1. Ise do na mangalehon hangoluan tu hita?

”DEBATA na mangolu” do Jahowa. (Jeremia 10:10) Ibana do Sitompa jala silehon hangoluan. Bibel mandok, ”Ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!” (Pangungkapon 4:11) Basabasa ni Jahowa do hangoluan.​—Jaha Psalmen 36:10.

2. Songon dia do asa boi denggan ngolunta?

² Dilehon Jahowa do na porlu tu hita, songon sipanganon dohot siinumon. (Ulaon ni Apostel 17:28) Jala, lomo rohaNa hita mangkilala hasonangan. (Ulaon ni Apostel 14:15-17) Alani i, ingkon taoloi do patik ni Jahowa asa denggan ngolunta.​—Jesaya 48:17, 18.

3. Aha do dibahen Jahowa tu si Kain ala dibunu ibana si Abel?

³ Dipaboa di Bibel, arga do di Jahowa hangoluanta dohot hangoluan ni donganta. Umpamana, tingki marrimas si Kain tu anggina si Abel, dipasingot Jahowa do ibana asa diorom murukna. Alai, ndang ditangihon ibana Jahowa. Alani murukna, ”hehe ma si Kain dompak si Abel anggina i, jala dibunu ibana”. (1 Musa 4:3-8) Ala dibunu si Kain anggina, diuhum ma ibana. (1 Musa 4:9-11) Rimas dohot sogo ni roha boi do mambahen hita gabe mangulahon hajahaton. Sasahalak na marparange sisongon i ndang mandapot hangoluan salelengna. (Jaha 1 Johannes 3:15.) Asa las roha ni Jahowa, ingkon tahaholongi do sude jolma.​—1 Johannes 3:11, 12.

4. Taringot hangoluan, aha do na taboto sian sada patik ni Debata?

 ⁴ Marratus taon dungkon i, dilehon Jahowa sampulu patik tu si Musa na patuduhon arga do di Ibana hangoluan. Sada sian patik i mandok, ”Unang ho mambunu.” (5 Musa 5:17) Molo sasahalak mambunu, ibana pe ingkon mate do.

5. Songon dia do pangkilalaan ni Debata mangida halak na manggugurhon?

⁵ Songon dia do pangkilalaan ni Debata mangida halak na manggugurhon? Arga do ngolu ni posoposo di Jahowa nang pe ndang tubu dope. Patik na nilehon ni Jahowa tu halak Israel mandok, molo adong na manombom sada ina na mardenggan pamatang gabe haguguran, ingkon dipamate do na manombom i. (Jaha 2 Musa 21:22, 23; Psalmen 127:3) Sian on boi taparsiajari, sala do manggugurhon.​—Ida Lampiran 28.

6, 7. Songon dia do hita maniru Jahowa patuduhon na taargai do hangoluan?

⁶ Songon dia do hita maniru Jahowa patuduhon na taargai do hangoluanta dohot hangoluan ni donganta? Unang ma taulahon ulaon na parohon mara tu ngolunta manang tu ngolu ni donganta. Alani i, unang ma marisap, mangallang pining manang mamangke narkoba. Alana, boi do i parohon sahit jala mambahen hita mate.

⁷ Sian Jahowa do pamatangta dohot ngolunta. Alani i, porlu denggan taradoti dagingta. Molo ndang taradoti, gabe ramun ma hita di adopan ni Debata. (Rom 6:19; 12:1; 2 Korint 7:1) Ndang boi hita manomba Jahowa silehon hangoluan molo ndang taargai hangoluan. Nang pe maol manadingkon hasomalan na so denggan, urupan ni Jahowa do hita molo marsitutu mangargai hangoluan.

8. Songon dia do bahenonta asa unang marmara ngolunta dohot ngolu ni donganta?

 ⁸ Nunga taparsiajari, silehonlehon na arga do hangoluan i. Diboto Jahowa do boi ulahononta na denggan asa unang parohon mara tu ngolunta dohot tu ngolu ni donganta. Songon tingki mamboan mobil, sepeda motor manang na asing. Tapasiding ma ulaon manang olahraga na parohon mara. (Psalmen 11:5) Denggan ma taparrohahon jabunta asa unang parohon mara. Diparentahon Jahowa tu halak Israel, ”Molo pajongjong bagas na imbaru ho, ingkon bahenonmu do handanghandang humaliang tarup ni bagasmu, asa unang ampehononmu utang mudar tu jabum, tung sura madabu halak sian i.”​—5 Musa 22:8.

