5 Musa 22:1-30
22 “Molo diida ho lilu lombu manang biru-biru ni donganmu, unang pasombu.+ Ikkon boanonmu do i mulak tu donganmi.
2 Alai molo padaohu do jabu ni donganmi sian jabum, manang dang ditanda ho ibana, ikkon boanonmu do binatang i tu jabum. Ikkon disi do toktong binatang i sahat tu na ro donganmi mangalului. Jala ikkon paulakonmu do i tu ibana.+
3 Songon i ma na ikkon ulahononmu molo dapotmu halode, manang pakkean, dohot manang aha pe appuna ni donganmu. Dang boi pasombuonmu songon i.
4 “Molo diida hamu madabu halode ni donganmu manang lombuna madabu di dalan, unang pasombu songon i. Ikkon urupanmu do ibana mangangkat binatang i.+
5 “Dang boi borua mamakke baju ni bawa, jala dang boi bawa mamakke baju ni borua. Ai magigi do Jahowa Debatamuna mangida halak na mangulahon sisongon i.
6 “Molo adong diida hamu asar ni pidong di hau manang di tano tikki di pardalanan hamu, jala adong disi anak ni pidong i manang tolorna, jala hundul do inang ni pidong i disi mangulosi anakna manang tolorna, dang boi buatonmuna inang ni pidong i rap dohot anakna.+
7 Ikkon paluaonmuna do inang ni pidong i. Alai boi do buatonmuna akka anakna i. Ulahon ma songon i asa denggan ngolumuna jala ganjang umurmuna.
8 “Molo dibangun hamu jabumuna, ikkon dibahen hamu do pagar tembok di atap ni jabu i,+ asa unang adong na madabu sian i, jala asa unang gabe marsala hamu ala adong na mate madabu sian i.*
9 “Unang suan hamu dua jenis bibit ni suan-suanan di ladang anggurmuna.+ Molo dibahen hamu songon i, gabe appuna ni tabernakel* ma sude hasil na sian ladang anggurmuna i dohot hasil na sian bibit na disuan i.
10 “Unang bahen hamu lombu dohot halode saauga* lao mambajak.+
11 “Unang pakke hamu baju na dibahen sian bonang wol na dicampur dohot linen.+
12 “Ikkon dibahen hamu do rambu di pinggir ni baju bagian toru na dipakke hamu.+
13 “Molo adong bawa na mambuat sahalak borua gabe istrina, jala mangulahon seks nasida, hape di pudian ni ari gabe sogo rohana tu borua i,*
14 ditudu bawa i ma naung mangulahon na so hasea borua i, jala gabe roa goar ni borua i dibahen, dung i didok, ‘Nungnga hubuat borua on gabe istrikku. Alai tikki mangulahon seks au dohot ibana, dang perawan be ibana,’
15 ikkon boanon ni omakna dohot bapak ni borua i ma bukti na patuduhon na perawan boruna i. Diboan ma i tu akka pangituai* na di gerbang ni kota.
16 Ikkon dokkonon ni bapak ni borua i do songon on tu pangituai, ‘Nungnga hulehon borukkon tu bawa on gabe istrina. Alai saonari, dang lomo be rohana* tu borukkon.
17 Jala ditudu ibana do borukkon naung mangulahon na so hasea. Alai, on ma bukti na patuduhon perawan dope borukki.’ Dipahembang nasida ma kain na gabe bukti tu jolo ni akka pangituai.
18 Diboan akka pangituai ni kota i+ ma bawa i jala dihukum.+
19 Ikkon didenda nasida do bawa i 100 sekel* perak, jala dilehon ma i tu bapak ni borua i. Ai nungnga marlea dibahen ibana boru ni Israel na perawan dope.+ Ikkon toktong ma borua i gabe istrina. Jala saleleng mangolu ibana, dang boi sirakkononna borua i.
20 “Alai molo tutu do hata ni bawa i, jala dang adong bukti na patuduhon na perawan dope borua i,
21 ikkon diboan do borua i tu pintu jabu ni bapakna. Dung i, didangguri halak na di kota i ma ibana pakke batu sappe mate. Ai nungnga parohon ila+ ibana tu Israel, ala mangulahon seks na so patut* di jabu ni bapakna.+ Songon i ma caramuna pasidikkon hajahaton sian tonga-tongamuna.+
22 “Molo adong sahalak bawa na mangulahon seks dohot istri ni bawa na asing, ikkon dipamate do nasida na dua, bawa dohot borua i.+ Songon i ma caramuna pasidikkon hajahaton sian tonga-tonga ni Israel.
23 “Molo adong anak boru na perawan naung martunangan, dung i pajuppang ibana dohot sahalak bawa di kota, jala mangulahon seks nasida,
24 ikkon boanonmuna do nasida na dua tu gerbang ni kota i jala didangguri pakke batu sappe mate. Dihukum do borua i, ala dang marsurak ibana minta tolong tikki di kota. Jala bawa i pe dihukum do, ala nungnga pailahon tunangan* ni donganna.+ Songon i ma caramuna pasidikkon hajahaton sian tonga-tonga ni Israel.
25 “Molo pajuppang sahalak bawa dohot sahalak anak boru naung martunangan di luar ni kota, jala diperkosa bawa i ibana, ikkon dipamate hamu do bawa i.
26 Alai unang bahen hamu manang aha tu borua i. Ai dang diulahon borua i dosa na mambahen ibana patut dihukum mate. Sarupa do parsoalan on tu parsoalan tikki diattuk sasahalak donganna jala gabe mate.+
27 Ai tikki na pajuppang bawa i dohot borua i di luar ni kota, marsurak do borua i minta tolong, alai dang adong na ro mangurupi ibana.
28 “Molo pajuppang sahalak bawa dohot anak boru na perawan jala dang martunangan dope, dung i dipaksa bawa i ibana mangulahon seks, jala tarboto+ nasida mangulahon i,
29 ikkon dilehon bawa i do 50 sekel perak tu bapak ni borua i, jala ikkon dibuat ibana do borua i gabe istrina.+ Saleleng mangolu ibana, dang boi sirakkononna borua i. Ai nungnga dibahen ibana maila borua i.
30 “Dang boi nanggo sahalak pe bawa mangulahon seks dohot istri ni bapakna. Ai molo diulahon ibana songon i, na pailahon bapakna do ibana disi.+
Surat na di toru
^ As. “na use mudarna sian i”.
^ As. “inganan na badia”.
^ Manang “dung i dang lomo rohana be tu borua i”.
^ Manang “nungnga sogo rohana”.
^ 1 sekel = 11,4 gram. Ida Lampiran B14.
^ Manang “ala gabe boru-boru na so hasea”.
^ As. “istri”. Molo di halak Heber, dos do halak na martunangan dohot halak na marhasohotan.
