Nunga dipaboa suru-suruan i tu si Maria na naeng mardenggan pamatang nama ibana. Jala dipaboa do asa dibahen goar ni anakna i Jesus. Ibana ma na laho gabe Raja saleleng ni lelengna. Alani i, disungkun si Maria ma, “Songon dia ma i boi masa? Ai namarbaju dope ahu.”​—Lukas 1:34.

Dialusi si Gabariel ma, “Songgopan ni tondi parbadia ma ho jala huaso ni Debata ma na mangalinggomi ho. Alani i ma, badia do dohonon na laho tubu i, Anak ni Debata.”​—Lukas 1:35.

Laho paposhon roha ni si Maria, didok si Gabariel ma muse, “Si Elisabet sisolhotmi pe, nunga onom bulan ibana gabe-gabean nang pe naung matua, jala didok do ibana borua na mandul. Ai ndang adong na so tarpatupa ni Debata.”​—Lukas 1:36, 37.

Gabe pos ma roha ni si Maria. Didok ma tu si Gabariel, “Naposo ni Jahowa do ahu! Sai saut ma tu ahu songon na nidokmi.”​—Lukas 1:38.

Dung laho si Gabariel, marhobas ma si Maria laho borhat mandapothon si Elisabet. Di Judea do si Elisabet tading rap dohot tungganedolina, i ma huta na mardolok-dolok na jonok tu Jerusalem. Hira-hira tolu manang opat ari ma pardalanan ni si Maria sian Nasaret tu inganan i.

Ujungna, sahat ma si Maria di jabu ni si Sakaria. Tingki laho masuk tu jabu i, didok si Maria ma tu si Elisabet, “Horas!” Laos di tingki i, songgop ma tondi parbadia tu si Elisabet, didok ma tu si Maria, “Dapotan pasu-pasu ma ho di tonga-tonga ni angka borua jala tarpasu-pasu ma poso-poso na di bortianmi! Hasangapon do di ahu, ro ina ni Tuanku mandapothon ahu! Ai holan hubege tabemi, manggunjal do poso-poso na di bortianku alani las ni rohana.”​—Lukas 1:42-44.

Dung i, didok si Maria ma, “Pujionku do Jahowa, marganda do las ni rohangku alani Debata, Sipalua ahu. Ai ditatap Ibana do ahu naposona na lea on. Sian saonari, dohonon ni sude sundut ma ahu na marlas ni roha. Ai dibahen Debata na marhuaso i do angka ulaon na balga di ahu.” Nang pe lomo roha ni Jahowa tu si Maria alai ndang ginjang rohana. Jahowa do dipasangap si Maria. Ai didok si Maria do, “Badia do goarna.” Jala didok do muse, “Ai marsundut-sundut do asi ni rohana tu angka halak na mangkabiari Ibana.”​—Lukas 1:46-50.

Dipuji si Maria do muse Debata. Ninna ma, “Marhite tanganna na gogo i dipanserakkon Ibana do angka siginjang roha. Dipatutoru Ibana do halak na marhuaso sian habangsana, alai dipatimbo do angka na lea. Dipabosur do halak na male marhite angka na denggan, dipalao do halak na mora ndang adong diboan manang aha. Ai ro do Ibana mangurupi naposona halak Israel, patuduhon diingot Ibana do janjina. Marjanji do Ibana laho patuduhon asi ni rohana tu si Abraham dohot tu angka pinomparna salelengna songon na nidokna tu angka ompunta.”​—Lukas 1:51-55.

Hira-hira tolu bulan ma si Maria di jabu ni si Elisabet. Ra, laho mangurupi si Elisabet do ibana andorang so partus. Tontu, sada hasurungan do di nasida, ala boi mardenggan pamatang marhite pangurupion ni Debata. Jala tingki na denggan do on di nasida ala boi rap di tingki sisongon i.

Jala parrohahon ma hasangapon ni Jesus andorang so tubu dope ibana. Ai dijou si Elisabet do ibana ‘Tuanku’. Jala poso-poso na di bortianna pe ‘manggunjal do alani las ni  rohana’ tingki mambege tabe ni si Maria. Alai, ndang songon i bahenon ni halak tu si Maria dohot tu anakna na laho tubu i. On ma na laho taparsiajari.