1, 2. Haputusan aha do na taulahon tingki mamillit hiburan?

TINGKI naeng mangallang apel hamu, diida hamu ma adong saotik na busuk. Aha do ulahononmu? Boi do diallang sude dohot na busuk i, manang dibolongkon apel i. Alai, boi do bolongkonon na busuk i, dung i dipangan ma. Molo hamu mangulahon na songon dia?

² Boi ma tapatudos hiburan songon apel i. Sipata lomo do rohanta naeng rekreasi, alai taboto do godangan sian hiburan na adong saonari on ndang patuduhon parange na dihalomohon Debata. Antong aha ma ulahononmuna? Adong do halak na so mangkasogohon parange na roa dohot hiburan na so denggan na dipatudu ni portibi on. Na deba, olo do pasidingkon sude hiburan asa unang diida nasida angka parange na roa i. Na asing muse, lomo do rohana mangida hiburan, alani i manat ma nasida mamillit na laho siidaonna. Dia do pillitonmuna asa boi tongtong di bagasan holong ni Debata?

3. Aha do na laho taulas?

³ Godangan sian hita mamillit mangulahon na patoluhon. Taboto, ringkot do di hita rekreasi. Lomo do rohanta hiburan na tapillit patuduhon parange na denggan. Alani i, porlu ma tapingkirhon songon dia do  manontuhon hiburan na denggan dohot na roa. Parjolo sahali, taulas ma songon dia hiburan na tapillit mangkorhon tu panombaon na sintong.

4. Songon dia do janjinta tu Jahowa mangkorhon tu hiburan na tapillit?

⁴ Sahalak donganta na tardidi taon 1946 mandok, ”Ringkot do di ahu manangihon jamita pandidion di kebaktian, huparrohahon do denggan jala huhilala dohot do ahu na tardidi di tingki i.” Boasa? Ibana mandok, ”Molo sai niingot tongtong janji tu Jahowa, on mambahen hita boi marsihohot.” Sapandapot do hita tu hata ni donganta on. Molo sai taingot janjinta tu Jahowa, naung talehon dirinta laho manomba Ibana, gabe marsihohot ma hita. (Jaha Parjamita 5:4.) Molo sai tarimangi janjinta tu Jahowa, mangkorhon do on tu sude ulaonta. Ndang holan tu ulaon marbarita, alai dohot do tingki mamillit hiburan. Apostel Paulus paboahon ringkot ni hasintongan i tingki ditongos ibana surat tu huria di Korint, ”Na mangan manang na minum hamu, manang dia pe diula hamu: Bahen hamu ma saluhutna i, pasangaphon Debata.”​—1 Korint 10:31

5. Songon dia do 3 Musa 22:18-20 mangurupi hita mangantusi sipasingot di Rom 12:1?

 ⁵ Sude na taulahon di ngolunta on marpangkorhon do tu panombaon na sintong. Tangkas ma on dipaboa si Paulus tu angka dongan sahaporseaon marhite surat na ditongos tu huria Rom. Ibana mandok, ”Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha.” (Rom 12:1) Na adong di daging, i ma pingkiran, roha dohot gogo. Sude on, boi tapangke manomba Debata. (Markus 12:30) Didok si Paulus do on sada pelean tu Jahowa, molo sian nasa hosanta marhobas tu Ibana. Molo naeng mangalehon pelean, adong do na ingkon siingoton. Dipaboa do di patik ni si Musa, molo pelean na martihas ndang dihalomohon Debata. (3 Musa 22:18-20) Songon i ma sahat tu tingkinta on. Songon dia do on boi masa?

6, 7. Songon dia do sahalak Kristen boi mambahen martihas pamatangna jala aha do pangkorhonna?

⁶ Si Paulus mangalehon poda tu huria di Rom, ”Unang ma dosa i mangarajai di bagasan dagingmuna.” Disuru si Paulus do asa ”dipamate” parulaon ni pamatang nasida. (Rom 6:12-14; 8:13) Andorang so dipaboa on, dilehon do sada tudosan taringot ”parulaon ni pamatang”. Songon on ma parulaon ni pamatang ni jolma na mardosa, ”gok burabura . . . pamangannasida”. ”Hirtap do patnasida mandurushon mudar”. ”Ndang marhabiaran di Debata rohanasida”. (Rom 3:13-18) Sahalak Kristen mambahen pamatangna martihas molo dipangke ’angka ruas’ ni pamatangna mangulahon dosa. Umpamana, molo jotjot sahalak Kristen mangida pornografi manang film kekerasan, dos ma on naung ’pasahat [mata] tu dosa’. Alani i, nunga martihas be sude pamatangna. Aha pe na diulahon ibana, ndang  gabe pelean na badia be i jala ndang dihalomohon Debata. (5 Musa 15:21; 1 Petrus 1:14-16; 2 Petrus 3:11) Godang do harugian molo ndang tapillit hiburan na denggan!

