Panguhum 9:1-57
9 Di pudian ni ari, dijuppangi si Abimelek+ ma akka tulangna di Sikem. Didok ibana ma tu nasida dohot tu sude keluarga ni oppung dolina,*
2 “Tolong jo sukkun hamu tu sude pamimpin* ni Sikem, ‘Dia do na dumenggan di hamu? Diparetta 70 anak ni si Jerubbaal+ do manang holan sahalak na mamaretta hamu? Ingot hamu ma, mudarmuna sandiri do au.’”*
3 Dung i dipaboa akka tulangna i ma hata ni si Abimelek i tu sude pamimpin ni Sikem. Jala unlomo do roha ni nasida mambege hata ni si Abimelek. Ai didok akka pamimpin ni Sikem i do, “Keluargatta dope ibana.”
4 Dilehon nasida ma 70 hepeng perak tu si Abimelek na sian jabu* ni Baal-berit.+ Dipakke si Abimelek ma hepeng i lao manggaji akka na so karejo dohot akka pareman asa mangihutton ibana.
5 Dukkon i lao ma si Abimelek tu jabu ni bapakna di Opra.+ Dipamate ibana ma akka haha anggina,+ i ma anak ni si Jerubbaal na 70 halak i di ginjang ni sada batu. Holan si Jotam, anak siappudan ni si Jerubbaal ma na mangolu ala martabuni ibana.
6 Marpungu ma sude pamimpin ni Sikem dohot Bet-milo di jonok ni hau na balga di labbung ni tiang na di Sikem. Dibahen nasida ma si Abimelek gabe raja.+
7 Dung dipaboa na masa i tu si Jotam, lao ma ibana jongjong tu pussu ni Dolok Gerizim.+ Gogo ma didok ibana, “Hamu akka pamimpin ni halak Sikem, tangihon hamu ma au, asa ditangihon Debata hamu.
8 “Di sada tikki naeng mamillit raja ma akka hau. Didok nasida ma tu hau jetun, ‘Ho ma na gabe rajanami.’+
9 Alai didok hau jetun i ma, ‘Molo gabe raja au,* dang boi be kaluarhonokku miak. Hape dipakke do i lao pasangappon Debata dohot jolma.’
10 Didok akka hau i ma muse tu hau ara, ‘Ho ma na gabe rajanami.’
11 Alai didok hau ara i ma tu nasida, ‘Molo gabe raja au,* dang boi be lehonokku parbuekku na denggan jala na manis.’
12 Dung i didok akka hau i ma tu hau anggur, ‘Ho ma na gabe rajanami.’
13 Didok hau anggur ma, ‘Molo gabe raja au,* dang boi be lehonokku anggur na baru na palashon roha ni Debata dohot jolma.’
14 Ujungna didok akka hau i ma tu ramba na marsuga, ‘Ho ma na gabe rajanami.’+
15 Dialusi ramba na marsuga i ma, ‘Molo tutu naeng dipillit hamu au gabe rajamuna, ro ma hamu marlinggom tu au. Alai molo dang, pakaluarokku ma api lao manutung akka hau ares na di Libanon.’
16 “Tulus do rohamuna mambahen si Abimelek gabe raja?+ Jala denggan do i di rohamuna? Dibahen hamu do na denggan tu si Jerubbaal dohot tu keluargana? Jala dipasangap hamu do ibana?
17 Nungnga marporang bapakku, si Jerubbaal humokkop hamu.+ Jala martaru hosa do ibana lao paluahon hamu sian halak Midian.+
18 Saonari, dialo hamu do keluarga ni bapakku jala dipamate hamu do 70 anakna di ginjang ni sada batu.+ Dibahen hamu do si Abimelek, anakna na sian hatobanna i+ gabe raja ni akka pamimpin ni Sikem, holan ala keluargamuna ibana.
19 Molo na tulus do rohamuna jala na denggan do na binahenmuna sadari on tu si Jerubbaal dohot tu keluargana, marlas ni roha ma hamu alani si Abimelek. Jala sai anggiat ma marlas ni roha si Abimelek alani hamu.
