5 Musa 23:1-25
23 “Molo adong sahalak bawa na so adong be buah zakarna, ala naung dihancurhon buah zakarna i manang dipotong alat kelaminna,* dang boi ibana gabe naposo ni Jahowa.+
2 “Dang boi anak haram gabe naposo ni Jahowa.+ Jala dang boi pinopparna nanggo sada pe na boi gabe naposo ni Jahowa.
3 “Dang boi halak Ammon dohot halak Moab gabe naposo ni Jahowa.+ Jala dang boi nanggo sada pe sian pinoppar ni nasida na boi gabe naposo ni Jahowa.
4 Ai dang dilehon nasida sipanganon dohot aek lao mangurupi hamu tikki na mardalan i hamu kaluar sian Mesir.+ Gariada digaji nasida do si Bileam anak ni si Beor na sian Petor di Mesopotamia lao mamburai* hamu.+
5 Alai dang ditangihon Jahowa Debatamuna i si Bileam.+ Gariada dipauba Jahowa Debatamuna i do bura i gabe pasu-pasu tu hamu.+ Ai dihaholongi Jahowa Debatamuna i do hamu.+
6 Saleleng mangolu hamu, dang boi urupanmuna nasida asa dame jala sonang ngolu ni nasida.+
7 “Unang sogo rohamuna tu halak Edom, ai keluargamuna dope nasida.+
“Unang sogo rohamuna tu halak Mesir, ai hea do hamu gabe panoppang di luat ni nasida.+
8 Akka pinoppar ni nasida sian sundut na patoluhon boi do gabe naposo ni Jahowa.
9 “Molo markemah hamu lao marporang mangalo musumuna, ikkon manat do hamu asa unang ramun.*+
10 Molo adong sahalak bawa na gabe ramun ala kaluar air manina,+ ikkon lao do ibana tu luar ni perkemahan, jala dang boi be ibana masuk tu perkemahan i.
11 Molo dung naeng borngin, ikkon maridi ma ibana. Dung i, boi ma ibana masuk tu perkemahan i dung bonom mataniari.+
12 Ikkon bahenonmuna do inganan lao buang kotoran di luar ni perkemahan. Tusi ma hamu lao molo naeng mambuang kotoran.
13 Ikkon adong do sekop di akka peralatanmuna. Tikki naeng buang kotoran hamu, gali hamu ma lubang pakke sekop i, dung i tutup hamu ma kotoranmuna i.
14 Ai Jahowa Debatamuna i do na mandongani hamu di perkemahanmuna+ lao paluahon hamu, jala lao pasahatton musumuna tu tanganmuna. Alani i, ikkon badia+ do perkemahanmuna, asa unang adong diida Ibana manang aha pe na ramun disi, na mambahen Ibana manadikkon hamu.
15 “Molo adong hatoban na lari sian tuanna jala ro tu hamu, unang pasahat be ibana tu tuanna i.
16 Boi do ibana tinggal rap dohot hamu, di inganan na dipillit ibana di sada sian kotamuna i, i ma di inganan na dia pe lomo ni rohana. Alai unang bahen hamu na jahat tu ibana.+
17 “Dang boi boru ni halak Israel gabe boru-boru na so hasea.*+ Jala anak ni halak Israel pe dang boi mangulahon seks dohot bawa.*+
18 Hepeng na dapot sian hasil ni ulaon gabe boru-boru na so hasea, manang hepeng* na dapot ni sahalak bawa ala mangulahon seks dohot bawa* pe dang boi diboan tu bagas joro ni Jahowa Debatamuna lao manggarar janji. Ai magigi do Jahowa Debatamuna tu ulaon na dua i.
19 “Molo dipapinjappon hamu tu donganmuna sabangso hepeng, sipanganon, dohot manang aha pe na boi dibahen bungana, unang pangido hamu asa digarar donganmuna i bungana.+
20 Boi do pangidoonmuna bunga ni pinjaman+ na dilehon hamu tu halak na sian bangso na asing. Alai dang boi dijalo hamu bunga ni pinjaman+ sian donganmuna sabangso. Bahen hamu ma songon i, asa dipasu-pasu Jahowa Debatamuna i sude na diulahon hamu di luat na lao buatonmuna i gabe appunamuna.+
21 “Molo dibahen hamu sada janji tu Jahowa Debatamuna,+ pittor ulahon hamu ma janjimuna i.+ Ai pangidoon ni Jahowa Debatamuna do i ikkon ulahononmuna. Molo dang diulahon hamu i, mardosa ma hamu.+
22 Alai molo dang dibahen hamu janji, dang mardosa hamu.+
23 Ikkon ulahononmuna do akka naung didok hamu lao ulahononmuna,+ jala ikkon pasautonmuna do janjimuna, songon pelean na dilehon sian na nionjar ni roha tu Jahowa Debatamuna.+
24 “Molo lao hamu tu ladang anggur ni donganmu sabangso, boi do allangonmuna anggurna i disi sappe butong. Alai dang boi bahenonmu anggur i tu karanjang+ lao boanonmu.
25 “Molo lao hamu tu ladang gandum ni donganmu sabangso jala dang boi dope dipanen gandum i, boi do diputik hamu gandum naung masak. Alai dang boi sabionmuna batang ni gandum+ ni donganmuna i.
Surat na di toru
^ Na nidokna dison, i ma sahalak bawa na mangulahon i ala naeng mangulahon seks na so patut dohot bawa.
^ Manang “mandok hata na jahat tu”.
^ Na nidokna dison, i ma sasahalak na manjual dirina manang na mangulahon seks ala manomba debata na so sittong.
^ Na nidokna dison, i ma sasahalak na manjual dirina manang na mangulahon seks ala manomba debata na so sittong.
^ Manang “gaji”.
^ As. “hepeng ni sada biang”.
