1, 2. Boasa ingkon tapatogu haporseaonta sian saonari? Bahen ma gombaranna.

HAPORSEAON, i ma hata na patuduhon parange manang pangalaho na denggan. Tingki tabege hata on, ringkot tapingkirhon hata na asing na hombar tusi, i ma ”Hatop!” Molo ndang marhaporseaon dope hita, hatop do talului cara asa marhaporseaon hita. Molo nunga marhaporseaon, tajaga jala taondingi ma. Boasa?

² Pingkirhon ma tingki mardalan hamu di padang pasir. Ringkot do di hamu aek. Tingki jumpangmu, porlu ondinganmu aek i sian mata ni ari, asa unang marsik jala porlu hatop isionmu inganan ni aekmuna, asa adong bohalmuna sahat tu inganan na dituju. Saonari, hita mangolu di padang pasir partondion, i ma godang halak ndang patuduhon haporseaon tu Debata. Molo ndang tajaga, boi do hatop mago haporseaonta. Ndang boi hita mangolu molo so adong aek. Songon i ma, ndang mangolu partondionta molo ndang adong haporseaon.​—Rom 1:17.

3. Aha do diparade Jahowa patoguhon haporseaonta, jala aha do na ringkot taingot?

³ Diboto Jahowa do na tahaporluhon haporseaon. Diboto Ibana do muse na maol tajaga haporseaonta. Alani i, diparade Jahowa do sitiruon tu hita. Songon na sinurat ni apostel Paulus, ”Tiru hamu ma angka sitean bagabaga i, marhitehite haporseaon dohot lambas ni roha!” (Heb. 6:12) Laos i do umbahen na dijujui organisasi hita asa marsitutu maniru angka halak na marhaporseaon, na disurat di Bibel. Alani i, aha do na ingkon taulahon? Adong dua: (1) Ringkot ingkon sai tapatogu haporseaonta; (2) ringkot asa sai tajaga pangkirimonta.

4. Boasa didok Sibolis do musu ni haporseaon, jala boi do taalo ibana?

⁴ Tongtong ma patogu haporseaonmuna. Adong do musu na boi manegai haporseaon, i ma Sibolis. Dibahen Sibolis do portibi on songon padang pasir, laho manegai haporseaonta. Gumogo do Sibolis sian hita. Boi do hita tongtong patoguhon haporseaonta saonari? Boi! Jahowa do na mangurupi sude halak na marhaporseaon. Diurupi do hita asa boi mangalo Sibolis! (Jak. 4:7) Na taalo do Sibolis molo tapangke tingkinta ganup ari patoguhon haporseaonta. Songon dia carana?

5. Songon dia do angka baoa dohot borua na disurat di Bibel boi marhaporseaon? Patorang ma.

 ⁵ Songon na taparsiajari, ndang sian mulai tubu angka baoa dohot borua na disurat di Bibel i marhaporseaon. Alai, na masa tu nasida patuduhon, diurupi tondi ni Jahowa do nasida asa marhaporseaon. (Gal. 5:22, 23) Martangiang do nasida mangido pangurupion ni Jahowa. Ujungna, dipatogu Jahowa ma haporseaonnasida. Alani i pos ma rohanta, lehonon ni Jahowa do tondiNa tu halak na mangido jala na mangulahon lomo ni rohaNa. (Luk. 11:13) Adong dope na boi ulahononta?

6. Tingki taparsiajari taringot tu halak na marhaporseaon, songon dia do i asa boi marlaba tu hita?

⁶ Asing ni na dipaboa di buku on, godang dope halak na marhaporseaon na boi gabe sitiruonta! (Jaha Heber 11:32.) Marragam parange na denggan na pinatuduhon ni nasida. Alani i, marsitutu ma hita marsiajar sian haporseaon ni nasida tingki manjaha Bibel. Ndang sae patoguhon haporseaonta molo holan manjaha sambing taringot tu haporseaonnasida. Asa tadapot laba sian na tajaha, talehon ma tingki manulingkit aha na mambahen i disurat. Dung taboto na dos do pangkilalaan ni nasida tu pangkilalaanta, lam taronjar ma rohanta maniru haporseaonnasida. (Jak. 5:17) Taantusi ma pangkilalaan ni nasida tingki mangadopi hasusaan na tongtong taadopi saonari.

