Jahat do akka raja ni Israel na sappulu marga. Alai si Ahab ma na unjahat. Menikah do ibana tu sahalak borua na jahat na manomba Baal. Goarna si Izebel. Dibunu nasida do akka nabi ni Jahowa. Jala godang do halak na manomba Baal alani si Ahab dohot si Izebel. Aha ma na diulahon Jahowa? Disuru ma Nabi Elia pasahatton hata ni Jahowa.

Didok si Elia ma tu si Ahab, alani hajahatonna dang ro be udan di Israel. Lobi sian tolu taon dang adong panen, gabe kelaparan ma bangso i. Disuru Jahowa ma muse si Elia manjuppangi si Ahab. Alai didok si Ahab ma tu ibana, ‘Alani ho do i! Ho do na mambahen sude on.’ Dialusi si Elia ma, ‘Dang alani au i. Alani ho do i, disomba ho do Baal. Molo dang porsea ho, taida ma ise do Debata na sittong. Papungu ma bangso on dohot akka nabi ni Baal di Dolok Karmel.’

Marpungu ma bangso i di Dolok Karmel. Didok si Elia ma, ‘Saonari ikkon pillitonmuna do. Molo Jahowa do Debata na sittong, somba ma Ibana. Alai molo Baal do, ibana ma somba. Suru ma 450 nabi ni Baal paradehon persembahan. Jou ma debatamuna i. Au pe, paradeokku ma persembahan jala hujou ma Jahowa. Manang ise na parohon api manutung persembahan i, i ma Debata na sittong.’ Setuju ma bangso i.

Diparade nabi ni Baal ma persembahan i. Sai dijou nasida do Baal, ninna nasida ma, ‘Ale Baal, alusi ma hami!’ Alai dang dialusi Baal i. Diparekkeli si Elia ma nasida. Didok ma, ‘Pagogo soaramuna i. Na modom do ra i. Manang suru jolo sasahalak mandungoi.’ Sahat tu borngin, sai manggorai do akka nabi ni Baal i. Alai dang adong alusna.

Dung i, dibahen si Elia ma persembahan di mezbah, jala dibahen ma aek tusi. Martangiang ma ibana, ‘Ale Jahowa, patudu ma tu bangso on, Ho do Debata na sittong.’ Pittor dibahen Jahowa ma api turun sian langit manutung persembahan i. Gogo ma soara ni bangso i  mandok, ‘Jahowa do Debata na sittong!’ Didok si Elia ma, ‘Takkup sude nabi ni Baal i!’ Dung i, dibunu ma sude nabi ni Baal na 450 halak i.

Adong ma awan na gelleng ro sian ginjang ni laut. Didok si Elia ma tu si Ahab, ‘Ro nama badai. Nakkok ma ho tu karetam jala mulak ma ho.’ Lam makkolom ma langit, mangullus ma alogo, jala ro ma udan na gogo. Ujungna, sae ma logo ni ari. Hatop ma si Ahab mamboan karetana. Marhite huaso ni Jahowa, gabe ukkatop do si Elia marlojong sian apala kareta i! Adong dope tantangan na lao dihadapi si Elia? Taida ma.