Jeremia 7:1-34
7 Songon on ma hata ni Jahowa tu si Jeremia,
2 “Jongjong ma ho di gerbang ni jabu ni Jahowa, baritahon ma barita on disi, dokkon ma, ‘Tangihon hamu ma hata ni Jahowa, hamu sude halak Juda na masuk sian akka gerbang on lao manomba Jahowa.
3 Didok Jahowa Pamimpin ni Akka Tentara,* Debata ni Israel i ma, “Pauba hamu ma pangalahomuna dohot pambahenanmuna, asa hupaloas hamu toktong tinggal di luat on.+
4 Unang ma porsea hamu tu hata ni halak na mangoto-otoi jala mandok, ‘On* do bagas joro ni Jahowa, bagas joro ni Jahowa, bagas joro ni Jahowa!’+
5 Ai molo marsitutu hamu paubahon pangalaho dohot pambahenanmuna, molo diulahon hamu hukum na tigor tikki mangadili parsoalan ni sasahalak dohot donganna,+
6 molo dang kejam hamu tu halak na sian bangso na asing, tu akka na so marama so marina,* dohot tu ina na mabalu,+ molo dang dipamate hamu halak na so marsala di inganan on, jala molo dang diihutton hamu akka debata na asing na parohon jea tu hamu,+
7 paloasokku ma hamu tinggal di luat on, di luat naung hulehon tu akka ompumuna saleleng ni lelengna.”’”*
8 “Alai porsea do hamu tu hata ni halak na mangoto-otoi,+ hape dang adong guna ni i.
9 Manakko+ do hamu, mambunu, mangalakkup, mambahen sumpa na so sittong,+ mangalehon pelean* tu debata Baal,+ jala mangihutton akka debata na so ditanda hamu.
10 Nang pe nungnga diulahon hamu sude ulaon na huhagigihon i, ro do hamu jala jongjong di jolokku di jabu na hupillit lao pasangappon goarhi. Didok hamu do, ‘Pasti selamat do hami bahenonna.’
11 Ai na dirippu hamu do naung gabe inganan* ni akka pangarampok jabu na hupillit lao pasangappon goarhi?+ Ai huida sandiri do na binahenmuna i,” ninna Jahowa.
12 “‘Saonari, lao ma hamu tu inganakku na di Silo,+ inganan na parjolo hupillit lao pasangappon goarhu.+ Ida ma aha naung hubahen tu inganan i alani hajahaton ni Israel bangsokki.+
13 Alai torus do diulahon hamu sudena i,’ ninna Jahowa, ‘nang pe sai torus Au makkatai* tu hamu, dang olo hamu manangihon.+ Nang pe sai torus hamu hujou, dang olo hamu mangalusi.+
14 Alani i songon dia naung hubahen tu Silo,+ songon i ma bahenokku tu jabu na hupillit lao pasangappon goarhi,+ tu jabu na diasakkon hamu,+ jala tu inganan naung hulehon tu hamu dohot tu akka ompumuna.
15 Bolokkonokku ma hamu sian jolokku dos songon di tikki Au mambolokkon sude donganmuna sabangso, i ma sude pinoppar ni si Epraim.’+
16 “Alai anggo ho Jeremia unang pola tangiakkon bangso i, unang pola mangandungi ho, unang pola martangiang ho, jala unang pola mangelek-elek ho tu Au alani dosa ni bangso i.+ Ai dang tangihonokku ho.+
17 Ai na so diida ho do aha na diulahon nasida di akka kota na di Juda dohot di akka dalan na di Jerusalem?
18 Akka dakdanak papunguhon soban, akka ama-ama pagalakkon api, akka istri ni nasida mambahen adonan lao mambahen kue asa dipelehon tu Ratu Surga.*+ Diusehon nasida do pelean siinumon tu debata na asing lao mambahen haccit rohakku.+
19 ‘Sasittongna, rohakku do na haccit dibahen nasida? Daong!’ ninna Jahowa. ‘Na mambahen haccit roha ni nasida sandiri do nasida disi jala na pailahon diri ni nasida sandiri.’+
20 Alani i, songon on ma hata ni Jahowa Tuan Natumimbul i, ‘Ida ma! Usehonokku ma muruk dohot rimashu tu inganan on,+ tu sude jolma dohot binatang, tu sude hau na di ladang dohot tu sude hasil ni suan-suanan. Marsigorgor ma murukku songon api jala dang adong na boi mangittopi.’+
21 “Makkatai ma Jahowa Pamimpin ni Akka Tentara, Debata ni Israel i. Didok ma, ‘Lehon hamu ma pelean situtungon rap dohot akka pelean na asing i, jala allang hamu ma jagalna.+
22 Ai di ari tikki huboan akka ompumuna sian Mesir, dang hea huhatahon manang huparettahon tu nasida taringot tu pelean situtungon dohot akka pelean na asing.+
23 Alai songon on do parettakku tu nasida, “Oloi hamu ma hatakku, Au ma na gabe Debatamuna jala hamu ma na gabe bangsokku.+ Ikkon torus do diihutton hamu parettakku asa sonang ngolumuna.”’+
24 Alai dang ditangihon nasida manang diparrohahon nasida i.+ Gariada lomo ni roha ni nasida sandiri do na diihutton nasida. Marjugul do nasida lao mangihutton roha ni nasida na jahat i,+ alani i lam jahat do nasida dang na lam denggan.