20 Alai molo dang, lok ma ditutung si Abimelek akka pamimpin ni Sikem dohot Bet-milo.+ Jala lok ma ditutung akka pamimpin ni Sikem dohot Bet-milo si Abimelek.”+
21 Dung i lari ma si Jotam+ tu Beer jala tinggal ma ibana disi. Ai mabiar do ibana tu si Abimelek abangna i.
22 Tolu taon ma lelengna si Abimelek mamaretta* halak Israel.
23 Dung i dipasombu Debata ma tubu parbadaan* di tonga-tonga ni si Abimelek dohot akka pamimpin ni Sikem. Gabe marbalik ma nasida mangalo si Abimelek.
24 Masa pe i, asa tarbalos do hajahaton na dibahen ibana tu anak ni si Jerubbaal na 70 halak i. Ikkon martanggung jawab do si Abimelek tu mudar ni haha anggina, ai nungnga dipamate ibana nasida.+ Jala dohot do akka pamimpin ni Sikem martanggung jawab, ala dohot do nasida mangurupi si Abimelek.
25 Disuru akka pamimpin ni Sikem do akka halak lao tu akka pussu ni dolok manakkup si Abimelek. Jala dirampok nasida do akka halak na mamolus sian i. Ujungna, dipaboa ma i tu si Abimelek.
26 Dung i, manaripar ma si Gaal anak ni si Ebed dohot haha anggina tu Sikem.+ Jala porsea do akka pamimpin ni Sikem tu ibana.
27 Lao ma nasida tu ladang, dipapungu nasida ma anggur, jala didege-dege ma i lao mambahen siinumon. Dibahen nasida ma pesta jala lao ma nasida tu jabu ni debata ni nasida.+ Mangan minum ma nasida disi huhut mamburai si Abimelek.
28 Didok si Gaal anak ni si Ebed ma, “Ise huroha si Abimelek? Ise huroha si Zebul wakil ni halak Sikem i? Boasa ikkon taoloi nasida? Anak ni si Jerubbaal+ do si Abimelek jala holan wakilna do si Zebul. Boasa pola ikkon taoloi nasida? Akka anak ni si Hemor bapak ni si Sikem ma taoloi!
29 Molo au do na mamimpin bangso on, palaookku do si Abimelek.” Dung i didok ibana ma tu si Abimelek, “Pagodang ma tentaram asa alo au.”
30 Tikki dibege si Zebul pamimpin ni kota i hata ni si Gaal anak ni si Ebed i, gabe muruk ma ibana.
31 Dung i sipsip ma si Zebul manuru halak mandok tu si Abimelek, “Di Sikem do saonari si Gaal anak ni si Ebed dohot akka haha anggina. Jala dijujui nasida do akka pangisi ni kota i asa mangalo ho.
32 Ro ma ho rap dohot akka tentaram tikki borngin jala martabuni ma hamu di luar ni kota.
33 Molo dung bissar mataniari, hatop ma ho dungo jala marporang ma ho tu pangisi ni kota i. Tikki kaluar si Gaal dohot akka tentarana mangalo ho, bahen ma nasa tolapmu manaluhon ibana.”*
34 Dung i borhat ma si Abimelek dohot sude tentarana di tikki borngin. Dibagi ma nasida gabe opat punguan jala martabuni ma nasida di luar ni kota Sikem.
35 Tikki kaluar si Gaal anak ni si Ebed jala jongjong di jolo ni gerbang ni kota i, kaluar ma si Abimelek dohot akka tentarana sian partabunian ni nasida.
36 Tikki diida si Gaal akka tentara i, didok ibana ma tu si Zebul, “Ida ma! Adong akka halak turun sian pussu ni dolok i.” Alai didok si Zebul ma tu ibana, “Dang jolma na niidami, bayangan ni dolok i do i.”
37 Didok si Gaal ma muse, “Ida ma! Adong do akka halak na turun sian tonga-tonga ni huta an. Jala adong do sada punguan na ro sian dalan na jonok tu hau Meonenim na balga i.”
38 Didok si Zebul ma tu ibana, “Tikki i ginjang do roham mandok, ‘Ise huroha si Abimelek? Boasa ikkon taoloi ibana?’+ Ai leas do roham tu nasida. Saonari maju ma ho jala alo ma nasida.”
