Panguhum 19:1-30
-
Halak Benjamin mangulahon seks na so patut (1-30)
19 Tikki dang adong raja ni halak Israel,+ adong ma sahalak Lepi na tinggal di sada huta na dao. Di inganan na mardolok-dolok di Epraim+ do hutana i. Dibuat ibana ma sahalak borua na sian Betlehem+ na di Juda lao gabe gundikna.
2 Alai dang setia gundikna i tu ibana. Ditadikkon gundikna i do ibana jala mulak tu jabu ni bapakna di Betlehem na di Juda. Disi ma gundikna i saleleng opat bulan.
3 Dung i ro ma suamina i mandapotton gundikna i mangelek ibana asa mulak. Diboan suamina i do parkarejona bawa dohot sapasang halodena. Dung sahat ibana disi, ditogihon gundikna ma ibana masuk tu jabu ni bapakna. Tikki diida simatuana i ibana ro, las situtu ma rohana.
4 Dielek-elek simatuana doli ma ibana asa marborngin disi saleleng tolu ari. Mangan minum ma nasida jala marborngin ma ibana disi.
5 Di ari na paopatton, hatop ma nasida dungo. Tikki naeng borhat nasida, didok simatuana i ma tu helana i, “Jolo mangan ma hamu baru pe asa mulak. Asa margogo hamu.”
6 Gabe hundul ma nasida jala rap mangan minum. Dung i didok simatuana i ma tu helana i, “Marborngin ma muse hamu dison. Jala pasonang ma jo roham.”
7 Tikki naeng borhat helana i, sai dielek-elek simatuana i ma ibana. Alani i, gabe marborngin ma ibana muse disi.
8 Di ari na palimahon, hatop ma nasida dungo. Tikki naeng borhat nasida, didok simatuana doli ma muse, “Jolo mangan ma hamu asa mulak. Asa margogo hamu.” Alai sahat tu botari, disi dope nasida jala mangan do nasida na dua torus.
9 Tikki naeng borhat halak Lepi i rap dohot gundikna dohot parkarejona i, didok simatuana doli ma, “Nungnga naeng borngin. Dison ma muse hamu marborngin. Pasonang ma jo roham. Tibu ma hamu dungo manogot, asa boi hatop mulak.”*
10 Alai dang olo halak Lepi i marborngin. Borhat ma ibana rap dohot gundikna, parkarejona, dohot sapasang halodena.* Jala mardalan ma nasida sahat tu Jebus di Jerusalem.+
11 Nungnga botari tikki naeng sahat nasida di Jebus. Didok parkarejona i ma tu ibana, “Boha molo di kota ni halak Jebus on hita maradi dohot marborngin?”
12 Alai didok ibana ma, “Dang boi hita maradi di kota ni bangso na asing, na so halak Israel. Tadalani ma torus sahat tu Gibea.”+
13 Didok ibana ma muse tu parkarejona i, “Beta, mardalan ma hita torus, asa sahat hita di Gibea manang di Rama.+ Jala disi ma hita marborngin.”
14 Dung i mardalan ma nasida torus. Nungnga naeng borngin* tikki naeng sahat nasida di Gibea di huta ni marga Benjamin.
15 Dung i maradi ma nasida di Gibea lao marborngin disi. Hundul ma nasida di lapangan na di kota i. Alai dang adong nanggo sahalak pe na manogihon nasida marborngin tu jabuna.+
16 Dung borngin, ro ma sahalak bawa naung matua mandapotton nasida. Baru mulak sian ladang do ibana. Di inganan na mardolok-dolok di Epraim+ do hutana, alai nungnga tinggal ibana di Gibea. Sasittongna halak Benjamin do pangisi ni kota i.+
17 Tikki diida bawa na matua i nasida hundul di lapangan ni kota i, didok ibana ma tu nasida, “Sian dia do hamu? Jala naeng tudia do hamu?”
18 Dialusi halak Lepi i ma, “Sian Betlehem na di Juda do hami. Jala naeng tu huta na di inganan na mardolok-dolok di Epraim do hami. Ai parhuta i do au. Na lao do au tu Betlehem na di Juda+ jala naeng lao ma au tu tabernakel* ni Jahowa.* Alai dang adong na manogihon au tu jabuna.
19 Hape adong do sipanganonnami. Adong do sipanganon ni akka halodenami.+ Jala adong do roti+ dohot anggur lao di au, di gundikku, dohot di parkarejoku.”
20 Alai didok bawa na matua i ma, “Tu jabu ma hita,* asa huparade sude na porlu di hamu. Unang ma marborngin hamu di lapangan ni kota on.”
21 Diboan ibana ma nasida tu jabuna jala dilehon ma mangan akka halodena. Diburi nasida ma pat ni nasida. Dung i mangan minum ma nasida.
22 Di tikki na mangan minum i nasida, ro ma akka bawa na so hasea na di kota i manggurtuki jabu i. Sai didok nasida ma tu bawa na matua nappuna jabu i, “Boan ma kaluar bawa na di jabumi, asa mangulahon seks hami dohot ibana.”+
23 Kaluar ma nappunasa jabu i jala didok ma, “Unang ma songon i hamu ale akka dongan. Unang ma bahen hamu na jahat jala unang ma bahen hamu na so suman. Ai tamukku do bawa i.
24 Adong do borukku namarbaju dohot gundik ni bawa i. Nasida ma hulehon tu hamu. Bahen hamu ma lomomuna tu nasida.+ Alai unang ma bahen na so suman tu bawa i.”
25 Alai dang olo nasida manangihon ibana. Gabe ditarik halak Lepi i ma gundikna i+ jala dilehon tu nasida. Diperkosa nasida ma gundikna i saborngin i sahat tu manogot. Dung manogot, disuru nasida ma gundikna i mulak.
26 Tikki naeng torang ari, sahat ma ibana di jabu inganan ni halak Lepi i marborngin. Jala dabu ma ibana di jolo ni pintu. Disi ma ibana peak sahat tu na torang ari.
27 Dung dungo halak Lepi i manogotna i, naeng borhat ma ibana manorusson pardalananna. Tikki dibukka ibana pintu, diida ibana ma peak gundikna i, jala appe do tanganna tu pintu.
28 Didok halak Lepi i ma, “Beta, dungo ho, asa lao hita.” Alai dang mangalusi be gundikna i. Diangkat ibana ma gundikna i tu ginjang ni halodena jala mulak ma nasida.
29 Dung sahat di jabuna, dibuat ibana ma piso jala diseati ibana ma bakke ni gundikna i gabe 12 bagian. Dung i dikirim ma sapponggol be tu ganup marga ni halak Israel.
30 Sude na mangida i mandok, “Dang hea dope masa sisongon on mulai kaluar halak Israel sian Mesir sahat tu saonari. Manat ma on tapikkirhon* jala tahatai,+ asa boi taboto aha na ikkon taulahon.”
Surat na di toru
^ As. “mulak tu kemah”.
^ Manang “sapasang halodena na marpalano”.
^ Manang “Nungnga bonom mataniari”.
^ As. “jabu”.
^ Manang boi do “naeng marhobas au di tabernakel ni Jahowa”.
^ As. “Dame ma di hamu”.
^ Manang “taparate-atehon ma on”.
