4 Musa 36:1-13
-
Borua na mandapot parbagianan (1-13)
36 Dung i ro ma akka kepala keluarga na sian pinoppar ni si Gilead, anak ni si Mahir,+ anak ni si Manasse, na sian pinoppar ni si Josep manjuppangi si Musa dohot akka pamimpin ni halak Israel.
2 Didok nasida ma, “Nungnga disuru Jahowa tuan mambagi luat on mamakke undi+ gabe tano parbagianan ni halak Israel. Jala disuru Jahowa do tuan mangalehon tano parbagianan ni si Zelapehat dongan tubunami i tu akka boruna.+
3 Molo muli nasida tu bawa na sian marga na asing sian halak Israel, buaton ni bawa i ma tano parbagianan ni akka boru ni si Zelapehat i, i ma na dibuat sian parbagianan ni ompunami i. Tambaanna ma tano parbagianan i tu tano parbagianan ni bawa na sian marga na asing i. Gabe moru ma tano parbagianannami na dibagi marhite undi i.
4 Molo masa taon Yobel+ di Israel, ditambahon do muse tano parbagianan ni borua i tu tano parbagianan ni bawa na sian marga na asing i. Alani i, dibuat ma muse tano parbagianan ni ompunami i lao gabe tano parbagianan ni nasida.”
5 Dung i dipaboa si Musa ma tu halak Israel akka paretta ni Jahowa, “Sittong do na nidok ni marga na sian pinoppar ni si Josep i.
6 Songon on ma paretta ni Jahowa tu akka boru ni si Zelapehat, ‘Boi do nasida muli tu manang ise pe lomo ni roha ni nasida. Alai ikkon muli tu bawa na sian marga ni bapakna do nasida.
7 Dang boi pinda tano parbagianan ni halak Israel sian sada marga tu marga na asing. Ikkon hot do toktong di halak Israel tano parbagianan ni marga ni ompu ni nasida.
8 Ganup borua na mandapot tano parbagianan di tonga-tonga ni marga ni Israel, ikkon muli tu sahalak bawa na sian pinoppar ni marga ni bapakna.+ Marhite songon i ma boi toktong hot tano parbagianan ni ompuna be.
9 Dang boi pinda tano parbagianan ni halak Israel sian sada marga tu marga na asing. Ai ikkon dipartahatton ganup marga ni Israel do tano parbagianan ni ompu ni nasida.’”
10 Diulahon akka boru ni si Zelapehat do sude songon na diparettahon Jahowa tu si Musa.+
11 Alani i, muli ma akka boru ni si Zelapehat,+ i ma si Mala, si Tirza, si Hoglah, si Milka, dohot si Noah tu pinoppar ni haha anggi ni bapakna.
12 Gabe istri ni akka bawa na sian pinoppar ni si Manasse anak ni si Josep ma nasida. Jala toktong ma tano parbagianan ni nasida i gabe appuna ni marga ni bapak ni nasida.
13 Akka i ma paretta dohot aturan na dilehon Jahowa tu halak Israel marhite si Musa. Dilehon do i di Gurun Moab na di bariba ni Sunge Jordan, na di jonok ni kota Jeriko.+