9. Songon dia do bahenonta tu binatang?

⁹ Aha na tabahen tu binatang pe, ringkot do i di Jahowa. Diloas Ibana do hita maneat binatang laho allangon. Jala, boi do tapamate binatang molo parohon mara tu hita. (1 Musa 3:21; 9:3; 2 Musa 21:28) Alai, ndang boi hita pasingkorsingkorhon binatang manang pamatehon binatang holan laho marmeammeam.​—Poda 12:10.

10. Sian dia do taboto mudar manggombarhon hangoluan?

¹⁰ Mudar manggombarhon hangoluan. Alani i, badia do i di Jahowa. Dung dibunu si Kain anggina, didok Jahowa ma tu ibana, ”Joujou do mudar ni anggimi sian tano i, sahat tu Ahu.” (1 Musa 4:10, Bibel siganup ari) Mudar ni si Abel manggombarhon hangoluanna jala diuhum Jahowa do si Kain ala dibunu ibana si Abel. Dipatuduhon Jahowa do muse, mudar i manggombarhon hangoluan dungkon aek na sumar. Diloas Jahowa do si  Noak dohot keluargana mangallang jagal. Didok Ibana, ”Nasa na manggulmit, na mangolu bahen panganonmuna, sahat tu hamu ma i sudena hulehon, songon bulung rata.” Nang pe songon i, didok Jahowa muse tu nasida, ”Alai unang pangan hamu juhut molo di bagasan dope hosana, mandok mudarna.”​—1 Musa 1:29; 9:3, 4.

11. Aha do patik taringot mudar didok Jahowa tu halak Israel?

¹¹ Hirahira 800 taon dung dipaboa Jahowa tu si Noak na so boi mangallang mudar, didok muse, ”Manang ise sian halak Israel, nang sian halak dagang angka na maisolat di tongatongamuna, tung sura dapotsa diburu juhut harangan manang sada pidong na ganjing panganon, ingkon durushononna mudarna jala hungkupanna do i dohot tano.” Didok muse, ”Ndang jadi panganonmuna mudar.” (3 Musa 17:13, 14) Dipangido Jahowa dope asa diboto naposoNa, badia do mudar i. Boi do panganon nasida jagal, alai mudar ndang boi panganon nasida. Tingki maneat binatang, ingkon durushononna do mudarna tu tano.

12. Songon dia do pangantusion ni halak Kristen di abad na parjolo taringot mudar?

¹² Pigapiga taon dung mate Jesus, marpungu ma angka apostel dohot sintua ni huria di Jerusalem, laho manontuhon dia do sian patik na dilehon tu halak Israel na ingkon siihuthonon ni halak Kristen. (Jaha Ulaon ni Apostel 15:28, 29; 21:25.) Diurupi Jahowa do nasida mangantusi mudar i arga jala badia di Ibana. Ndang boi nasida mangallang mudar manang jagal na so diusehon dope mudarna. Molo diallang i, doshon na manomba ganaganaan manang na mangulahon parmainanon do nasida. Mulai sian i, sude halak Kristen ndang boi mangallang mudar. Songon dia do di tingkinta on? Dipangido Jahowa dope asa arga jala badia mudar i di hita.

13. Boasa halak Kristen ndang manjalo transfusi darah?

 ¹³ Boi do halak Kristen manjalo transfusi darah? Ndang. Diorai Jahowa do hita mangallang mudar. Molo diorai dokter hamu manginum alkohol, olo do hamu pamasukkon alkohol tu dagingmu marhite suntik? Tontu ndang! Songon i ma nang parenta unang mangallang mudar, dos do i lapatanna ndang boi hita manjalo transfusi darah.​—Ida Lampiran 29.

