1, 2. (a) Songon dia do pamimpin agama mangorai ulaon marbarita, alai songon dia do dibahen angka apostel? (b) Boasa ndang dioloi angka apostel i parenta na mangorai nasida marbarita?

 NDANG leleng sian ari Pentakoste taon 33 M, masa ma hasusaan tu huria Kristen na baru dipajongjong di Jerusalem. Diida Sibolis do on tingki na denggan laho mangago huria Kristen na baru jongjong i, andorang so togu dope huria i. Dipangke Sibolis ma pamimpin agama mangorai ulaon marbarita na uli. Alai, tongtong do marbarita angka apostel i jala lam godang ma ”angka na porsea di Tuhan i”.​—Ul. 4:18, 33; 5:14.

² Lam sogo ma roha ni musunasida, dipenjarahon ma angka apostel i. Alai, di tonga borngin dipalua surusuruan do nasida sian penjara i. Sogot dope ari nunga marbarita muse nasida. Alani i, ditangkup jala diboan ma nasida tu jolo ni panguhum. Didok ma apostel i ndang mangoloi parenta. Alai, dialusi angka apostel i ma, ”Ingkon oloan do iba di Debata asa di jolma!” Lam tarrimas ma angka pamimpin mambege i, naeng ma dipusa angka apostel i. Alai mandok hata ma si Gamaliel sahalak Sibotopatik na diparsangapi, ninna ibana, ”Manat ma hamu . . . Unang hahua hamu be angka halak i, pasombu hamu ma nasida.” Di na so panagaman, dioloi jala dipalua angka pamimpin i ma angka apostel i. Songon dia do pangkilalaan ni angka apostel i? Tongtong do nasida ”mangajarhon dohot mamaritahon Kristus Jesus”.​—Ul. 5:17-21, 27-42; Poda 21:1, 30.

3, 4. (a) Aha do cara na dipangke Sibolis laho mangorai naposo ni Debata laho marbarita? (b) Aha do na laho taparsiajari di pasal on dohot di dua pasal na mangihut?

³ Tingki ditangkup jala diboan angka apostel tu pengadilan taon 33 M, i ma parjolo sahali hasusaan na ro sian pamarenta tu huria Kristen, alai ndang i dope ujungna. (Ul. 4:5-8; 16:20; 17:6, 7) Saonari, dipangke Sibolis dope musu ni hasintongan manjujui pamarenta mangorai ulaon marbarita. Didok musu i do angka na so tutu tu naposo ni Debata. Umpamana, didok do nasida panggunturi, pamolamola, dohot partigatiga. Alani i, olo do laho angka donganta  tu pengadilan mampartahanhon hakta. Aha do pangkorhonna? Songon dia do naung ditontuhon ni pengadilan marpulu taon naung salpu mangkorhon tu hita saonari? Taparrohahon ma angka parsoalan na masa di pengadilan asa taboto songon dia on boi mangurupi hita ”mampartahanhon dohot pahothon Barita Nauli i”.​—Plp. 1:7, Bibel siganup ari.

⁴ Sian pasal on taboto ma carana hita mampartahanhon hakta laho marbarita. Dua pasal na mangihut, mangulas angka parsoalan na masa tu naposo ni Debata tingki mampartahanhon haknasida laho mangihuthon patik ni Jahowa.

5. Di ujung ni taon 1930-an, boasa ditangkup parbarita na uli, jala aha do na diulahon angka donganta na manguluhon organisasi?

⁵ Di ujung ni taon1930-an, Sitindangi Ni Jahowa di negara bagian Amerika Serikat dipaksa mambahen surat ijin laho marbarita. Alai, ndang olo angka donganta mangurus ijin ala boi do dibatalhon ijin di sada tingki. Dung i, ndang adong na boi mangambati ulaon marbarita ala on parenta sian Jesus. (Mrk. 13:10) Marratus parbarita ditangkup tingki i. Alani i, diboan na manguluhon organisasi ma parsoalan on tu pengadilan laho mampartahanhon haknasida hombar tu undang-undang maragama. Parsoalan na diboan tu pengadilan taon 1938, mangkorhon na balga tu ulaon marbarita. Aha do na masa tingki i?

