5 Musa 2:1-37
2 “Dung i, belok ma muse hita tu arah gurun. Mardalan ma hita sian dalan na tu Laut Merah songon na nidok ni Jahowa tu au.+ Leleng do hita mardalan makkalilingi Dolok Seir.
2 Ujungna didok Jahowa ma tu au,
3 ‘Nga palelengku hamu makkalilingi dolok on. Saonari belok ma hamu tu sabola utara.
4 Paboa ma paretta on tu bangso i, “Lewatanmuna do annon parbatasan ni luat ni pinoppar ni si Esau+ hahamuna i, na maringanan di Seir.+ Mabiar do nasida tu hamu.+ Alai ikkon manat situtu do hamu.
5 Unang bahen hamu parsoalan* tu nasida. Ai dang lehonokku luat ni nasida tu hamu nanggo apala satalapak ni pat pe. Ai nungnga hulehon Dolok Seir gabe appuna ni si Esau.+
6 Ikkon gararonmuna do sipanganon na lao allangonmuna dohot aek na lao inumonmuna.+
7 Ai nungnga dipasu-pasu Jahowa Debatamuna i sude ulaonmuna. Takkas do diboto Ibana songon dia pardalananmuna di gurun na bidang on. Saleleng 40 taon on, sai didongani Jahowa Debatamuna do hamu, jala dang hahurangan manang aha hamu.”’+
8 Dung i lewat ma hita sian luat ni pinoppar ni si Esau+ abangta i, na maringanan di Seir. Lam dao ma hita sian dalan na tu Araba, sian Elat, dohot sian Esion-geber.+
“Dung i belok ma muse hita jala mardalan sian dalan na tu Gurun Moab.+
9 Didok Jahowa ma tu au, ‘Unang bahen parsoalan dohot halak Moab. Jala unang marporang dohot nasida. Dang na lao lehonokku nanggo saotik pe tano ni nasida tu hamu. Ai nungnga hulehon luat i tu halak Ar pinoppar ni si Lot.+
10 (Najolo halak Emim+ do na tinggal disi. Bangso na gogo do nasida jala godang do rakyatna. Timbo do nasida songon halak Anakim.
11 Halak Repaim+ pe dirippu do songon halak Anakim.+ Jala didok halak Moab do nasida halak Emim.
12 Najolo halak Hori+ do na tinggal di Seir. Alai ro ma pinoppar ni si Esau mambuat luat i. Dipamate ma sude halak Hori i, jala gabe nasida ma na maringanan disi.+ Songon i ma na lao bahenon ni halak Israel tu luat na lao lehonon ni Jahowa gabe appuna ni nasida.)
13 Saonari lao ma hamu lewat sian Rura* Zered.’ Dung i lao ma hita lewat sian Rura* Zered.+
14 Saleleng 38 taon ma hita mardalan sian Kades-barnea sahat tu bariba ni Rura* Zered, sahat tu na mate sude bawa na boi marporang songon na disumpahon Jahowa tu nasida.+
15 Marhite huasona,* dipamate+ Jahowa do nasida sude sian tonga-tongatta.
16 “Dung mate sude bawa na boi marporang sian tonga-tonga ni bangso i,+
17 didok Jahowa ma muse tu au,
18 ‘Sadari on, lewat nama hamu sian Ar, luat ni halak Moab i.
19 Molo dung jonok hamu tu luat ni halak Ammon, unang gugai hamu nasida, manang unang bahen hamu parsoalan tu nasida. Ai dang na lao lehonokku nanggo saotik pe luat ni halak Ammon i tu hamu. Nungnga hulehon luat i tu pinoppar ni si Lot jala gabe appuna ni nasida ma i.+
20 Najolo, didok do luat i luat ni halak Repaim.+ (Hea do halak Repaim tinggal disi jala didok halak Ammon do nasida Samsumi.
