Di Kaesarea, adong sahalak perwira pasukan ni halak Rom na margoar si Kornelius. Nang pe dang halak Jahudi ibana, alai hormat do halak Jahudi tu ibana. Burju do ibana tu na pogos. Porsea do si Kornelius tu Jahowa jala jotjot do ibana martangiang. Sada tikki, makkatai ma sada malaikat tu si Kornelius. Ninna ma, ‘Nungnga dibege Debata tangiangmu. Suru ma halak tu kota Joppe manjuppangi si Petrus asa ro ibana mandapotton ho.’ Disuru si Kornelius ma tolu bawa tu kota Joppe, na daona hira-hira 50 kilometer.

Tikki i, di Joppe do si Petrus. Mandapot parnidaan ma ibana. Diida ibana ma akka binatang na haram manang na so boi allangon. Adong ma soara mandok, boi do diallang si Petrus akka binatang i. Alai dang olo si Petrus. Didok ibana, ‘Dang hea huallang binatang na haram.’ Didok soara i ma, ‘Unang be dok haram akka binatang i. Didok Debata, nungnga boi i allangon.’ Dung i didok ma muse, ‘Adong tolu bawa di pintu ni jabum. Dapotton ma nasida.’ Didapotton si Petrus ma nasida jala disukkun lao marhua. Didok akka bawa i ma, ‘Si Kornelius do manuru hami, sahalak perwira pasukan ni Rom. Disuru do asa ro  ho tu jabuna di Kaesarea.’ Ditogihon si Petrus ma nasida tu jabuna jala modom ma nasida disi. Marsogotna i, lao ma si Petrus dohot piga-piga murid ni Jesus sian Joppe tu Kaesarea.

Dung pajuppang si Kornelius dohot si Petrus, marsomba ma si Kornelius tu ibana. Alai didok si Petrus ma, ‘Unang somba au! Sarupa jolma do hita. Debata do na manuru au ro tu jabumon, nang pe dang boi halak Jahudi tu jabu ni halak na so Jahudi. Saonari, paboa ma boasa disuru ho au ro.’

Didok si Kornelius ma, ‘Opat ari naung salpu, martangiang au tu Debata. Adong malaikat na mandok asa husuru halak mandapotton ho. Paboa ma tu hami hata ni Jahowa.’ Didok si Petrus ma, ‘Saonari huboto ma, adil do Debata. Lomo do rohana asa sude jolma manomba Ibana.’ Godang ma diajarhon si Petrus tu nasida taringot Jesus. Gabe mandapot tondi parbadia ma nasida sude. Dung i, tardidi ma nasida.