39 Dung i lao ma si Gaal, ditogihon ibana ma akka pamimpin ni Sikem marporang mangalo si Abimelek.
40 Tikki dilele si Abimelek si Gaal, lari ma ibana. Marragean do di dalan i akka halak na dipamate sahat tu jolo ni gerbang ni kota.
41 Toktong do si Abimelek tinggal di Aruma. Alai dipalao si Zebul+ do si Gaal dohot akka haha anggina sian Sikem.
42 Marsogotna i, kaluar ma akka pangisi ni kota Sikem tu luar ni kota, jala dipaboa halak ma i tu si Abimelek.
43 Dibagi si Abimelek ma akka tentarana gabe tolu punguan jala martabuni ma nasida di luar ni kota. Tikki diida ibana kaluar pangisi ni kota Sikem, kaluar ma ibana sian partabunianna jala dipamate ma nasida.
44 Di jolo ni gerbang ni kota do si Abimelek marporang rap dohot punguan na mandongani ibana. Alai na dua punguan nai, marporang do nasida mangalo halak na di luar ni kota jala dipamate ma nasida sude.
45 Sadari manipat ma si Abimelek marporang mangalo pangisi ni kota i jala ditaluhon ma kota i. Dipamate ibana do sude pangisi ni kota i jala diruppakkon do kota i.+ Dung i disaburhon ibana ma sira tu kota i.
46 Tikki dibege sude pamimpin na di Menara Sikem na masa i, pittor lao ma nasida tu inganan partabunian na di jabu ni El-berit.+
47 Adong ma halak paboahon i tu si Abimelek. Dung diboto ibana naung marpungu sude pamimpin na di Menara Sikem i,
48 nakkok ma si Abimelek dohot sude tentarana tu Dolok Salmon. Dibuat si Abimelek ma kampak, ditaba ibana ma dakka ni hau jala dipundak ibana ma i. Didok ibana ma tu akka tentarana, “Hatop! Bahen hamu ma songon na hubahen on.”
49 Dung i ditaba akka tentara i ma dakka ni hau jala diihutton nasida ma si Abimelek. Dibahen nasida ma dakka ni hau i tu inganan partabunian i jala ditutung ma i. Alani i, mate ma sude halak na di Menara Sikem, hira-hira 1.000 halak ma nasida, bawa dohot borua.
50 Lao ma muse si Abimelek tu Tebes. Markemah ma ibana disi lao marporang manaluhon pangisi ni kota i.
51 Adong do menara na togu di tonga-tonga ni kota i. Lari do akka borua, bawa, dohot sude pamimpin ni kota i tusi. Dikucci nasida ma pintuna jala nakkok ma nasida tu atap ni menara i.
52 Ro ma si Abimelek tu jonok ni menara i lao manaluhon akka halak na disi. Mardalan ma ibana tu pintu ni menara i lao manutung menara i.
53 Adong ma sahalak borua mandabuhon batu gilingan tu ulu ni si Abimelek, gabe puttar ma uluna.+
54 Pittor dijou si Abimelek ma siboan sinjatana jala didok ma, “Buat ma podangmi jala pamate ma au, asa unang adong na mandok, ‘Sahalak borua do na pamatehon ibana.’” Dung i ditikkam siboan sinjatana i ma ibana jala mate ma si Abimelek.
55 Dung diida halak Israel naung mate si Abimelek, mulak ma nasida sude.
56 Songon i ma Debata mambalos hajahaton na binahen ni si Abimelek tu bapakna. Ai dipamate ibana do 70 haha anggina.+
57 Dibalos Debata do sude hajahaton na binahen ni halak Sikem. Gabe saut ma sude hata ni si Jotam+ anak ni si Jerubbaal,+ tikki diburai ibana nasida.
Surat na di toru
^ As. “keluarga ni oppung dolina sian omakna”.
^ Manang boi do “akka nappuna tano”.
^ As. “holi-holi dohot sibukmuna do au”.
^ Manang “joro”.
^ As. “Molo meol-eol au di ginjang ni hau na asing”.
^ As. “Molo meol-eol au di ginjang ni hau na asing”.
^ As. “Molo meol-eol au di ginjang ni hau na asing”.
^ Manang “gabe pamimpin ni”.
^ As. “roha na jahat”.
^ Manang “bahen ma tu ibana na boi diulahon tanganmu”.
