Bagas joro na di parnidaan i dibahen di sada “dolok na massai timbo” (ida nomor 1). Nungnga tabahen ibadat na sittong i untimbo sian sude? Tabahen do i ulaon na uppetting di ngolutta?

Adong do tembok di sakaliling ni bagas joro i (ida nomor 2) lao manjaga kompleks ni bagas joro na di inganan na bidang (ida nomor 3). On paingotton asa unang tapasombu manang aha pe manegai ibadatta. Menurut Hesekiel 42:20, “inganan na badia” i ikkon dibahen do dao sian “inganan na so badia” (ulaon siganup ari na so berkaitan tu ibadatta). Jadi molo ulaon sisongon i pe ikkon dibahen dao sian ibadat na sittong, pasti ikkon dipasiding akka na manomba Jahowa do pangalaho na dihagigihon Debata manang seks na so patut!

Doras do aek mardalan sian inganan na badia. Parohon hangoluan do aek i, jala mambahen subur luat i (ida nomor 4). Pasu-pasu on lao dibahas do di Pasal 19.

Adong do akka gerbang na timbo di luar (ida nomor 5) dohot di bagasan bagas joro i (ida nomor 9). On patuduhon nungnga ditottuhon Jahowa standar moral na timbo na ikkon diihutton halak na naeng mangulahon ibadat na sittong. Sarupa do ukkuran ni gerbang na di luar dohot na di bagasan. Cocok do on manggombarhon pangidoan ni Jahowa sian sude naposona. Sarupa do na dipangido Ibana sian sude halak, dang soal aha kedudukan manang tugas ni nasida.

Akka ruang makan (ida nomor 8) na di bagas joro najolo, paingotton hita tu halak na mangallang sebagian sian pelean na diboan nasida tu bagas joro. Seolah-olah rap mangan ma nasida dohot Jahowa disi. Saonari dang diihutton halak Kristen be songon i dung dibahen pengaturan taringot tu ibadat na sittong. Ai “holan sada do pelean” na dilehon disi, jala nungnga dipelehon i. (Heb. 10:12) Alai, tong do hita boi mangalehon “pujian tu Debata” songon peleanta.​—Heb. 13:15.

Mungkin bingung do hamu mamikkiri sude ukkuran na di parnidaan i. Alai on ma na gabe jaminan molo ibadat na sittong pasti dipadenggan Jahowa sesuai tu lomo ni rohana. Nungnga ditottuhon i jala dang boi be diuba, dos songon akka ukkuran i. Nang pe dang adong dipaboa si Hesekiel akka halak di parnidaan i, alai adong do disurat ibana sipasingot na tegas sian Jahowa tu akka malim, pamimpin, dohot rakyatna. Sude naposo ni Jahowa ikkon mangihutton standar ni Debata na sittong.