1, 2. Gombarhon ma pardalanan ni si Maria, jala boasa borat dihilala ibana pardalanan i?

HUHUT mardalan, ditogu si Josep ma halode na hinundulan ni si Maria. Nunga parsadarian nasida di pardalanan. Alani i, jotjot do sai dipadenggan si Maria parhundulna, ala nunga loja ibana. Sipata dihilala ibana do adong na manggunjal di bortianna.

² Nunga jonok tingki ni si Maria laho mangintubu. (Luk. 2:5, 6) Tingki dibolus nasida angka ladang, olo do ra longang jala sungkunsungkun roha ni angka parladang i, boasa sahalak ina na laho mangintubu adong di inganan sisongon i, jala dao sian hutana. Aha do na mambahen si Maria ingkon laho dao sian hutana di Nasaret?

3. Aha do ulaon na sumurung na jinalo ni si Maria jala aha do na taparsiajari sian i?

³ Masa i tu si Maria, alani ulaon na sumurung na jinalona sian Debata. Tubuhononna ma posoposo na gabe Messias, Anak ni Debata! (Luk. 1:35) Dung jonok tingki ni si Maria laho mangintubu, adong ma parenta na manuru nasida mulak tu Betlehem. Saleleng di pardalanan, godang do na masa na manguji haporseaon ni si Maria. Taida ma aha na mambahen ibana tongtong togu di partondion.

4, 5. (a) Boasa laho si Josep dohot si Maria tu Betlehem? (b) Aha do surirang na digohi alani parenta ni Kesar?

⁴ Tingki i, ndang holan si Josep dohot si Maria na mulak tu huta hatubuanna. Adong parenta sian Kesar Augustus, asa sude halak mulak tu hutana be pasurathon dirina. Aha do dibahen si Josep dung diboto parenta i? Bibel mandok, ”Borhat ma nang si Josep, na sian Galilea, sian Nasaret, nangkok tu luat Judea, tu huta ni si Daud, na margoar  Betlehem, ala sian pomparan jala marga ni si Daud ibana.”​—Luk. 2:1-4.

⁵ Parenta ni Kesar on manggohi surirang ni Bibel. Nunga salpu 700 taon dung disurirangkon taringot tu Messias na tubu di Betlehem. Hirahira 11 kilometer sian Nasaret, adong do kota na margoar Betlehem. Alai dipaboa di surirang i, Betlehem Eprata do huta hatubuan ni Messias. (Jaha Mika 5:1.) Asa sahat tu Betlehem Eprata, ingkon mardalan do nasida sian Nasaret hirahira 150 kilometer mamolus Samaria. Tu kota i ma si Josep dohot si Maria mulak, ala disi do hutanasida, i ma huta ni ompung ni nasida, Raja Daud.

6, 7. (a) Boasa borat dihilala si Maria pardalanan laho mulak tu Betlehem? (b) Ala nunga gabe tungganeboru ni si Josep, aha do pangkorhon ni i tu si Maria? (Ida surat na di toru.)

⁶ Rade do si Maria mangihuthon si Josep mangoloi parenta ni Kesar i? Ndang mura pardalanan i di ibana. Tingki i, jotjot do ro udan jala nunga jonok musim gugur. Huta Betlehem adong di inganan na timbo. Lobi sian 760 meter ma timbo ni inganan i. Tontu, loja do nasida nangkok tu huta i. Olo do leleng nasida sahat di Betlehem, ala ingkon maradi do nasida molo loja si Maria. Sasintongna, di tingki sisongon i, ndang boi be sahalak ina na laho mangintubu dao sian jabuna dohot  keluargana, asa boi hatop diurupi ibana molo naeng tubutubuan. Tangkas ma, dipatuduhon si Maria do habaranion.

