Josua 9:1-27
9 Dibege sude raja na di sabola barat ni Sunge Jordan+ ma na masa i. Nasida ma raja ni halak Het, halak Amori, halak Kanaan, halak Perisi, halak Hevi, dohot halak Jebus.+ Mamaretta do nasida di inganan na mardolok-dolok, di Syefela, di pinggir ni Laut na Balga,*+ dohot di jolo ni Libanon.
2 Marpungu ma nasida sude naeng mangalo si Josua dohot halak Israel.+
3 Dibege halak Gibeon+ do na diulahon si Josua tu kota Jeriko+ dohot kota Ai.+
4 Gabe marakkal ma nasida. Dipamasuk nasida ma sipanganon ni nasida tu goni naung buruk. Dibahen nasida ma i tu ginjang ni halode rap dohot inganan* ni anggur naung buruk jala naung didukkapi.
5 Dipakke nasida do muse abit naung buruk, sipatu naung buruk jala naung didukkapi. Roti na binoan ni nasida pe nungnga pir jala lapukon.
6 Dung i dijuppangi nasida ma si Josua tu perkemahan na di Gilgal.+ Didok nasida ma tu si Josua dohot tu akka pangituai* ni halak Israel, “Sian huta na dao do hami ro. Bahen hamu ma parjanjian dohot hami.”
7 Alai didok akka pangituai ni halak Israel i ma tu halak Hevi,+ “Boasa bahenonnami parjanjian tu hamu?+ Atik na jonok do hutamuna tuson.”
8 Didok nasida ma tu si Josua, “Bahen ma hami gabe hatobanmu.”
Dung i didok si Josua ma tu nasida, “Ise do hamu? Didia do hutamuna?”
9 Dialusi nasida ma muse, “Sian huta na massai dao+ do ro akka hatobanmon. Ro do hami alani goar ni Jahowa Debatamuna i. Nungnga dibege hami taringot tu Ibana dohot sude na binahenna di Mesir.+
10 Hubege hami do muse sude na binahenna tu Raja Sihon+ na sian Hesbon dohot Raja Og+ na sian Basan na tinggal di Astarot. Nasida do dua raja ni halak Amori na di bariba* ni Sunge Jordan.
11 Alani i do umbahen na disuru akka pangituai dohot akka dongan sahutanami asa huparade hami sipanganon lao ro manjuppangi hamu. Jala disuru do hami mandok tu hamu, ‘Bahen ma hami gabe hatobanmuna.+ Jala bahen ma parjanjian dohot hami.’”+
12 Tikki borhat hami tuson, las dope roti na huboan hami on. Alai saonari, nungnga pir jala lapukon.+
13 Tikki huisi hami inganan* ni anggur on, baru dope on. Alai saonari nungnga maribak.+ Nungnga sega abit dohot sipatunami. Ai massai dao do pardalanannami.”
14 Dipareso akka pangituai ni halak Israel ma sipanganon ni nasida, alai dang disukkun nasida i tu Jahowa.+
15 Dung i mardame ma si Josua dohot nasida,+ jala marjanji ma ibana dang pamateonna nasida. Dohot do akka pamimpin ni bangso i marsumpa tu nasida.+
16 Hape tolu ari dukkon i, diboto halak Israel ma na jonok do huta ni nasida.
17 Dung i lao ma halak Israel manjuppangi nasida, jala sahat ma nasida di ari na patoluhon. Di Gibeon do huta ni nasida,+ di Kepira, di Beerot, dohot di Kiriat-jearim.+
18 Alai dang dibahen halak Israel manang aha tu nasida. Ai nungnga marsumpa akka pamimpin ni bangso Israel tu nasida di jolo ni Jahowa+ Debata ni Israel. Gabe marungut-ungut ma sude bangso i tu pamimpin ni nasida.
19 Alani i, didok akka pamimpin ni bangso i ma tu halak Israel, “Dang boi be bahenonmuna manang aha tu nasida. Ai nungnga marsumpa hami tu nasida di jolo ni Jahowa Debata ni Israel.
20 Alai songon on ma tabahen: Tapasombu ma nasida mangolu, asa unang muruk Debata tu hita. Ai nungnga marsumpa hami tu nasida.”+
21 Didok akka pamimpin i ma muse, “Tapasombu ma nasida mangolu. Alai nasida ma na mambuat soban dohot na manimba aek tu sude bangso on.” On ma janji ni pamimpin i tu nasida.
22 Dijou si Josua ma nasida jala ninna ma, “Boasa margabus hamu tu hami? Didok hamu massai dao hutamuna, hape jonok do.+
23 Mulai sian saonari, hona bura ma hamu.+ Toktong ma hamu gabe hatoban na papunguhon soban dohot na manimba aek tu tabernakel* ni Debata.”
24 Didok nasida ma tu si Josua, “Nungnga diboto hatobanmon hata ni Jahowa Debatamuna i tu si Musa naposona i. Didok Ibana do na lao lehononna sude huta on tu hamu, jala pamateonna sude pangisi ni huta on di jolomuna.+ Gabe mabiar ma hami tu hamu.+ Alani i do huulahon hami on.+
25 Saonari, lomom ma. Bahen ma tu hami na denggan jala na sittong didok roham.”
26 Songon i ma dibahen si Josua tu nasida. Dijaga ibana do asa unang dipamate halak Israel nasida.
27 Di ari i, disuru si Josua ma nasida papunguhon soban dohot manimba aek tu halak Israel+ dohot tu langgatan ni Jahowa di inganan naung pinillit ni Debata.+ Jala i ma ulaon ni nasida sahat tu sadari on.+
Surat na di toru
^ I ma Laut Tengah.
^ Tas na sian kulit ni binatang.
^ I ma na di sabola timur.
^ Tas na sian kulit ni binatang.
^ As. “jabu”.