14, 15. Sadia ringkot do di halak Kristen mangargai hangoluan dohot mangoloi Jahowa?

¹⁴ Songon dia molo didok dokter mate do hita molo ndang manjalo transfusi darah? Hita sandiri do mamillit laho mangoloi parenta ni Jahowa manang na ndang. Ala arga do di halak Kristen hangoluan na sian Debata, luluan ni nasida do ubat na boi mambahen malum asing ni mudar.

¹⁵ Ala arga do hangoluan di Debata, aha pe taulahon do asa boi hita sehat. Alai, ndang olo hita manjalo transfusi darah. Rumingkot do mangoloi Jahowa nang pe ingkon mate unang apala mangolu, alai ndang mangoloi Ibana. Jesus mandok, ”Ai na naeng paluahon hosana, mangagohonsa do; alai na agoan hosa alani Ahu, i do na jumpangan.” (Mateus 16:25) Taoloi Jahowa, ala tahaholongi Ibana. Diboto Ibana do na dumenggan. Alani i, tatiru ma Debata na mangargai hangoluan.​—Heber 11:6.

16. Boasa pos roha ni naposo ni Debata laho mangoloi Ibana?

¹⁶ Marsitutu do naposo ni Debata mangoloi parentaNa taringot mudar. Ndang panganon ni nasida mudar jala ndang jaloon ni nasida transfusi darah. * Alai, asa boi  tongtong mangolu, jaloon nasida do ubat asing ni mudar. Pos do roha ni nasida, diboto Sipanompa hangoluan i do dia na dumenggan tu nasida. Pos do rohanta diboto Jahowa do na dumenggan tu hita?

17. Di tingki sadihari do diloas Jahowa pangkeon ni halak Israel mudar?

¹⁷ Didok Jahowa tu halak Israel marhite patik na nilehonNa tu si Musa, ”Ai hosa ni sibuk i di bagasan mudar do i, jala nunga pola Ahu mangalehoni di hamu di atas langgatan, asa bahen pardengganan di tondimuna, ai mudar i do mambahen pardengganan marhite sian tondi na di bagasan i.” (3 Musa 17:11) Molo mardosa halak Israel, boi do pangidoon nasida hasesaan ni dosa tu Jahowa marhite mamelehon binatang. Dung i, dipangido ma tu malim asa mangusehon deba mudar ni binatang i tu langgatan na adong di bagas joro ni Jahowa. Holan di tingki sisongon on do diloas Jahowa mudar pangkeon ni halak Israel.

18. Aha do pangkirimon tu hita alani tobusan ni Jesus?

¹⁸ Dung ro Jesus tu tano on, ibana manggantihon patik laho mamelehon binatang marhite mangalehon hangoluanna laho manesa dosa ni jolma. (Mateus 20:28; Heber 10:1) Mararga situtu do hangoluan ni Jesus dung dipahehe ibana tu surgo. Marhite i, dilehon Jahowa ma pangkirimon tu sude jolma asa mandapot hangoluan salelenglelengna.​—Johannes 3:16; Heber 9:11, 12; 1 Petrus 1:18, 19.

19. Aha do na ingkon taulahon asa lias hita sian mudar ni saluhut jolma?

¹⁹ Mauliate ma tadok tu Jahowa alani basabasaNa,  i ma hangoluan! Tapaboa ma tu donganta na asing, asa marhaporseaon nasida tu Jesus jala boi ma nasida mangolu salelenglelengna. Ala tahaholongi sude halak, tabahen ma na boi taulahon laho mangurupi nasida asa mandapot hangoluan. (Hesekiel 3:17-21) Dung i, boi ma hita mandok songon na didok ni apostel Paulus, ”Naung lias do ahu sian sapata mudar ni saluhut hamu. Ai ndang adong hubuati agia aha; tung sahat do hupabotohon tu hamu nasa tahi ni Debata.” (Ulaon ni Apostel 20:26, 27) Molo tapaboa tu dongan na asing taringot Jahowa jala tapaboa songon dia mangargai hangoluan, on patuduhon na taargai do hangoluan.