⁷ Disurat si Lukas do taringot tu si Josep na borhat ”pasurathon dirina rap dohot si Maria”. (Luk. 2:4, 5) Ala nunga marhasohotan si Maria, ndang lomo ni rohana sandiri be ihuthononna, alai ingkon unduk do ibana tu si Josep na gabe ulu di rumatangga. Songon naung tinontuhon ni Debata, ingkon urupan ni si Maria do si Josep tarlumobi di ulaon partondion. * Alani i, tongtong do unduk si Maria tu tungganedolina, nang pe borat pardalanan i di ibana.

8. (a) Aha dope na mangonjar roha ni si Maria rade laho tu Betlehem? (b) Songon dia do si Maria gabe sitiruon tu naposo ni Debata?

⁸ Aha dope na mangonjar roha ni si Maria asa unduk tu si Josep? Naung diboto ibana hian do Betlehem i huta hatubuan ni Messias? Ndang dipaboa di Bibel taringot i. Alai di tingki ni si Maria, torop do halak naung mamboto taringot tu Messias, tarlumobi angka pamimpin agama. (Mat. 2:1-7;  Joh. 7:40-42) Dung i, bagas do pangantusion ni si Maria tu Hata ni Debata. (Luk. 1:46-55) Antong, boasa rade si Maria laho tu Betlehem? Na patuduhon unduk ni rohana do tu tungganedolina, tu pamarenta, dohot tu Jahowa? Aha pe na mangonjar rohana, sitiruon na denggan do on sian si Maria. Las do roha ni Jahowa mangida halak na serep marroha jala pangoloi. Saonari, godang do halak na so olo unduk tu aturan. Alani i, na binahen ni si Maria mangurupi naposo ni Debata manang didia pe.

9, 10. (a) Aha do na diingot si Maria dohot si Josep dung lam jonok nasida tu Betlehem? (b) Boasa gabe di bara ni birubiru si Josep dohot si Maria marborngin?

⁹ Tontu, las do roha ni si Maria dung boi ditatap ibana huta Betlehem. Huhut dinangkohi nasida dolok i, mamolus ladang jetun na laho dipanen parpudi sahali, ra gabe diingot si Maria dohot si Josep do tingki dakdanak nasida di Betlehem. Metmet do huta Betlehem martimbangkon angka huta di Juda. Jala dison do tubu si Boas, si Naomi dohot si Daud lobi sian saribu taon andorang so i.

¹⁰ Dung sahat si Maria dohot si Josep di Betlehem, ndang dapot ni nasida be inganan laho marborngin, ala nunga godang halak na parjolo sahat tu huta i. * Ujungna, laho ma nasida tu bara ni birubiru. Tapingkirhon ma pangkilalaan ni si Josep di tingki i. Nunga lam jonok tingki ni si Maria mangintubu, alai ingkon di inganan sisongon i ma ibana manubuhon anakna.

11. (a) Boasa boi diantusi angka borua pangkilalaan ni si Maria? (b) Boasa Jesus boi didok anak ’buhabaju’?

¹¹ Tarlumobi angka borua, tontu diantusi do pangkilalaan ni si Maria. Nunga dipaboa Jahowa hian tu si Hawa, na hansit taononna manubuhon anakkonna. (1 Mus. 3:16) Tontu, songon i do dihilala si Maria. Tutu, ndang adong disurat si Lukas pangkilalaan ni si Maria tingki manubuhon anakna i. Na dipaboa tu hita, ”ditubuhon ma anak buhabajuna”. (Luk. 2:7) Anakna i ma ’buhabaju’ sian pitu halak anak na tinubuhonna. (Mrk. 6:3) Alai, asing do anakna on sian na asing. Ibana ndang holan buhabaju ni si Maria, alai ibana do muse ”na  parjolo tubu sian nasa na tinompa” ni Jahowa, jala Anak ni Debata!​—Kol. 1:15.