6, 7. Aha do na masa tu keluarga ni si Cantwell?

⁶ Ari Selasa manogot tanggal 26 April 1938, marbarita ma si Newton Cantwell na marumur 60 taon dohot tungganeboruna si Esther, rap dohot ianakhonna, si Henry, si Russell, dohot si Jesse di kota New Haven, Connecticut. Perintis istimewa do nasida sude. Mangarade do nasida marbarita lobi sian sadari. Boasa? Ala nunga pigapiga hali nasida ditangkup, jala olo do nasida ditangkup muse tingki marbarita. Alai, ndang mabiar nasida. Dipangke nasida do dua mobil marbarita tu New Haven. Si Newton mamboan mobil na marisi angka buku dohot fonograf. Si Henry na marumur 22 taon, mamboan mobil berpengeras soara. Songon naung hea masa, ditangkup polisi ma muse nasida.

⁷ Ditangkup ma parjolo si Russell na marumur 18 taon, dung i, si Newton dohot si Esther. Sian na dao, si Jesse na marumur 16 taon mangida natuatuana dohot abangna ditangkup polisi. Tading ma sahalak ibana disi, ala di inganan na asing do si Henry marbarita na uli. Ditorushon ibana do marbarita mamangke fonograf. Diputar si Jesse ma  jamita ni si Rutherford na marjudul ”Musu” (Enemies) tu dua halak baoa na maragama katolik. Alai muruk ma angka baoa i, jala naeng diantuk ma si Jesse dung dibege jamita i. Ditadingkon ibana ma nasida, alai ndang sadia leleng ro ma polisi manangkup ibana. Dipalua do si Esther, alai tungganedolina si Cantwell dohot dua anakna ditahan. Ujungna, dipalua do sude nasida dung dilehon jaminan.

8. Boasa didok pengadilan si Jesse Cantwell manggunturi?

⁸ Bulan September 1938, dijou ma keluarga ni si Cantwell tu pengadilan di New Haven. Si Newton, si Russell, dohot si Jesse didok marsala ala mangido sumbangan ndang mamangke ijin. Dung naik banding tu Pengadilan Tinggi Connecticut, tongtong do didok marsala si Jesse, ala ditudu ibana manggunturi. Boasa didok songon i? Dua baoa na maragama Katolik i mandok jamita na pinutar ni si Jesse paroaroahon agama ni nasida. Alani i, angka donganta na manguluhon di organisasi naik banding tu Mahkamah Agung AS, pengadilan na tumimbo di negara i.

9, 10. (a) Aha do na ditontuhon ni Mahkamah Agung ni AS tu keluarga ni si Cantwell? (b) Aha do laba ni i tu hita?

⁹ Tanggal 29 Maret 1940, rade do Hakim Ketua Charles E. Hughes dohot ualu hakim anggota manangihon si Hayden Covington, pengacara ni Sitindangi Ni  Jahowa. a Tingki jaksa negara bagian Connecticut mandok molo Sitindangi manggunturi, disungkun sahalak hakim ma, ”Diboto hamu do molo barita na pinasahat ni Jesus pe ndang dijangkon halak tingki i?” Dialusi jaksa i, ”I do, molo ndang sala, disurat do di Bibel aha na tinaon ni Jesus ala pasahathon barita i.” Sian na so pamotoan ni jaksa i, dipatudos ibana Jesus tu Sitindangi Ni Jahowa jala negara tu halak na marsogo ni roha tu Jesus. Tanggal 20 Mei 1940, monang ma Sitindangi di Mahkamah Agung i.

