Surat tu Huria na di Kolosse 1:1-29
1 Sian si Paulus na gabe apostel ni Kristus Jesus mangihutton lomo ni roha ni Debata dohot sian si Timoteus+ donganta.
2 Mandapotton akka na badia dohot akka dongan na setia di bagasan Kristus na di Kolosse:
Anggiat ma dipatuduhon tu hamu asi ni roha na massai balga dohot hadameon na sian Debata Ama i.
3 Tikki ditangiakkon hami hamu, mandok mauliate do hami tu Debata, Ama ni Tuanta Jesus Kristus.
4 Ai hubege hami do taringot tu haporseaonmuna tu Kristus Jesus dohot holongmuna tu akka na badia,
5 ala maima-ima do hamu tu hadiah, i ma hangoluan na di surgo.+ Nungnga dibege hamu taringot on sian barita na uli
6 na dipaboa tu hamu. Ai sian mulai dibege hamu barita na uli jala takkas diboto hamu asi ni roha ni Debata na massai balga, nungnga lam tarsar jala lam martamba na manangihon barita na uli di tonga-tongamuna, songon i ma nang di liat portibi on.+
7 Nungnga dibege hamu barita na uli sian si Epapras,+ dongan saulaon na tahaholongi. Setia do ibana marhobas tu Kristus i humokkop hami.
8 Dipaboa ibana do muse tu hami taringot holong na dipatudu hamu marhite panogu-noguon ni tondi parbadia.
9 Dung dibege hami i, dang marnaso hami manangiakkon hamu.+ Hutangiakkon hami do asa dapotmuna parbinotoan na bagas taringot tu lomo ni roha ni Debata.+ Jala hutangiakkon hami do asa dapotmuna bisuk dohot parbinotoan na dilehon marhite tondi parbadia.+
10 Dung i, boi ma hamu marpangalaho hombar tu lomo ni roha ni Jahowa* huhut mangulahon akka ulaon na denggan, jala lam martamba parbinotoanmuna na bagas taringot tu Debata.+
11 Hutangiakkon hami do muse asa lam margogo hamu alani huaso ni Debata na massai balga i.+ Dung i boi ma hamu martahan, sabar, jala marlas ni roha
12 huhut mandok mauliate tu Ama i. Ibana do na mambahen hamu tama manjalo janji na nilehonna tu akka na badia+ na mardalan di na tiur.
13 Nungnga dipalua hita sian huaso ni haholomon+ jala dipapinda tu harajaon ni Anak haholonganna.
14 Dipalua Anakna i do hita marhite tobusan na manesa akka dosatta.+
15 Ibana do gombaran ni Debata na so tarida i,+ jala na parjolo ditoppa sian saluhutna.+
16 Marhite ibana do ditoppa saluhut na di surgo dohot na di tano on, na tarida dohot na so tarida,+ akka raja, akka pamimpin, akka pamaretta, manang akka parhuaso. Marhite ibana+ jala lao di ibana do ditoppa saluhutna.
17 Nungnga adong ibana andorang so adong na asing+ jala marhite ibana do saluhutna dibahen.
18 Ibana do ulu ni huria,+ i ma daging i. Ibana do mula ni saluhutna, na parjolo hehe sian akka na mate,+ asa gabe na parjolo ibana sian saluhutna.
19 Ai lomo do roha ni Debata asa sun denggan ibana di saluhutna.+
20 Jala marhite Anakna i do mardame saluhut+ na di tano on dohot na di banua ginjang tu Debata, i ma marhite mudar+ ni Anakna i na durus di hau partinaonan.*
21 Dao do hamu najolo sian Debata jala musuna do hamu, ai akka na jahat do dipikkiri hamu.
22 Alai saonari nungnga mardame be hamu tu Debata marhite hamatean ni Anakna naung mangalehon dagingna, asa badia hamu, dang marcacat, jala dang marsala di jolona.+
23 Alai ikkon toktong do hamu marhaporseaon,+ togu di ginjang ni fondasi ni haporseaon,+ dang tarhutur,+ jala dang manimbil sian janji ni Debata na dibege hamu marhite barita na uli na dibaritahon tu sude toppaan na di tano on.+ Alani barita na uli on do au si Paulus gabe parhobas.+
24 Marlas ni roha do au saonari nang pe manaon hasusaan humokkop hamu+ jala marsitaonon songon Kristus. Alai dang marujung dope hasusaakki humokkop daging ni Kristus,+ i ma huria.+
25 Gabe parhobas do au tu huria i alani tanggung jawab+ na dilehon Debata tu au humokkop hamu. Alani i ma hubahen sian nasa gogokku lao paboahon hata ni Debata,
26 i ma rahasia na badia+ na ditabunihon sian portibi on dohot sian akka halak najolo.+ Alai nungnga dipapatar be i saonari tu akka na badia ni Debata.+
27 Dipaboa Debata do rahasia na badia, i ma arta na sangap i tu akka na badia na di tonga-tonga ni akka bangso. On do rahasia na badia i:+ na lao marsada do Kristus rap dohot hamu, lapatanna maima-ima do hamu dipasangap+ rap dohot ibana.
28 Taringot tu ibana do na tapaboa tu ganup halak huhut pasingotton nasida jala marbisuk mangajari nasida. Dung i boi ma tabahen sun denggan ganup halak na marsada dohot Kristus+ di jolo ni Debata.
29 Alani i do hubahen sian nasa gogokku lao pasautton i marhite huaso na nilehonna tu au.+
