Joel 3:1-21
3 Ida ma, di ari i dohot di tikki i,Huboan ma muse mulak akka halak Juda dohot halak Jerusalem na diboan musu.+
2 Papunguokku ma muse sude bangsoJala boanokku ma nasida turun tu Rura Jehosapat,*
Disi ma nasida huadili,+Alani bangsokki dohot alani Israel naposokki.Ai dibahen nasida do marserak bangsokki di tonga-tonga ni akka bangso,Jala dibagi-bagi nasida do tanokki lao di nasida.+
3 Dibahen nasida do undi+ lao mambagi-bagi bangsokki,Digadis nasida do sahalak doli-doli asa dapotna hepeng lao mambayar pelacur.Jala digadis do sahalak anak boru asa boi manuhor anggur.
4 Ale Tirus, Sidon, dohot sude luat na di Palistim,Boasa tung barani hamu mangalo Au?
Naeng balosonmuna do Au?
Molo naeng balosonmuna do Au,Asa hatop Au ro mambalos sude pambahenanmuna i.+
5 Ai dibuat hamu do perakku dohot mashu,+Jala diboan hamu do akka artakku na arga tu jabu ni debatamuna.
6 Digadis hamu do halak Juda dohot halak Jerusalem tu halak Junani,+Asa dao nasida sian luat ni nasida.
7 Saonari boanokku ma nasida mulak sian i, sian inganan ni nasida digadis hamu,+Baloshonokku ma sude pambahenanmuna i.
8 Gadisokku ma anak dohot borumuna tu halak Juda,+Jala gadison ni nasida ma anak dohot borumuna i tu halak Syeba, tu bangso na di luat na dao i.Songon i ma na didok Jahowa.
9 Dokkon ma songon on tu akka bangso,+
‘Parade ma dirimuna lao marporang! Suru ma kaluar sude tentaramuna na jago,
Lok ma ro sude tentara, lok ma maju nasida lao marporang.+
10 Bahen ma mata bajakmuna gabe podang, jala bahen ma sasabimuna gabe tombak,*
Lok ma didok halak na gale, “Gogo do au.”
11 Ale akka bangso na sian sude inganan, ro ma hamu marpungu, asa masiurupan hita.’”+
Ale Jahowa, suru ma akka tentaram na gogo i lao tu inganan i.
12 “Lok ma ro akka bangso tu Rura Jehosapat,Ai disi do Au hundul lao mangadili akka bangso na sian sude inganan.+
13 Pakke hamu ma sasabimuna, ai nungnga boi nasida dipanen.
Ro ma hamu tu inganan pardegean ni anggur, ai nungnga gok anggur disi.+
Nungnga marusean anggur di ingananna, ai nungnga gok hajahaton ni akka bangso i.
14 Ro ma godang halak tu rura panguhumanDisi do nasida diadili, ai nungnga jonok ari ni Jahowa.+
15 Gabe golap ma mataniari dohot bulan,Jala dang marsinondang be akka bintang.
16 Marauang ma Jahowa songon singa sian Sion,Marsurak ma Ibana sian Jerusalem,
Gabe hutur-hutur ma langit dohot tano on,Alai Jahowa do parlinggoman ni bangsona,+Ibana do benteng ni bangsokku Israel.
17 Dung i botoonmuna ma Au do Jahowa Debatamuna na maringanan di Sion, dolokku na badia i.+
Gabe inganan na badia ma Jerusalem,+Jala dang loasokku masuk tusi akka halak na sian bangso na asing.+
18 Di ari i, maneteki ma anggur na manis sian akka dolok,+Jala gok ma susu di dolok-dolok,Gok ma aek di akka sunge na di Juda,
Kaluar ma mata mual sian jabu ni Jahowa,+Kaluar ma i lao mangaeki Rura* Sittim.*
19 Alai na lao tarulang ma Mesir,+Jala gabe padang gurun ma Edom.+Ai jahat do nasida tu halak Juda,+Jala dipamate nasida do halak na so marsala na adong di Juda.+
20 Alai anggo Juda, toktong do i sai diingani,Jala toktong do sai diingani Jerusalem saleleng ni lelengna.+
21 Sesaokku ma dosa ni nasida nang pe nungnga marsala nasida tu Au,+Jala maringanan ma Jahowa di Sion.”+