¹⁰ Boasa ringkot putusan ni Mahkamah i? Putusan na binahen ni Mahkamah Agung paloashon jala mangalinggomi hak ni sasahalak maragama. Alani i, negara federal, negara bagian, manang pamarenta daerah ndang marhak mangorai sasahalak mangulahon agamana. Dung i muse diida Mahkamah do molo na niulahon ni si Jesse ”ndang . . . tutu mambahen hagunturon”. Alani i, surat putusan ni Mahkamah paboahon molo ulaon ni Sitindangi Ni Jahowa ndang mambahen hagunturon. Aha do laba ni i tu hita? Sahalak Sitindangi na gabe pengacara mandok, ”Ndang diorai be hita mandalanhon agamanta sandiri jala ndang mabiar be hita marbarita di ingananta be.”

11. Songon dia do angka donganta di Kanada mambahen kampanye jala boasa?

¹¹ Taon 1940-an, Sitindangi Ni Jahowa di Kanada marsitaonon alani haporseaon. Taon 1946, dibahen angka donganta ma kampanye mambagihon risalah marjudul, ”Sogo ni Roha ni Quebec tu Debata dohot tu Kristus Parohon Hailaon di Kanada” (Quebec’s Burning Hate for God and Christ and Freedom Is the Shame of All Canada). Kampanye on paboahon molo hak ni sasahalak laho maragama tarambat dibahen Negara. Di risalah siopat alaman on, dipaboa sitaonon ni Sitindangi Ni Jahowa di provinsi Quebec alani pamimpin gareja, polisi dohot godang halak na marsogo ni roha. Dipaboa muse, ”Ditangkup do Sitindangi Ni Jahowa nang pe ndang adong sala ni nasida. Hirahira 800 ma tuduhan dibahen tu Sitindangi di Greater Montreal.”

12. (a) Songon dia do pangkilalaan ni musu ni hasintongan alani kampanye risalah i? (b) Aha do ulaon na sala na ditujuhon tu angka donganta? (Ida ma surat na di toru.)

¹² Perdana Menteri Quebec, si Maurice Duplessis na maraleale dohot Kardinal Katolik Roma Villeneuve muruk alani risalah i. Didok ibana ma, ”porang mangalo” Sitindangi Ni Jahowa. Lam tamba ma tuduhan dibahen tu Sitindangi, sian 800 gabe 1.600 tuduhan. Donganta borua, sahalak perintis mandok, ”Alani jotjotna, ndang diingot hami be piga hali hami ditangkup polisi.” Sitindangi na mambagihon risalah ditangkup jala ditudu ”mamolamola marhite sijahaon”. b

13. Ise do na parjolo ditudu mamolamola, jala aha do didok pengadilan?

 ¹³ Taon 1947, na parjolo ditudu mamolamola, i ma donganta si Aimé Boucher rap dohot dua boruna si Gisèle na marumur 18 taon, dohot si Lucille na marumur 11 taon. Didok songon i, ala dibagihon nasida risalah na marjudul ”Sogo ni Roha ni Quebec” di inganan na jonok tu parladangan ni nasida, di sabola selatan Quebec City. Ndang sihaporseaan halak na mandok keluarga ni si Boucher pamolamola. Burju jala martani do karejona, jala ndang sadia bidang ladangna. Sipata, laho do ibana tu kota mamangke kareta hoda. Alai, marsitaonon do nasida alani haporseaon songon naung dipaboa di risalah i. Hakim di pengadilan ndang olo manangihon hatorangan i, ala sogo do roha ni ibana tu Sitindangi Ni Jahowa. Dihaporseai ibana do hata ni jaksa molo risalah i mamolamola, didok ma keluarga ni si Boucher marsala. Na nidok ni hakim i: Hajahaton do paboahon hasintongan! Didok ma si Aimé dohot si Gisèle marsala ala mambagihon risalah i. Nang pe poso dope si Lucille, alai dipenjarahon do ibana saleleng dua ari. Naik banding ma donganta tu Mahkamah Agung di Kanada. Jala rade do Mahkamah i mamareso parsoalan i.