7-9. (a) Songon dia do pangkilalaan ni baoa dohot borua na marhaporseaon na disurat di Bibel molo nasida manomba Debata songon hita saonari? (b) Boasa ingkon tapatogu haporseaonta marhite parniulaon?

⁷ Marhite parniulaon, boi do tongtong tajaga haporseaonta. Didok di Bibel, ’Mate do haporseaon na so marulaon.’ (Jak. 2:26) Pingkirhon ma pangkilalaan ni halak na marhaporseaon i molo disuru nasida mangulahon ulaon na sinuru ni Jahowa tu hita saonari!

⁸ Umpamana, songon dia do molo dipaboa tu si Abraham, ndang dipangke be langgatan laho manomba Jahowa songon na binahenna najolo, alai di Bale Harajaon manang di Kebaktian nama ulaon i dibahen? Songon dia ma pangkilalaanna molo tapaboa di inganan i do angka janji na tinatapna ”sian na dao” dipatorang? (Jaha Heber 11:13.) Jala, songon dia do molo dipaboa tu si Elia ndang songon na niulahonna be cara laho marhobas tu Jahowa, umpamana mambunu angka panurirang Baal, alai marbarita na uli tu sude halak? Tontu, pos do rohanta na rade nasida mangulahon ulaon songon na taulahon saonari.

⁹ Tapatogu ma haporseaonta marhite parniulaon. Tatiru ma haporseaon ni baoa dohot borua na marhaporseaon i di parngoluonta. Songon na dipaboa di Pamungka ni  buku on, boi do tahilala nasida songon alealenta. Jala di ari na naeng ro, tutu ma nasida gabe alealenta.

10. Aha do las ni roha na tahilala di Paradeiso?

¹⁰ Jaga ma pangkirimonmuna. Marhite pangkirimon na sian Debata, boi do lam margogo baoa dohot borua na marhaporseaon i manomba Jahowa. Songon dia do hamu? Umpamana, pingkirhon ma las ni rohamu tingki pajumpang dohot angka na marhaporseaon dung ”mulak mangolu sogot” nasida. (Jaha Ulaon ni Apostel 24:15.) Aha do na laho sisungkunonmu tu nasida?

11, 12. Di paradeiso, aha do sisungkunonmuna tu (a) si Abel? (b) si Noak? (c) si Abraham? (d) si Rut? (e)  si Abigail? (f) si Ester?

¹¹ Molo pajumpang dohot si Abel, olo do hamu manungkun songon dia rupa ni natuatuana? Manang, sungkunonmu do ra, ”Hea do ho mangkatai dohot kerubim na manjaga porlak Eden i? Dialusi nasida do ho?” Molo pajumpang dohot si Noak, sungkunonmu do ra, ”Mabiar do ho mangida jolma raksasa i? Songon dia do dibahen ho manarihon angka binatang di parau i?” Molo pajumpang dohot si Abraham, sungkunonmu do ra, ”Hea do ho pajumpang dohot si Sem? Ise do mangajari ho taringot tu Jahowa? Maol do dihilala ho manadingkon Ur?”

¹² Pingkirhon ma muse angka sungkunsungkun na laho sidohononmu tu si Rut, ”Aha do na mambahen ho rade manomba Jahowa?” Tu si Abigail, ”Mabiar do ho paboahon tu si Nabal naung pajumpang dohot si Daud?” Tu si Ester, ”Aha do na masa tu ho dohot tu si Mordahai dungkon na masa tu hamu na dipaboa di Bibel?”

13. (a) Aha do hirahira na laho sungkunon ni halak na marhaporseaon naung dipahehe? (b) Songon dia do pangkilalaanmuna tingki pajumpang dohot angka baoa dohot borua na marhaporseaon i?

¹³ Godang do ra sungkunsungkun ni angka baoa dohot borua i tu hita. Tontu, las do rohanta paboahon tu nasida taringot tu hasusaan na masa di tingki parpudi, jala songon dia Jahowa mangurupi naposoNa di tingki i! Tontu, las do rohanasida mamboto na digohi Jahowa do sude janjiNa. Di tingki i, ndang loja be hita mamingkirhon taringot tu nasida, alai rap marsaor ma hita dohot halak na marhaporseaon i di Paradeiso! Alani i, marsitutu ma maniru haporseaon ni nasida, asa boi hita marlas ni roha rap dohot nasida salelengna!