⁷ Tangkas ma hiburan na tapillit godang do pangkorhonna. Alani i, tapillit ma hiburan na mambahen lam denggan peleanta tu Jahowa, unang ma mambahen martihas. Taulas ma songon dia manontuhon hiburan na denggan dohot na roa.

8, 9. (a) Aha do dua ragam ni hiburan? (b) Hiburan na dia do na ingkon tapasiding jala boasa?

⁸ Adong do dua ragam ni hiburan. Na parjolo, hiburan na tangkas ndang boi diihuthon halak Kristen. Na paduahon, hiburan na boi dijalo roha ni halak Kristen alai na deba ndang. Parjolo sahali, taulas ma hiburan na tangkas ndang boi diihuthon halak Kristen.

⁹ Songon naung dipaboa di Pasal 1, adong do hiburan na tangkas patuduhon parange na dihagigihon Debata. Umpamana, situs Web manang film, acara TV dohot musik na marisi hata na kasar, hadatuon dohot angka begu, pornografi dohot parange na rorang. Di bagasan hiburan sisongon on, diulahon do angka parange na maralo tu prinsip ni Bibel. Alani i, hiburan sisongon on ingkon dipasiding halak Kristen. (Ulaon ni Apostel 15:28, 29; 1 Korint 6:9, 10; Pangungkapon 21:8) Molo ndang taihuthon hiburan sisongon i, tarida ma molo hita marsitutu ’mangkagigihon aha na jat’ jala pasidingkon diri ”sian hajahaton”. Molo taulahon on, adong ma di hita ”haporseaon na so marlaok [ndang munafik]”, i ma haporseaon na dihalomohon Debata.​—Rom 12:9; Psalmen 34:14; 1 Timoteus 1:5.

10. Aha do pingkiran na sala taringot hiburan jala boasa?

 ¹⁰ Adong do na marpandapot, molo hiburan na patuduhon parange na roa ndang marpangkorhon tu diri ni sasahalak. Nasida mandok, ’Tutu do hutonton film sisongon i, alai ndang ulahononku i.’ Pingkiran sisongon on ndang denggan jala boi parohon jea. (Jaha Jeremia 17:9.) Molo lomo do rohanta manonton na dihagigihon Jahowa, tutu do hita ’mangkagigihon na jat’? Molo sai taihuthon hiburan na so denggan, on boi mambahen ndang mangkilala be panggora ni rohanta. (Psalmen 119:70; 1 Timoteus 4:1, 2) Parange sisongon on, boi mangkorhon tu ulaonta manang songon dia hita mangida dosa ni halak na asing.

11. Songon dia do Galatia 6:7 mangkorhon tu hiburan na tapillit?

¹¹ Tutu do on hea masa. Adong do halak Kristen mangulahon parange na roa ala somal ibana mangida hiburan na so denggan. Masa ma tu nasida ayat na mandok, ”Ia i disabur halak, i do gotilonna [tapuonna].” (Galatia 6:7) Alai, boi do ndang masa on tu hita. Molo manat hita mamillit hiburan, mamingkirhon parange na denggan, marlas ni roha ma hita di ngolunta.​—Ida ma kotak ” Hiburan na Songon dia do na Ingkon Tapillit?”.

12. Songon dia do Galatia 6:5 mangkorhon tu hiburan jala aha do na boi mangurupi hita mambahen haputusan?

¹² Saonari taulas ma na paduahon, hiburan na patuduhon parange na so tangkas diorai di Bibel. Tingki mamillit hiburan sisongon on, sahalak Kristen ingkon mambahen haputusan sandiri taringot on. (Jaha Galatia 6:5.) Alai, adong do na boi mangurupi hita mambahen haputusan on. Di Bibel, godang prinsip na boi mangurupi hita mangantusi pingkiran ni Jahowa  dohot lomo ni rohaNa. Molo taparrohahon do angka prinsip on, taantusi ma ”dia lomo ni roha ni [Jahowa]” di sude ulaonta dohot ma i mamillit hiburan.​—Epesus 5:17.

13. Aha do na manjujui hita pasidingkon hiburan na dihagigihon Jahowa?

¹³ Ndang dos pangantusion ni halak Kristen taringot mangulahon prinsip ni Bibel. (Pilippi 1:9) Asing ni i, marimbar do na dihalomohon ni sasahalak taringot  hiburan. Alani i, ndang hirim rohanta molo sude halak Kristen mambahen haputusan na sarupa taringot mamillit hiburan. Nang pe songon i, molo sai tabahen do prinsip ni Debata manogunogu pingkiran dohot rohanta, lam marsitutu ma hita pasidingkon hiburan na dihagigihon Jahowa.​—Psalmen 119:11, 129; 1 Petrus 2:16.