14. Songon dia do angka donganta di Quebec mangadopi hasusaan alani haporseaon ni nasida?

¹⁴ Di tingki i, tongtong do angka donganta marbarita di Quebec nang pe marsitaonon alani haporseaon. Jala, godang do pangkorhon ni habengeton ni nasida. Dung opat taon dibagihon risalah i, tamba do godang ni Sitindangi Ni Jahowa, sian 300 gabe 1.000 penyiar! c

15, 16. (a) Aha do putusan ni Mahkamah Agung di Kanada taringot tu parsoalan na masa tu keluarga ni si Boucher? (b) Aha do pangkorhon ni hamonangan on tu angka donganta dohot tu na asing?

¹⁵ Bulan Juni 1950, dipareso sia halak hakim di Mahkamah Agung Kanada ma parsoalan ni si Aimé Boucher. Tanggal 18 Desember 1950, dibahen Mahkamah ma surat putusan na pamonangkon Sitindangi. Boasa boi songon i? Donganta si Glen How paboahon molo Mahkamah i satolop tu na nidok ni pembela molo ”mamolamola”, i ma mambahen guntur manang mangalo pamarenta. Hatorangan di risalah i ”ndang na laho mamolamola. Isi ni risalah i hombar do tu undang-undang na paloashon sasahalak paboahon pandapotna”. Didok si How muse, ”Jahowa do na mangurupi naposoNa, gabe monang nasida.” d

¹⁶ Sada hamonangan na balga do tu Harajaon ni Debata surat putusan na binahen ni Mahkamah Agung i. Surat putusan i, pasaehon 122 tuduhan na asing na mandok molo Sitindangi di Quebec pamolamola. Asing ni i, surat putusan i mambahen sude warga ni Kanada dohot Persemakmuran boi paboahon pandapotna taringot tu ulaon ni pamarenta. Dung i muse, surat putusan ni Mahkamah on paujungkon paraloan ni Gareja dohot Negara na mangorai ulaon ni Sitindangi Ni Jahowa di Quebec. e

17. Songon dia do pigapiga pamarenta mangambati ulaonta marbarita na uli?

¹⁷ Songon halak Kristen di abad na parjolo, naposo ni Jahowa ndang maniganigahon barita na uli. (Jaha 2 Korint 2:17.) Alai, adong do pamarenta na mambahen undang-undang perdagangan laho mangorai hita marbarita na uli. Taparrohahon ma parsoalan na masa tu Sitindangi Ni Jahowa na patuduhon molo nasida parbarita na uli, ndang partigatiga.

18, 19. Songon dia do pamarenta di Denmark mangambati ulaon marbarita?

¹⁸ Denmark. Tanggal 1 Oktober 1932, dibahen pamarenta ma undang-undang na mangorai sasahalak martigatiga buku molo ndang marsurat ijin. Alai ndang olo angka donganta mambahen ijin songon i. Tingki marbarita lima penyiar di Roskilde, kota na daona hirahira 30 kilometer di sabola barat ibukota ni Denmark, Kopenhagen, donganta si August Lehmann ndang tarida. Ibana ditangkup ala ditudu martigatiga ndang mamangke surat ijin.

¹⁹ Tanggal 19 Desember 1932, diboan ma si August Lehmann tu pengadilan. Diparhatutu ibana do na dibagihon sijahaon taringot tu isi ni Bibel, alai ndang olo ibana didok partigatiga. Setuju do pengadilan tu hata ni donganta on. Didok ma, ”Terdakwa . . . boi do mambalanjoi dirina sandiri jala [ibana] ndang mandapot hepeng sian ulaonna i, gariada hepengna do dipangke tu ulaon on.” Pengadilan i paboahon ”ndang boi tardok na martigatiga” si Lehmann, alani i dipamonang ma Sitindangi. Alai tongtong do marsitutu musu ni naposo ni Debata laho mangorai ulaon marbarita di Denmark. (Ps. 94:20) Mangido banding do jaksa penuntut umum tu Mahkamah Agung. Alani i, aha do na diulahon angka donganta?