25 Songon i ma na masa mulai sian na kaluar ompumuna sian Mesir sahat tu saonari.+ Alani i, torus do husuru akka panurirangku* tu hamu. Torus do husuru nasida ganup ari* manjuppangi hamu.+
26 Alai dang olo nasida manangihon Au jala dang adong na olo mamparrohahon Au.+ Gariada, lam takkang do nasida jala unjahat do pangalaho ni nasida sian akka ompu ni nasida!
27 “Nang pe dipaboa ho sudena on tu nasida,+ dang na lao ditangihon nasida ho. Nang pe dijou ho nasida, dang na lao alusan ni nasida ho.
28 “Alani i dokkon ma tu nasida, ‘On ma bangso na so olo mangoloi hata ni Jahowa Debata ni nasida, jala bangso na so olo manjalo pissang-pissang. Dang adong be sian nasida halak na setia jala dang dihatai be di tonga-tonga ni nasida songon dia asa boi setia.’*+
29 “Cukkur ma obukmuna* i sappe habis jala bolokkon ma obukmuna na ganjang i. Endehon ma muse ende andung-andung di akka dolok. Ai dang dijalo Jahowa be bangso on, jala ditinggalhon nama nasida. Ai nungnga dibahen bangso on muruk Ibana.
30 ‘Nungnga diulahon halak Juda na jahat di jolokku,’ ninna Jahowa. ‘Dipeakkon nasida do patung ni nasida na huhagigihon i di jabu na hupillit lao pasangappon goarhu, lao mambahen ramun* inganan i.+
31 Dipajongjong nasida do akka inganan panombaon* di Topet, di Rura Anak ni Hinnom*+ lao manutung anak dohot boru ni nasida tu api.+ Hape dang hea huparettahon i, jala dang hea tubu di rohakku ulaon sisongon i.’+
32 “Didok Jahowa ma, ‘Alani na masa i, di ari na naeng ro, dang digoari be inganan i Topet manang Rura Anak ni Hinnom,* alai Rura Pamunuan nama goar ni i. Dikuburhon nasida ma akka halak di Topet sappe dang adong be inganan lao mambahen kuburan.+
33 Gabe siallangon ni akka pidong na di langit ma bakke ni bangso on, jala gabe siallangon ni akka binatang buas na di tano on. Dang na lao lari nasida, ai dang adong na mambahen akka binatang i mabiar.+
34 Pasookku ma soara ni na marlas ni roha dohot na marsonang-sonang, soara ni pengantin bawa dohot soara ni pengantin borua.+ Pasookku ma soara ni nasida di akka kota na di Juda dohot di akka dalan na di Jerusalem. Ai na lao maruppak nama luat i.’”+
Surat na di toru
^ Manang “Sebaot”, lapatanna pamimpin ni akka suru-suruan na di banua ginjang.
^ As. “Sude on,” na nidokna dison, i ma sude bangunan na di komplek ni bagas joro.
^ Manang “na so marama”.
^ Manang “sian najolo sahat ro di saleleng ni lelengna”.
^ Manang “manutung pelean asa nakkok timusna”.
^ Manang “gua”.
^ As. “nang pe tibu Au dungo manogot jala makkatai”.
^ Gelar tu dewi na disomba ni halak Israel naung manimbil. Dewi na didok nasida boi mambahen sahalak borua marianakkon.
^ As. “Tibu do nasida dungo manogot jala husuru do nasida”.
^ As. “jala nungnga dibolokkon nasida be i sian pamangan ni nasida”.
^ Manang “obuk naung dipapulik hamu”.