14. (a) Aha do na ringkot tapingkirhon tingki mamillit hiburan? (b) Songon dia do hita boi tongtong patujolohon Harajaon ni Debata?

¹⁴ Tingki mamillit hiburan, ringkot do tapingkirhon tingki na tapangke. Isi ni hiburan na tapillit patuduhon aha na denggan di hita, alai sadia godang tingki na tapangke laho mangulahon on, patuduhon aha na rumingkot di hita. Tangkas ma, ulaon di partondion do ulaon na rumingkot di halak Kristen. (Jaha Mateus 6:33.) Aha do na ingkon taulahon asa tongtong tapatujolo Harajaon ni Debata di ngolunta? Apostel Paulus mandok, ”Manat ma hamu mamereng manangkasi parulaonmuna; songon angka na marroha, unang ma songon angka na hurang roha! Parhaseang hamu ma tingki.” (Epesus 5:15, 16) Songon na didok ayat on, porlu do tapangke tingki sadenggandengganna. Lapatanna, tatontuhon ma sadia godang tingki na tapangke mangulahon hiburan on. Molo taulahon on, adong ma tingkinta mangulahon ulaon ”na rumingkot”, na mambahen lam denggan partondionta.​—Pilippi 1:10.

15. Boasa denggan mamboto hiburan na tapillit dihalomohon Debata manang ndang?

¹⁵ Ingkon tangkas do taboto molo hiburan na tapillit i dihalomohon Debata. Aha do lapatanna? Dipatudos ma on songon apel na adong busukna. Asa unang tarallang na busuk i, ndang holan na busukna i tabolongkon, alai dohot ma na di humaliangna. Dos  songon i ma, ingkon taboto do tangkas molo hiburan na tapillit i dihalomohon Debata. Sahalak Kristen na marbisuk ndang holan pasidingkon hiburan na tangkas diorai Bibel. Alai, dohot do pasidingkon hiburan na so tatanda tangkas isina, na tahilala boi manegai partondionta. (Poda 4:25-27) Boi ma taulahon on molo sai tapangasahon Hata ni Debata.

16. (a) Songon dia do hita patuduhon na sapingkiran hita dohot Jahowa taringot parange na denggan? (b) Songon dia do asa boi tongtong taulahon prinsip ni Bibel di ngolunta?

¹⁶ Tingki mamillit hiburan, na porjolo sahali diulahon halak Kristen, i ma mamingkirhon songon dia pingkiran ni Debata. Di Bibel, dipaboa do songon dia pangkilalaan dohot pingkiran ni Jahowa. Umpamana, dipaboa Raja Salomo do angka ulaon na dihasogohon Jahowa, ”dila pargabus; tangan na mamunu halak na burju, roha na sai mamingkiri na jahat, pat na ringgas laho mangulahon hajahaton”. (Poda 6:16-19, Bibel siganup ari.) Songon dia do pingkiran ni Jahowa mangkorhon tu pingkiranta? Panurat ni Psalmen mandok, ”Hamu ale angka na mangkaholongi Jahowa, sai hagigihon hamu ma na jat!” (Psalmen 97:10) Hiburan na tapillit ingkon patuduhon molo hita mangkagigihon aha na dihagigihon Jahowa. (Galatia 5:19-21) Taingot ma,  aha na taulahon tingki sahalakta, rumingkot do sian aha na taulahon tingki diida na torop. Sian i ma taboto hadirion na songon dia hita sasintongna. (Psalmen 11:4; 16:8) Molo naeng sapingkiran do hita dohot Jahowa taringot parange na denggan, aha na tapillit ingkon hombar do tu prinsip ni Bibel. Jala on ma na tongtong taulahon di ngolunta.​—2 Korint 3:18.

17. Aha do sungkunsungkun na porlu tarimangi tingki mamillit hiburan?

¹⁷ Tingki mamillit hiburan, aha do muse na taulahon asa haputusanta hombar tu pingkiran ni Jahowa? Rimangi ma sungkunsungkun on, ’Aha do pangkorhon ni hiburan on tu diringku dohot paralealeonku tu Jahowa?’ Umpamana, andorang so manonton sada film tasungkun ma dirinta, ’Aha do pangkorhon ni film on tu panggora ni rohangku?’ Taulas ma pigapiga prinsip na boi taulahon.

18, 19. (a) Songon dia do prinsip di Pilippi 4:8 mangurupi hita mamillit hiburan na denggan? (b) Paboa ma prinsip na asing na mangurupi hamu mamillit hiburan na denggan. (Ida ma surat na di toru.)