20. Aha do putusan ni Mahkamah Agung di Denmark, jala songon dia do pangkilalaan ni donganta?

²⁰ Saminggu andorang so dipareso Mahkamah Agung parsoalan i, marsitutu do sude Sitindangi di Denmark laho marbarita. Ari Selasa, 3 Oktober 1933, dipaboa ma surat putusan sian Mahkamah Agung. Dos do pandapot ni Mahkamah Agung dohot pengadilan na mandok molo ulaon ni si Lehmann ndang maralo tu undang-undang. Surat putusan on mambahen Sitindangi boi tongtong marbarita. Laho patuduhon las ni roha ni nasida ala nunga diurupi Jahowa, lam marsitutu ma nasida di ulaon marbarita. Dung dibahen surat putusan i, ndang diorai pamarenta be angka donganta marbarita di Denmark.

21, 22. Aha do putusan ni Mahkamah Agung AS tu parsoalan ni donganta si Murdock?

²¹ Amerika Serikat. Ari Minggu, 25 Februari 1940, ditangkup ma si Robert Murdock, Jr., sahalak perintis dohot pitu donganna ala marbarita di Jeannette kota na jonok tu Pittsburgh, negara bagian ni Pennsylvania. Ditudu ma nasida marsala ala mambagihon angka buku ndang  marsurat ijin. Naik banding ma nasida, jala dioloi Mahkamah Agung AS do laho mamareso parsoalan on.

²² Tanggal 3 Mei 1943, dibahen Mahkamah Agung ma surat putusan na pamonangkon Sitindangi. Ndang sapandapot Mahkamah Agung tu undang-undang ni pamarenta di Pennsylvania na mamaksa Sitindangi manuhor ijin laho mambagihon sijahaon ni nasida, jala ”maralo do i tu Undang-Undang Federal”. Disundati Mahkamah do undang-undang ni pamarenta Pennsylvania i ala ”mangambati hak ni sasahalak laho marpandapot dohot maragama”. Tingki paboahon pandapot ni Mahkamah, hakim William O. Douglas patorangkon molo ulaon ni Sitindangi Ni Jahowa ”ndang holan marbarita manang mambagihon buku na hombar tu agama. Dos do ringkot ni ulaon na dua on tu ulaon na diulahon di gareja manang tingki marjamita sian podium”.

23. Boasa ringkot di naposo ni Debata saonari on putusan na dibahen Mahkamah Agung taon 1943?

²³ Denggan do pangkorhon ni surat putusan ni Mahkamah Agung on tu Sitindangi, jala sada sejarah do i tu naposo ni Debata. Surat putusan i patuduhon molo hita parbarita na uli, ndang partigatiga. Taon 1943, adong 12 sian 13 parsoalan naung dipamonang Sitindangi di Mahkamah  Agung, dohot ma i parsoalan ni si Murdock. Angka putusan on, mangurupi Sitindangi mangadopi parsoalan na mangambati hakta marbarita di inganan na ribur dohot sian jabu tu jabu.

24. Songon dia do bahenonta molo diorai pamarenta ulaonta marbarita?

²⁴ Las do rohanta tingki diangkui pamarenta hakta laho marbarita na uli. Alai molo diorai pamarenta do ulaonta marbarita, marsitutu do hita pahombarhon caranta marbarita na uli asa boi tongtong mangulahon ulaon i, songon angka apostel na mandok, ”Ingkon oloan do iba di Debata asa di jolma.” (Ul. 5:29; Mat. 28:19, 20) Laho do hita tu pengadilan asa dibatalhon parenta na mangorai ulaonta marbarita. Taparrohahon ma dua na masa.

25, 26. Boasa ingkon dibahen petisi manang surat tu Mahkamah Agung Nikaragua, jala aha do hasilna?

²⁵ Nikaragua. Tanggal 19 November 1952, laho ma misionaris dohot hamba cabang, si Donovan Munsterman tu Kantor Imigrasi di ibukota Managua. Disuru do nasida jumpang dohot Kapten Arnoldo García na gabe kepala ni kantor i. Didok kapten i ma tu si Donovan molo sude Sitindangi Ni Jahowa ”diorai mamaritahon doktrin dohot ulaon ni agama ni nasida”. Tingki disungkun si Donovan boasa songon i, didok Kapten García ma ndang adong ijin sian menteri ni negara tu Sitindangi laho marbarita, jala ditudu do nasida komunis. Ise do na mandok hita songon i? Angka pamimpin agama Katolik ni Rom.