21 Bangso na gogo do nasida jala godang rakyatna. Timbo do nasida songon halak Anakim.+ Alai dipamate Jahowa do nasida di jolo ni halak Ammon. Dung i, dibuat halak Ammon ma luat i jala nasida ma na tinggal disi.
22 Songon i do muse na dibahen Ibana tu akka pinoppar ni si Esau na tinggal di Seir+ saonari. Dipamate Ibana do halak Hori+ di jolo ni akka pinoppar ni si Esau, asa boi dibuat nasida luat i. Dung i nasida ma na tinggal disi sahat tu sadari on.
23 Taringot tu halak Awi, maringanan ma nasida di akka huta na di Gasa.+ Disi ma nasida maringanan sahat tu na ro halak Kaptorim,+ i ma halak na sian Kaptor* pamatehon nasida. Dibuat nasida ma luat i jala disi ma nasida tinggal.)
24 “‘Borhat ma hamu, jala mardalan ma hamu manaripari Rura* Arnon.+ Ai nungnga hupasahat tu tanganmuna si Sihon+ raja ni Hesbon halak Amori i. Alani i, buat hamu ma luat ni nasida i gabe appunamuna, jala marporang ma hamu mangalo ibana.
25 Mulai sadari on, bahenokku ma mabiar sude bangso na di toru ni langit on, dung dibege nasida barita taringot hamu. Bahenokku ma nasida busisaon jala makkahitir* alani hamu.’+
26 “Dung i, tikki di Gurun Kadermat,+ husuru do piga-piga halak manjuppangi si Sihon raja ni halak Hesbon lao paboahon hata na patuduhon dame ni roha+ on,
27 ‘Paloas ma au tuan lewat sian luatmon. Holan mardalan sian jalan raya pe au. Dang pola manirpang au tu kanan manang na tu kiri.+
28 Holan sipanganon dohot siinumon na digadis tuan i pe na huallang jala huinum. Paloas ma au lewat sian luatmon,
29 asa boi hutaripari Sunge Jordan lao tu luat na lao lehonon ni Jahowa Debatanami i tu hami. Ai songon i do dibahen pinoppar ni si Esau na tinggal di Seir dohot halak Moab na tinggal di Ar tu au.’
30 Alai dang dipaloas si Sihon raja ni halak Hesbon i hita lewat sian luatna. Ai dipasombu Jahowa Debatamuna i do ginjang rohana+ jala jogal rohana, asa boi pasahatonna ibana tu hamu songon na masa saonari.+
31 “Dung i didok Jahowa ma tu au, ‘Ida ma! Nungnga hupasahat be si Sihon dohot luatna i tu ho. Saonari buat ma luatna i gabe appunam.’+
32 Tikki ro si Sihon dohot sude tentarana marporang mangalo hita di Jahas,+
33 dipasahat Jahowa Debatanta i do ibana tu tanganta. Boi ma tataluhon ibana, akka anakna, dohot sude tentarana.
34 Tataluhon do sude kotana. Tahancurhon do ganup kotana, tapamate do sude bawa, borua, dohot akka dakdanak. Dang adong na tapasombu mangolu.+
35 Holan akka binatang na dipiaro nasida do na tabuat di hita. Jala tabuat do muse akka barang na sian akka kota na tataluhon i.
36 Sian Aroer+ na di topi ni Rura* Arnon (dohot ma i akka kota na di rura i), sahat tu Gilead, dang adong kota na maol tabuat tung pe timbo akka tembokna. Ai dipasahat Jahowa Debatanta i do sude tu tanganta.+
37 Alai dang boi hamu jonok tu luat ni halak Ammon,+ tu sude huta na di topi ni Rura* Jabok,+ dohot tu akka kota na di inganan na mardolok-dolok, manang tu sude inganan na diorai Jahowa Debatanta i lao taporangi.
Surat na di toru
^ Manang “Unang marsoal”.
^ As. “tanganna”.
^ Na nidokna, i ma Pulo Kreta.
^ Manang “songon pangae ni sahalak ina na lao partus”.
