Panguhum 12:1-15
12 Dung i marpungu ma halak Epraim jala manaripar ma nasida tu Zapon.* Didok nasida ma tu si Jepta, “Boasa dang dijou ho hami tikki lao ho marporang mangalo halak Ammon?+ Saonari, tutungonnami nama ho dohot jabum.”
2 Alai didok si Jepta ma tu nasida, “Massai borat do parporangannami dohot akka tentarakku mangalo halak Ammon. Hujou do hamu asa diurupi hamu au. Alai dang dipalua hamu au sian tangan ni nasida.
3 Tikki huida dang ro hamu paluahon au, borhat ma au martaru hosa mangalo halak Ammon.+ Dung i dipasahat Jahowa ma nasida tu tanganku. Alai saonari, boasa ro hamu mangalo au?”
4 Dipapungu si Jepta ma sude halak Gilead+ jala marporang ma nasida mangalo halak Epraim. Ditaluhon halak Gilead ma halak Epraim na hea mandok songon on tu nasida, “Hamu halak Gilead na di Epraim dohot na di Manasse, na lari do hamu najolo sian Epraim.”
5 Dung i hatop ma halak Gilead lao tu Sunge Jordan+ asa diabbat nasida halak Epraim na lao manaripar. Molo adong halak Epraim na naeng lari jala mandok, “Loas ma au manaripar,” didok halak Gilead ma tu ibana, “Halak Epraim do ho?” Molo dialusi ibana, “Daong,”
6 dokkonon ni halak Gilead ma tu ibana, “Attong, dok ma jolo Syibbolet.”* Alai dohononna ma, “Sibbolet,” ai dang boi denggan halak Epraim mandok, “Syibbolet.” Ditakkup ma ibana jala dipamate di ingananna manaripar di Sunge Jordan i. Adong ma 42.000 halak Epraim na mate di tikki i.
7 Onom taon ma lelengna si Jepta gabe panguhum ni halak Israel. Dung i mate ma si Jepta halak Gilead i jala dikubur ma ibana di kotana di Gilead.
8 Dukkon si Jepta, si Ebsan na sian Betlehem ma na gabe panguhum ni halak Israel.+
9 Adong 30 anak ni si Ebsan jala 30 boruna. Dipamuli ibana do akka boruna tu akka bawa sian keluarga na asing. Jala dialap ibana do 30 borua sian keluarga na asing lao gabe istri ni akka anakna. Pitu taon ma lelengna ibana gabe panguhum ni halak Israel.
10 Dung i mate ma si Ebsan jala dikubur di Betlehem.
11 Dukkon si Ebsan, si Elon halak Zebulon i ma na gabe panguhum ni halak Israel. Sappulu taon ma lelengna si Elon gabe panguhum ni halak Israel.
12 Mate ma si Elon halak Zebulon i jala dikubur ma ibana di Ayalon, di huta ni halak Zebulon.
13 Dukkon si Elon, si Abdon anak ni si Hilel halak Piraton i ma na gabe panguhum ni halak Israel.
14 Adong 40 anakna, 30 pahoppuna bawa, jala 70 halodena. Saleleng ualu taon ma ibana gabe panguhum ni halak Israel.
15 Dung i mate ma si Abdon anak ni si Hilel halak Piraton i. Dikuburhon ma ibana di Piraton, di huta ni halak Epraim na di dolok ni halak Amalek.+