²⁶ Nang pe naik banding donganta si Munsterman tu Kementerian Negara dan Agama dohot tu Presiden Anastasio Somoza García, alai tongtong do diorai ulaonta marbarita.  Alani na masa i, marsitutu ma angka donganta pahombarhon cara laho marbarita. Ndang dipangke nasida be Bale Harajaon, alai dibahen nasida ma parpunguan na metmet, jala ndang marbarita be nasida di inganan na ribur. Nang pe songon i, tongtong do nasida marsitutu marbarita na uli. Dibahen nasida do muse petisi manang surat tu Mahkamah Agung Nikaragua asa dibatalhon pelarangan i. Dipabinsar do di koran surat pelarangan dohot petisi i, jala rade do Mahkamah Agung mamareso parsoalan i. Aha do hasilna? Tanggal 19 Juni 1953, dibahen Mahkamah Agung ma surat putusan na pamonangkon Sitindangi Ni Jahowa. Diida Mahkamah i do molo pelarangan i, ndang hombar tu undang-undang na paloashon sasahalak paboahon pandapotna, panggora ni roha jala mangulahon haporseaonna. Dung i, diurupi Mahkamah i do asa mardame pamarenta tu Sitindangi Ni Jahowa.

27. Boasa songgot roha ni halak Nikaragua mamboto putusan ni Mahkamah, jala songon dia do pangkilalaan ni angka donganta?

²⁷ Songgot do roha ni halak di Nikaragua ala dipaloas Mahkamah Agung ulaon ni Sitindangi. Andorang so i, sai dioloi Mahkamah do hata ni pamimpin agama dohot pamarenta, ala balga do huaso ni nasida. Pos do roha ni angka donganta boi monang ala diurupi Jesus, jala ala hiras do roha ni nasida marbarita na uli.​—Ul. 1:8.

28, 29. Aha do na masa tu Sitindangi di parsitongaan ni taon 1980-an di Zaire?

²⁸ Zaire. Parsitongaan ni taon 1980-an, adong hirahira 35.000 Sitindangi di Zaire, saonari digoari Republik Demokratik Kongo. Asa boi mangaradoti ulaon Harajaon, dipajongjong kantor cabang ma inganan parpunguan na baru. Bulan Desember 1985, dipatupa ma kebaktian internasional di ibukota Kinshasa. Adong 32.000 na ro sian negara na asing. Alai ndang sadia leleng, muba ma na masa tu Sitindangi. Aha do na masa?

²⁹ Tingki i, si Marcel Filteau, misionaris sian Quebec, Kanada, marhobas di Zaire. Ibana hea marsitaonon alani haporseaon di masa ni rezim Duplessis. Ibana mandok, ”Tanggal 12 Maret 1986, dijalo donganta ma surat na paboahon nunga diorai ulaon ni Sitindangi Ni Jahowa.” Surat pelarangan on ditandatangani presiden ni negara i, si Mobutu Sese Seko.

30. Aha do na ingkon ditontuhon Panitia Cabang, jala aha do na dipillit nasida?

³⁰ Marsogotna i dipaboa ma di radio nasional, ”Ndang idaonta be Sitindangi Ni Jahowa di [Zaire].” Godang ma hasusaan na ro. Disegai ma Bale Harajaon, dibalbali ma angka donganta, dirampok, diculik jala dipenjarahon. Dohot do muse angka dakdanak dipenjarahon. Tanggal 12 Oktober 1988, disita pamarenta ma aset ni organisasinta. Pasukan Keamanan ma na mangingani angka bangunan na pinajongjong ni cabang. Naik banding do angka donganta tu  Presiden Mobutu, alai ndang dianturehon. Tingki i, ingkon pilliton ni Panitia Cabang ma na laho ulahonon ni nasida, ”naik banding do nasida tu Mahkamah Agung manang ingkon paimaon ni nasida dope”? Si Timothy Holmes, sahalak misionaris dohot koordinator ni Panitia Cabang mandok, ”Dipangido hami do bisuk dohot panogunoguon sian Jahowa.” Dung manat dipingkirhon, ditontuhon panitia cabang ma ndang tingkina dope naik banding. Alai, marsitutu do nasida mamparrohahon angka donganta jala mangalului cara asa boi tongtong marbarita na uli.

