Josua 23:1-16
23 Dame do ngolu ni halak Israel dibahen Jahowa+ jala dang adong musu na mangganggu nasida. Dang sadia leleng, matua ma si Josua jala nungnga naeng mate ibana.+
2 Dijou ibana ma sude halak Israel,+ akka pangituai,* akka pamimpin,+ dohot akka panguhum. Didok ibana ma tu nasida, “Nungnga matua be au jala nungnga naeng mate.
3 Jala nungnga diida hamu sude na binahen ni Jahowa Debatamuna tu sude bangso alani hamu. Ai Jahowa Debatamuna i do na marporang mangurupi hamu.+
4 Jala marhite undi,+ nungnga hubagihon tu hamu tano mulai sian Sunge Jordan sahat tu Laut na Balga* na di sabola barat. Hutaluhon do akka bangso na tinggal di luat i.+ Nang pe adong dope akka bangso na tinggal disi, nungnga gabe tano parbagiananmuna i.+
5 Jahowa Debatamuna i do na mangusir nasida sian jolomuna.+ Dipalao Ibana do nasida alani hamu, jala dilehon do i gabe tanomuna. Ai songon i do janji ni Jahowa Debatamuna i tu hamu.+
6 “Saonari, ikkon barani do hamu mangoloi jala mangulahon sude na tarsurat di bukku Patik+ ni si Musa. Unang ma manimbil hamu sian dalan i.*+
7 Unang ma mardongan hamu tu akka bangso na asing+ na rap tinggal dope dohot hamu. Unang ma jou hamu goar ni akka debata ni nasida+ manang marsumpa di bagasan goar ni debata ni nasida. Jala unang ma hea hamu marsomba tu akka debata ni nasida i.+
8 Alai toktong ma hamu setia tu Jahowa Debatamuna,+ songon naung binahenmuna sahat tu sadari on.
9 Palaoon ni Jahowa do akka bangso na bolon jala na gogo sian jolomuna.+ Jala sahat tu sadari on, dang adong nanggo sahalak pe na tolap mangalo hamu.+
10 Sahalak pe sian hamu boi do mangalo saribu halak.+ Ai Jahowa Debatamuna i do na marporang mangurupi hamu+ songon janjina tu hamu.+
11 Alani i haholongi hamu ma Jahowa Debatamuna,+ asa toktong manat hamu+ mangulahon ulaonmuna.
12 “Alai molo dialo hamu sudena i, jala gabe diihutton hamu akka bangso na asing na rap tinggal+ dohot hamu, dilehon hamu anakmuna dohot borumuna asa gabe dongan saripe ni nasida,+ jala gabe mardongan hamu tu nasida,
13 dang palaoon ni Jahowa Debatamuna i be akka bangso i sian jolomuna.+ Gabe jorat ma nasida di hamu, jala gabe manusai songon lissing-lissing di tanggurungmuna+ dohot suga-suga di matamuna. Songon i ma na masa tu hamu, sahat tu na mate hamu di tano na uli na nilehon ni Jahowa Debatamuna.
14 “Satokkin nai, mate nama au.* Takkas do diboto hamu sian nasa rohamuna dohot sian nasa ngolumuna,* dang adong nanggo sada pe sian janji ni Jahowa Debatamuna i na so saut. Saut do sude janjina i. Jala dang adong nanggo sada pe hatana i na so saut.+
15 Alai songon na binahen ni Jahowa Debatamuna i pasautton sude janjina tu hamu,+ songon i ma bahenon ni Jahowa parohon hasusaan songon na nidokna tu hamu. Jala, pamateonna ma hamu di tano na uli na nilehon ni Jahowa Debatamuna i tu hamu.+
16 Molo dilanggar hamu parjanjian ni Jahowa Debatamuna na ikkon ulahononmuna i, molo dioloi hamu akka debata na asing jala marsomba hamu tu nasida, muruk situtu ma Jahowa tu hamu.+ Pittor pamateonna ma hamu di tano na uli na nilehonna tu hamu.”+
Surat na di toru
^ I ma Laut Tengah.
^ Manang “Unang ma manimbil hamu tu kanan manang tu kiri”.
^ As. “Songon na masa tu sude jolma na di tano on, naeng lao nama au”.
