Hesekiel 17:1-24
17 Dung i didok Jahowa ma muse tu au,
2 “Ale anak ni jolma, paboa ma sada teka-teki dohot uppasa taringot tu halak Israel.+
3 Dokkon ma, ‘Songon on do hata ni Jahowa Tuan Natumimbul i, “Adong ma sada lali na balga+ ro tu Libanon,+ jala songgop di pussu ni hau ares.+ Habong ni lali i bidang jala ganjang, godang ibbuluna jala marwarna-warni.
4 Dung i, diponggolhon ibana ma tunas na di pussu ni hau i. Diboan ibana ma i tu luat ni halak Kanaan* jala disuan ma i di kota ni nasida.+
5 Dibuat ibana ma muse boni sian luat i,+ jala disuan ibana ma i di ladang na subur. Disuan ibana ma i songon na manuan hau wilow* na tubu di labbung ni godang aek.
6 Martunas ma boni i jala tubu gabe hau anggur na manjirir di tano.+ Marlekkuk ma akka dakkana jala tubu ma uratna di toru. Gabe hau anggur ma boni i, na martunas jala na mardakkai.+
7 “‘“Dung i ro ma lali na balga na asing.+ Habongna bidang jala ganjang.+ Gabe naeng hatop ma manjirir urat ni hau anggur i doppak lali na balga i. Manjirir ma i dao sian ladang inganan panuananna. Diarahon ma dakkana doppak lali i asa dapotna aek sian lali i.+
8 Hape nungnga disuan boni i di ladang na denggan di labbung ni aek na godang asa boi mardakkai, marparbue, jala gabe hau anggur na massai denggan.”’+
9 “Dok ma, ‘Songon on ma hata ni Jahowa Tuan Natumimbul i, “Boi do denggan tubu hau i? Dang cabuton ni sasahalak uratna,+ laos gabe busuk parbuena jala gabe malos tunasna i?+ Ai na lao koring do hau anggur i sappe boi ma cabuton ni halak uratna. Dang pola porlu tangan na gogo jala godang halak lao mancabut i.
10 Nang pe disuan muse hau anggur i di inganan na asing, boi do i denggan mangolu? Ai molo mangullus alogo na sian timur gabe koring situtu ma i, gabe koring ma i di ladang ingananna martunas i.”’”
11 Didok Jahowa ma muse tu au,
12 “Paboa ma tu bangso na mangalo i, ‘Na so diboto hamu do lapatan ni on sude?’ Dok ma, ‘Ida ma! Ro nama raja ni Babel tu Jerusalem. Takkuponna ma rajana dohot akka pejabatna. Boanonna ma nasida tu Babel.+
13 Dung i diboan raja ni Babel ma sahalak sian pinoppar ni raja.+ Dibahen raja i ma parjanjian dohot ibana jala disuru raja ma ibana marsumpa.+ Diboan raja ni Babel ma akka halak na sangap na adong di luat i,+
14 asa unang margogo be harajaon i jala dang boi be jongjong. Ai holan sada nama carana asa boi harajaon i martahan, i ma ikkon oloan ni nasida do parjanjian naung dibahen.+
15 Alai ujungna, mangalo do raja ni Juda tu raja ni Babel.+ Disuru ibana do halak tu Mesir lao manjalo hoda+ dohot tentara na godang sian nasida.+ Marhasil do ibana? Tung boi ma halak na mangulahon i sude malua sian hukuman? Boi do ibana dang hona hukum hape nungnga dilanggar ibana parjanjian?’+
16 “‘“Songon pastina Au Debata na mangolu,”* ninna Jahowa Tuan Natumimbul i, “pasti mate do ibana di Babel, di inganan ni raja* na mambahen ibana gabe raja.* Ai leas do rohana tu sumpa na binahenna tu raja i jala dilanggar ibana do parjanjian naung dibahen ibana dohot raja i.+
17 Dang tolap pasukan na balga dohot tentara ni si Firaun na godang i mangurupi,+ tikki dipajongjong tentara ni Babel benteng dohot tembok lao pamatehon godang halak.
18 Leas do rohana tu sumpa jala dilanggar ibana do parjanjian na binahenna. Nang pe nungnga marjanji ibana, alai diulahon ibana do sudena i. Alani i, dang boi ibana malua sian hukuman.”’
19 “‘Songon on ma hata ni Jahowa Tuan Natumimbul i, “Songon pastina Au Debata na mangolu, bahenokku ma ibana makkilala akibat ni pambahenanna. Ai leas do rohana tu sumpa na binahenna tu Au+ jala dilanggar ibana do parjanjian na hubahen dohot ibana.
20 Husappatton ma jaring lao manakkup ibana. Jala masuk ma ibana tu jaring i.+ Huboan ma ibana tu Babel jala hukumokku ma ibana disi. Ai dang setia ibana tu Au.+
21 Mate ma bahenon ni podang sude tentarana na lari. Jala bahenonna ma marserak tu sude inganan*+ akka tentara na mangolu dope. Sian i botoonmuna ma na Au do Jahowa naung mandok i.”’+
22 “‘Songon on ma hata ni Jahowa Tuan Natumimbul i, “Ponggolhonokku ma sada tunas sian pussu ni hau ares na timbo i+ jala suanokku ma i. Ponggolhonokku do muse sada tunas na poso dope sian ratting ni hau i+ jala suanokku ma i di dolok na massai timbo.+
23 Suanokku ma i di atas ni dolok na massai timbo na adong di Israel. Tubu ma akka dakkana jala marparbue ma hau i. Gabe hau ares na massai denggan ma hau i. Marasari ma sude jenis ni pidong disi jala tinggal di akka dakkana.
24 Botoon ni sude hau na di ladang ma na Au do Jahowa. Botoonna ma naung huruppakkon hau na timbo jala hubahen timbo hau na pendek.+ Botoonna ma naung hubahen koring hau na lomak jala hubahen marbunga hau na koring.+ Botoonna ma Au do Jahowa naung mandok i jala na mangulahon i.”’”
Surat na di toru
^ Manang “luat ni akka partiga-tiga”.
^ Na nidokna, i ma jenis ni hau na timbo, dakkana ganjang, jala bulungna dang bidang.
^ Sumpa on patuduhon pasti do ikkon saut janji on, songon pastina Debata mangolu.
^ Na nidokna, i ma Raja Nebukadnesar.
^ Na nidokna, i ma Raja Sedekia.
^ As. “tu arah ni alogo mangullus”.
