiso, ingkon dipahehe do ibana. Alai ndang holan ibana na laho dipahehe. Ai didok Jesus do, “Na ro ma tingkina begeon ni saluhut na di kuburan i ma soarana jala kaluar ma nasida. Angka sibahen na denggan hehe tu hangoluan jala angka sibahen na jahat hehe laho diuhumi.”​—Johannes 5:28, 29.

Aha do na laho diulahon angka apostel ni Jesus dohot angka halak na laho mangolu di surgo? Bibel mandok, “Mamarenta ma nasida gabe raja rap dohot Kristus saleleng 1.000 taon.” (Pangungkapon 20:6) Nunga hea nasida mangolu di tano on. Alani i, boi ma nasida marasi ni roha tingki mamarenta gabe raja. Ai diantusi nasida do pangkilalaan ni jolma.​—Pangungkapon 5:10.

Saleleng 1.000 taon i, hilalaon ni angka jolma na di tano on ma laba ni tobusan ni Jesus. Ndang hilalaon ni nasida be na hansit alani dosa ni si Adam dohot si Hawa. Urupan ni Jesus dohot angka na rap mamarenta dohot ibana ma asa mangolu saleleng ni lelengna hita di tano on. Marlas ni roha ma hita mangolu di tano on. Ai on do na dihalomohon Debata sian mulana!

Saleleng 1.000 taon i diulahon Jesus ma sude na diparentahon Jahowa tu ibana. Di ujung ni 1.000 taon i, paulakon ni Jesus ma Harajaon i dohot angka jolma tu Amana. On patuduhon na toruk situtu do roha ni Jesus. Didok si Paulus do, “Alai dung dibahen tunduk sude tu ibana, Anak i sandiri pe patundukonna do dirina tu Debata na mambahen sude tunduk tu ibana. Alani i, gabe Debata ma na mangarajai sasudena.”​—1 Korint 15:28.

Tangkas ma, holan marhite Jesus do saut sude lomo ni roha ni Debata na marmulia i. Manang aha pe lomo ni roha ni Debata di ari na naeng ro, sai gabe “dalan dohot hasintongan dohot hangoluan” do Jesus saleleng ni lelengna.​—Johannes 14:6.