12. Didia do dipeakkon posoposo i, jala songon dia do sasintongna inganan i?

¹² Dipatorang do muse di Bibel, dung ditubuhon si Maria posoposo i ”diborhos ma, dipeakkon ma tu bagasan panggagatan”. (Luk. 2:7) Sasintongna, panggagatan i, inganan na kotor. Ndang songon inganan na adong di drama dohot di gombar na jotjot dipatuduhon tingki ari Natal. Songon na taboto, ndang adong bara ni birubiru na ias, alai di inganan sisongon i do si Maria dohot si Josep marborngin. Dung i, di panggagatan do dipeakkon posoposona i. Tontu, ndang adong natuatua na lomo rohana mamillit inganan sisongon i tu ianakhonna. Tarlumobi si Josep dohot si Maria, dihalomohon nasida do asa paradehon inganan na dumenggan tu Anak ni Debata!

13. (a) Songon dia do dibahen si Josep dohot si Maria tu posoposo i? (b) Songon dia do angka natuatua boi maniru si Josep dohot si Maria?

¹³ Alai ndang gabe mandele si Josep dohot si Maria alani na masa i. Marsitutu do nasida mambahen na dumenggan. Diradoti si Maria do posoposo i, dibungkus dohot lampin, jala dipeakkon tu panggagatan asa unang ngalian. Nang pe marsak rohanasida tingki i, alai diboto nasida do na rumingkot, i ma manggohi na ringkot di partondion ni posoposo i. (Jaha 5 Musa 6:6-8.) Saonari, ringkot do angka natuatua asa sai manjumolohon na ringkot di partondion ni ianakhon nasida.

14, 15. (a) Boasa pintor ro angka parmahan i mangida posoposo i? (b) Aha do diulahon parmahan i dung diida nasida posoposo i?

¹⁴ Di borngin i, songgot do roha ni si Maria dohot si Josep mangida angka parmahan na ro mandapothon nasida tu bara i. Ro parmahan i laho mangida posoposo na baru tubu i. Dipaboa nasida do muse na masa di adaran. Tingki rap angka parmahan i dohot birubirunasida di adaran, diida nasida ma surusuruan ni Debata. * Dipaboa surusuruan i, naung tubu Messias manang Kristus di Betlehem, jala peak do posoposo i  di panggagatan, dibungkus dohot lampin. Dung i tompu ma muse diida nasida torop angka surusuruan marende mamuji Debata!​—Luk. 2:8-14.

¹⁵ Alani i, ndang pola longang roha ala pintor hatop ro angka parmahan na marserep ni roha i tu Betlehem! Dung sahat di Betlehem, tontu las do roha ni nasida tingki mangida posoposo i peak di panggagatan, dos songon na pinaboa ni surusuruan i. Alani las ni roha nasida, ’dibaritahon nasida ma boaboa i. Jadi sude na umbegesa, longang be do siala na hinatahon ni angka parmahan i tu nasida’. (Luk. 2:17, 18) Di tingki i, lea do roha ni angka pamimpin agama mangida angka parmahan. Alai, arga do di Jahowa angka baoa na serep marroha jala na marhaporseaon i. Songon dia do pangkilalaan ni si Maria ala ro angka parmahan i?

16. Aha do na diboto si Maria jala na patoguhon haporseaonna?

¹⁶ Gale dope dihilala si Maria ala baru tubutubuan ibana. Nang pe songon i, rade do ibana manangihon angka parmahan i. Didok do muse di Bibel, ”Ia si Maria, dipeop do hata i sudena jala dipahusorhusor di bagasan rohana.” (Luk. 2:19) Pos do roha ni si Maria, Jahowa do na manuru surusuruan i laho patoguhon rohana molo posoposo i Anak ni Debata sandiri. Alani i, ndang holan ditangihon ibana hata i, alai huhut do dirimangi jala disimpan di bagasan rohana. On ma na mangurupi si Maria tongtong marhaporseaon.​—Jaha Heber 11:1.