¹⁸ Sada prinsip na ringkot i ma di Pilippi 4:8 na mandok, ”Pingkiri hamu ma nasa parange na sintong, na daulat, na tigor, na bontor, na uli, na denggan begeon ro di sude na targoar haburjuon, na tau pujipujian.” Ndang hiburan na diulas ni si Paulus di ayat on, alai angka ulaon na porlu tarimangi do na pasonangkon roha ni Jahowa. (Psalmen 19:14) Nang pe songon i, denggan do hata ni si Paulus on taulahon tingki mamillit hiburan. Songon dia do on boi taulahon?

¹⁹ Tasungkun ma dirinta, ’Tutu do film, video game, musik dohot hiburan na asing na hupillit parohon pingkiran na ias?’ Umpamana, dung sae manonton sada film, aha do na ro tu pingkiranta? Molo las do  rohanta dung manonton film i, taboto ma na denggan do na tapillit. Alai, molo gabe na roa do tapingkiri dung manonton film i, ndang denggan hiburan na tapillit i. (Mateus 12:33; Markus 7:20-23) Boasa songon i? Molo tapingkiri angka parange na so denggan, ndang dame rohanta, ganggu ma panggora ni rohanta jala sega ma paralealeonta tu Debata. (Epesus 5:5; 1 Timoteus 1:5, 19) Ala mangkorhon na roa do hiburan na sala, marsitutu ma pasidingkon i. * (Rom 12:2) Tatiru ma tangiang ni panurat Psalmen na mandok, ”Ramoti ma ahu asa unang sai angka na so marguna i huparrohahon.”​—Psalmen 119:37, Bibel siganup ari.

20, 21. Songon dia do 1 Korint 10:23, 24 mampangkorhon tingki mamillit hiburan na denggan?

²⁰ Si Paulus paboahon sada prinsip na ringkot dipingkirhon tingki mambahen haputusan, na mangkorhon tu dirinta sandiri. Ibana mandok, ”Saluhutna jadi do, alai ndang saluhut marguna; saluhutna jadi do, alai ndang saluhut patoguhon. Unang ma masiringkoti na di ibana, na di dongan i ma.” (1 Korint 10:23, 24) Aha do pangkorhon ni prinsip on tingki mamillit hiburan na denggan? Tasungkun ma dirinta, ’Aha do pangkorhon ni hiburan na hupillit on tu na asing?’

²¹ Panggora ni roha boi do paloashon hita mangulahon hiburan na tahilala ”marguna” manang na tarjalo rohanta. Alai, molo adong diparrohahon hamu donganta na panggora ni rohana mangorai nasida mamillit hiburan i, denggan ma asa unang diulahon hamu hiburan i. Boasa? Ala ndang lomo rohamuna ”mardosa dompak angka dongan” marhite mangambati nasida  marsihohot tu Debata. Ulahon hamu ma hata on, ”Unang bahen hamu partuktuhan . . .  di huria ni Debata.” (1 Korint 8:12; 10:32) Halak Kristen saonari on, ingkon mardophon roha jala manat tingki mangulahon poda na dilehon si Paulus on, marhite pasidingkon hiburan na tahilala ”marguna” alai ndang ”patoguhon” partondion.​—Rom 14:1; 15:1.

22. Boasa halak Kristen ndang mamaksahon panggora ni rohana tu na asing?

²² Alai, adong dope na porlu taulahon asa boi mangargai donganta na asing. Molo panggora ni roha ni sahalak Kristen ndang paloashon ibana mangulahon sada hiburan, unang ma dipaksahon haputusanna i tu dongan na asing. Molo dipaksahon haputusanna i, dipatudos ma on songon sahalak supir na mamaksa na asing asa sarupa hatop ni nasida mamboan motor. Tontu ndang denggan parange sisongon on. Ala marparange holong do hita, molo panggora ni rohanta ndang paloashon mangulahon sada hiburan, ingkon taargai do haputusan ni dongan sahaporseaon, na so maralo tu prinsip ni Bibel. Molo taulahon on, na patuduhon roha na denggan ma hita tu saluhut halak.​—Pilippi 4:5; Parjamita 7:16.

23. Songon dia do hita mamillit hiburan na denggan?

²³ Songon dia do hita mamillit hiburan na denggan? Pasiding ma sude hiburan na patuduhon parange na so denggan, na tangkas diorai di Bibel. Ihuthon ma prinsip ni Bibel tingki mamillit hiburan na so tangkas diorai di Bibel. Pasiding ma hiburan na manggugai panggora ni rohanta. Rade ma hamu pasidingkon hiburan na boi manegai panggora ni roha ni dongan, tarlumobi dongan sahaporseaon. Anggiat ma haputusanmuna parohon sangap tu Debata jala mambahen hamu dohot keluargamuna tongtong di bagasan holong ni rohaNa.