Hesekiel 26:1-21
26 Di ari na parjolo di bulan i, di taon na pasappulu sadahon, makkatai ma Jahowa tu au. Ninna ma,
2 “Ale anak ni jolma, didok Tirus do taringot tu Jerusalem,+ ‘Tuani ma! Nungnga hancur be kota na manarik akka halak na sian marragam bangso i.+ Saonari marhasil nama au! Mamora nama au, ai nungnga hancur be ibana.’
3 Alani i, songon on ma hata ni Jahowa Tuan Natumimbul i, ‘Ale Tirus, Au nama na gabe alom. Parookku ma godang bangso lao mangalo ho. Ro ma nasida mangalo ho songon galumbang ni laut na so hea so.
4 Bahenon ni nasida ma hancur tembok ni Tirus, jala bahenon ni nasida ma maruppak akka menarana.+ Horusokku ma sude na maruppak i jala bahenokku ma i gabe dolok batu na gundul.
5 Gabe panjomuron ni jaring ni panjala ma inganan i, na adong di tonga-tonga ni laut.’+
“‘Ai nungnga Au naung mandok i,’ ninna Jahowa Tuan Natumimbul, ‘jala buaton ni akka bangso ma arta ni Tirus i.
6 Dipamate ma akka halak na tinggal di huta na jonok tu kota i pakke podang. Dung i botoon ni halak ma na Au do Jahowa.’
7 “Alani i songon on ma hata ni Jahowa Tuan Natumimbul i, ‘Boanokku ma sian utara+ raja ni Babel, i ma si Nebukadnesar* lao mangalo Tirus. Ibana do raja ni sude raja.+ Adong do hodana,+ dohot kareta porangna.+ Adong do akka tentarana na hundul di atas ni hoda jala massai godang situtu do tentarana.
8 Bahenonna ma hancur akka huta na jonok tu kotamuna pakke podang. Dibangun ibana ma tembok dohot benteng lao mengepung sakalilingmuna. Ro ma ibana mangalo hamu marhite mamboan perisai na balga.
9 Bahenonna ma hancur akka tembokmuna mamakke masin penghancur tembok. Jala maruppak ma bahenonna akka menaram mamakke kampak.*
10 Alani godang ni hodana marhabangan ma orbuk, sappe ditutupi orbuk i ma ho. Sappe hutur-hutur ma tembokmu dibahen soara ni tentara na hundul di hoda, akka roda ni karetana, dohot kareta porangna. Tikki masuk ibana sian gerbangmu, dos ma ibana songon pasukan ni tentara na ro mangalo kota naung ruppak tembokna.
11 Degean ni pat ni hodana ma sude akka dalanmu.+ Pamateonna ma sude rakyatmu mamakke podang. Jala ruppakkononna ma sude akka tiangmu na togu i.
12 Dirampas nasida ma sude hamoraonmi jala buaton ni nasida ma akka tiga-tigam.+ Diruppakkon nasida ma akka tembokmu jala dibolokkon nasida ma tu laut akka batu, hau, dohot akka na asing naung maruppak.’
13 “‘Pasookku ma soara ni endemuna jala bahenokku ma dang tarbege be soara ni harpamuna i.+
14 Bahenokku ma ho gabe dolok batu na gundul. Bahenokku ma ho gabe inganan lao manjomur jaring ni panjala.+ Dang lao dipajongjong be ho gabe sada kota. Ai Au do Jahowa, Au sandiri do naung mandok i,’ ninna Jahowa Tuan Natumimbul i.
15 “Songon on do hata ni Jahowa Tuan Natumimbul i tu Tirus, ‘Mabiar do akka halak na di akka pulo tikki dibege nasida soara ni tembokmu na maruppak i. Mabiar do nasida mambege soara ni angguk-angguk ni halak na naeng mate. Jala mabiar+ do nasida tikki godang halak na dipamate di tonga-tongamuna.
16 Turun ma sian tahta ni nasida sude pamimpin na adong di laut. Dibukka nasida ma jubah ni nasida dohot baju ni nasida na disulam i. Hitir-hitir ma nasida alani biarna. Hundul ma nasida di tano huhut hitir-hitir jala longang ma nasida mangida ho.+
17 Diendehon nasida ma ende andung-andung+ taringot tu ho. Didok nasida ma,
“Ai boasa boi hancur ho,+ ale kota na sai dipuji-puji, kota na pangisina marlayar di laut,Gogo do ho di laut+ rap dohot pendudukmu,Dibahen ho do sude halak na di tano on mabiar tu ho!
18 Di ari tikki na maruppak i tembokmu, humutur ma akka pulo,Jala di tikki na hancur i ho, busisaon ma akka pulo na adong ditonga-tonga ni laut.”’+
19 “Songon on ma hata ni Jahowa Tuan Natumimbul i, ‘Bahenokku ma ho hancur songon kota na so diingani. Bahenokku ma godang aek na margalumbang manutupi ho jala mambahen ho maup.+
20 Tikki masa i, bahenokku ma ho turun tu kuburan dos songon Au mamboan turun sude halak na asing. Boanokku ma ho turun tu inganan ni halak naung leleng mate. Bahenokku ma ho tinggal di inganan na uttoru, rap dohot sude halak na turun tu kuburan.+ Jala bahenokku ma ingananmu songon kota naung leleng hancur. Alani i dang na lao diingani be ho. Dung i, bahenokku ma lam uli luat ni akka halak na mangolu.
21 “‘Toppu ma parookku hasusaan tu ho jala mago ma ho sian tonga-tonga ni jolma.+ Luluan ni akka halak ma ho, alai dang na lao dapot ni nasida ho,’ ninna Jahowa Tuan Natumimbul i.”