17. Songon dia do hita boi maniru si Maria?

¹⁷ Olo do hamu maniru haporseaon ni si Maria? Dipaboa Debata do tu hita hasintongan marhite Bibel. Alai, asa lam godang taboto hasintongan i, ingkon ringgas do hita marsiajar Bibel. Alani i, tajaha ma Bibel ganup ari, jala tapatuduhon ma molo Bibel buku na sinihathon ni Debata, na imbar sian na asing. (2 Tim. 3:16) Dung i, songon si Maria porlu do tapahusorhusor di rohanta hasintongan i. Molo tarimangi jala tapingkirhon do hasintongan na sian Bibel, on boi mangurupi hita margogo mangulahon lomo ni roha ni Debata. Haporseaonta pe boi ma lam togu.

18. (a) Songon dia do si Maria dohot si Josep patuduhon na unduk tu Patik ni si Musa? (b) Aha do na pinatuduhon ni peleannasida?

¹⁸ Ari paualuhon, diboan si Maria dohot si Josep ma posoposo i asa disunat songon na didok di Patik ni si Musa. Dibahen ma goarna Jesus. (Luk. 1:31) Dung di ari paopatpuluhon, diboan nasida ma muse posoposo i tu bagas joro di Jerusalem laho mangalehon pelean pangiasan (pentahiran). Dipasahat nasida ma dua anduhur dohot dua darapati, hombar tu Patik naung ditontuhon laho lehonon ni halak na pogos. Ndang holsoan si Josep dohot si Maria ala ndang boi dipelehon nasida birubiru tunggal dohot anduhur, songon na somal binahen ni natuatua di Israel. Na tangkas, dipatogu do rohanasida ala ro tu bagas joro i.​—Luk. 2:21-24.

19. (a) Aha do didok si Simeon tu si Maria taringot tu dakdanak i? (b) Aha do na diulahon si Hanna dung diida ibana Jesus?

¹⁹ Tingki di bagas joro nasida, ro ma si Simeon sahalak baoa naung matua. Nunga dijanjihon Jahowa marhite tondiNa tu si Simeon, na laho idaonna Messias dohot Sipalua na disurirangkon i andorang so mate ibana. Dipaboa si Simeon ma muse tu si Maria taringot tu sitaononna alani anakna i, na dipatudos songon podang na tajom na manorusi ateate. (Luk. 2:25-35)  Nang pe hasusaan na pinaboa ni si Simeon, alai on mangurupi si Maria sabar manaon hasusaan na masa hirahira 33 taon dungkon i. Ro ma muse si Hanna, sahalak panurirang borua na mamaritahon taringot tu dakdanak i tu halak na maimaima haluaon ni Jerusalem.​—Jaha Lukas 2:36-38.

20. Boasa denggan na binahen ni si Josep dohot si Maria mamboan Jesus tu bagas joro?

²⁰ Denggan do na binahen ni si Josep dohot si Maria tingki diboan nasida posoposo i tu bagas joro di Jerusalem! Marhite i, diajari si Josep dohot si Maria ma anakna i, asa sai ro tu bagas joro ni Jahowa. Marsitutu do nasida mangido tudutudu dohot pangurupion laho patoguhon haporseaon ni nasida. Tontu, lam togu do roha ni si Maria dung mulak nasida sian bagas joro i. Gok do arta di partondion na dapot ni ibana, sirimanganna, dohot sipaboaonna tu na asing.

21. Songon si Maria, songon dia do hita patoguhon haporseaonta?

²¹ Molo diihuthon angka natuatua sitiruon sian si Josep dohot si Maria, on parohon laba tu nasida. Somal do natuatua ni Sitindangi Ni Jahowa mamboan ianakhonnasida tu parpunguan. Marsitutu do nasida patoguhon dongan na asing di huria. Dapot nasida do las ni roha, ala ro tu parpunguan. Tontu, las do rohanta marsaor rap dohot nasida! Molo taulahon on, boi ma lam togu haporseaonta songon si Maria.