31, 32. Aha do putusan na binahen ni Mahkamah Agung, jala aha do pangkorhonna tu angka donganta?

³¹ Dung pigapiga taon, moru ma hasusaan i. Lam diargai ma hak asasi manusia di negara i. Panitia Cabang mangkilala on ma tingki na denggan naik banding tu Mahkamah Agung Zaire. Dioloi Mahkamah Agung do mamareso parsoalan i. Tanggal 8 Januari 1993, hirahira pitu taon dung diorai presiden ulaon ni Sitindangi, dicabut ma pelarangan i ala diida Mahkamah Agung molo na binahen ni pamarenta ndang hombar tu uhum ni negara i. Nang pe on boi parohon hasusaan tu nasida, alai disundati nasida do putusan naung binahen ni presiden i! Donganta si Holmes mandok, ”Saleleng di pengadilan, diida hami do songon dia Jahowa boi mambahen manang aha pe hombar tu lomo ni rohaNa.” (Dan. 2:21) Putusan on patoguhon haporseaon ni angka donganta. Dihilala do panogunoguon ni Raja i, gabe diboto nasida ma andigan tingki na denggan jala songon dia laho mampartahanhon hak ni nasida.

 ³² Ala ndang diorai be ulaon ni Sitindangi, boi ma diurus kantor cabang ijin ni misionaris, pajongjongkon inganan na baru, dohot mandapot lektur. f Marlas ni roha do naposo ni Debata di liat portibi on mangida songon dia Jahowa manarihon partondion ni naposoNa!​—Jes. 52:10.

33. Aha do na boi taparsiajari sian parsoalan na masa di pengadilan?

³³ Digohi do hata ni Jesus na mandok, ”Ahu mangalehon tu hamu soara dohot habisuhon, na so bolas [tolap] aloon nang alusan ni angka musumuna.” (Jaha Lukas 21:12-15.) Boi do pangkeon ni Jahowa sasahalak songon si Gamaliel mangondingi naposoNa, manang mangonjar roha ni angka hakim dohot pengacara mangkatindangkon hatigoran. Dipatudu Jahowa do na so adong sinjata na tolap mangalo Ibana. (Jaha Jesaya 54:17.) Ndang adong na boi mangambati saut sangkap ni Debata.

34. Boasa longang rohanta tingki dipamonang pamarenta ulaonta, jala aha do na pinatudu ni on? (Ida ma kotak ” Parkaro na Dipamonang di Mahkamah Agung Mambahen Lam Maju Ulaon Marbarita”.)

³⁴ Boasa longang rohanta tingki dipamonang pamarenta ulaonta? Pingkirhon ma: Ndang adong kedudukan ni Sitindangi Ni Jahowa di pamarentaon. Ndang dohot pemilu, ndang marpolitik, jala ndang mamihak tu angka politikus. Somalna, angka donganta na diboan tu pengadilan didok do halak ”na so sijama surat jala na so marsiajar”. (Ul 4:13) Alani i, longang do rohanta mangida pengadilan na paloashon ulaonta, jala nasida ndang olo mangihuthon hata ni pamimpin agama dohot politik, na mangkorhon tu ulaon ni nasida. Jala jotjot do on masa! Angka hamonangan na sian pengadilan patuduhon sude ulaonta on masa ”di adopan ni Debata, di bagasan Kristus”. (2 Kor. 2:17) Songon apostel Paulus, las ma rohanta mandok, ’Jahowa do pangurupi di ahu, ndang mabiar ahu.’​—Heb. 13:6.