4 Musa 19:1-22
-
Lombu na merah dohot aek lao pabadiahon (1-22)
19 Makkatai ma muse Jahowa tu si Musa dohot tu si Aron, ninna ma,
2 “On ma aturan na diparettahon Jahowa, ‘Dokkon ma tu halak Israel asa dibuat sada lombu na merah di ho. Ikkon sehat do lombu i, dang cacat,+ jala dang hea manarik boban.*
3 Lehon ma i tu Malim Eleasar, asa diboan ibana lombu i tu luar ni perkemahan. Ikkon di jolona do diseat lombu i.
4 Ikkon buaton ni Malim Eleasar ma deba mudar ni lombu i mamakke jari-jarina, jala dipispisson ma i pitu hali doppak kemah parpunguan.+
5 Ditutung ma lombu i di jolona. Ikkon ditutung do sude kulitna, jagalna, mudarna dohot kotoranna.+
6 Buaton ni malim ma hau ares, suan-suanan hisop,*+ dohot kain na merah. Dung i, disappatton ma sudena i tu api na manutung lombu i.
7 Disussi malim i ma bajuna jala maridi ma ibana. Dukkon i pe asa boi ibana masuk tu perkemahan. Alai ramun* ma ibana sahat tu na bonom mataniari.
8 “‘Ikkon sussion ni halak na manutung lombu i do bajuna, jala ikkon maridi do ibana. Alai ramun ma ibana sahat tu na bonom mataniari.
9 “‘Sasahalak na so ramun ikkon papunguhon abu ni lombu i.+ Jala ikkon disippan ma i di sada inganan naung ditottuhon di luar ni perkemahan. Ikkon disippan halak Israel do i, asa adong pakkeon ni nasida tikki paradehon aek na dipakke tu ulaon pabadiahon,+ i ma pelean hasesaan ni dosa.
10 Halak na papunguhon abu i ikkon manussi bajuna jala gabe ramun sahat tu na bonom mataniari.
“‘On ma peraturan na marlakku saleleng ni lelengna tu halak Israel dohot tu halak na sian bangso na asing na rap tinggal dohot hamu.+
11 Manang ise pe na manjama bakke ni halak, gabe ramun ma ibana saleleng pitu ari.+
12 Ikkon dipabadia ibana do dirina mamakke aek i di ari na patoluhon, jala di ari na papituhon dang ramun be ibana. Alai molo dang dipabadia ibana dirina di ari na patoluhon, toktong dope ibana ramun di ari na papituhon.
13 Molo adong halak na manjama bakke ni jolma, alai dang dipabadia ibana dirina, nungnga ramun be dibahen ibana tabernakel ni Jahowa.+ Alani i, ikkon dipamate do ibana.+ Ai dang dipispisson dope tu ibana aek na dipakke tu ulaon pabadiahon i.+ Jadi, toktong ma ibana ramun.
14 “‘On ma patik na marlakku molo adong halak na mate di sada kemah: Manang ise na masuk tu kemah i jala manang ise na adong di kemah i gabe ramun ma saleleng pitu ari.
15 Jala ramun+ do sude inganan na so gomos ditutup.*
16 Manang ise na manjama bakke ni halak na mate di luar ni perkemahan, manang na manjama holi-holi ni jolma na mate, manang na manjama halak na dipamate pakke podang, manang na manjama kuburan, gabe ramun ma ibana saleleng pitu ari.+
17 Lao pabadiahon halak na ramun i, ikkon buaton ni nasida do saotik abu ni pelean hasesaan ni dosa na ditutung i. Dibahen ma i tu sada inganan, jala diusehon ma aek na ias tusi.
18 Dung i, buaton ni sasahalak na so ramun+ ma suan-suanan hisop,+ jala disornoppon ma tu aek i. Ikkon dipispisson ibana ma i tu kemah, tu sude baskom, dohot tu sude halak na adong disi, tu halak na manjama holi-holi, manang bakke, manang kuburan, manang na manjama halak na dibunu.
19 Ikkon dipispisson halak na so ramun i do aek i muse tu halak na ramun i di ari na patoluhon dohot di ari na papituhon.+ Jala di ari na papituhon, ikkon dipabadia do halak na ramun i. Dung i, disussi halak na ramun i ma bajuna jala maridi ma ibana. Dung bonom mataniari, dang ramun be ibana.
20 “‘Alai ikkon dipamate do halak na ramun na so pabadiahon dirina.+ Ai nungnga dibahen ibana ramun inganan na badia ni Jahowa. Dang dipispisson aek na dipakke tu ulaon pabadiahon i tu ibana, alani i ramun ma ibana.
21 “‘On ma peraturan na marlakku tu hamu saleleng ni lelengna: Ikkon disussi halak na mamispisson aek na dipakke tu ulaon pabadiahon i+ do bajuna, jala halak na manjama aek i gabe ramun sahat tu na bonom mataniari.
22 Manang aha pe na dijama halak na ramun i, gabe ramun do. Jala manang ise pe na manjama i gabe ramun do sahat tu na bonom mataniari.’”+
