2 Samuel 7:1-29
7 Nungnga tinggal di istana be Raja Daud.+ Dibahen Jahowa do dame ngoluna jala dang ro be akka musuna mangalo ibana.
2 Didok raja i ma tu Panurirang* Natan,+ “Di istana na sian hau ares do au tinggal,+ hape di kemah dope poti parpadanan ni Debata na sittong i.”+
3 Dialusi si Natan ma, “Bahen ma na denggan di roham. Ai didongani Jahowa do ho.”+
4 Alai di borngin i, didok Jahowa ma tu si Natan,
5 “Lao ma ho, jala paboa ma tu naposokku si Daud, ‘On ma na nidok ni Jahowa, “Porlu do huroa pajongjongonmu sada jabu inganakku?+
6 Ai mulai sian huboan kaluar bangso Israel sian Mesir sahat tu sadari on, dang hea Au tinggal di sada jabu.+ Alai pinda* do Au sian sada inganan tu inganan na asing, jala tinggal di sada kemah dohot tabernakel.+
7 Saleleng rap Au mardalan dohot sude halak Israel, hea huroha husukkun, ‘Boasa dang dipajongjong hamu sada jabu na sian hau ares di Au?’ Dang hea hudok songon i tu manang ise pe sian pamimpin ni Israel, na hupillit gabe parmahan ni bangsokku Israel.”’
8 Saonari, dokkon ma tu si Daud naposokki, ‘Songon on do didok Jahowa Pamimpin ni Akka Tentara,* “Najolo, marmahan biru-biru do ho.+ Alai hubahen do ho gabe pamimpin ni bangsokku Israel.+
9 Alani i, donganakku do ho manang tudia pe ho lao.+ Pamateonku* do sude musum di jolom.+ Jala bahenokku do tarbarita goarmu+ songon halak na tarbarita goarna di tano on.
10 Pillitokku ma sada inganan di bangsokku Israel jala toktong ma nasida maringanan disi. Dang adong be na mambahen nasida susa disi. Jala dang siksaon ni halak na jahat be nasida songon najolo.+
11 Ai disiksa do nasida mulai sian na hupillit akka panguhum+ di Israel. Alai, dang gangguon ni akka musum be ho.+
“‘“Jala nungnga didok Jahowa tu ho, bahenon ni Jahowa do akka pinopparmu+ toktong gabe raja.*
12 Molo dung mate ho,*+ jala dikubur rap dohot akka ompum, bahenokku ma pinopparmu* gabe raja. Jala anakmu sandiri do pillitokku manggattihon ho. Bahenokku do hot harajaonna.+
13 Pajongjongonna do sada jabu lao pasangappon goarhu.+ Jala bahenokku do hot tahta harajaonna saleleng ni lelengna.+
14 Au ma na gabe Bapakna jala ibana gabe anakku.+ Molo sala ibana, pissangokku ma ibana.* Jala lao manghukum ibana, libasokku ma ibana songon na binahen ni jolma.*+
15 Dang bahenokku tu ibana songon na hubahen tu si Saul na hutolak i.+ Alai toktong do hupatuduhon holong ni rohakku* tu ibana.
16 Sai hot do pinopparmu dohot harajaonmu saleleng ni lelengna jala sai hot do tahtam saleleng ni lelengna.”’”+
17 Dipaboa si Natan do tu si Daud sude hata dohot parnidaan i.+
18 Dung i masuk ma Raja Daud tu kemah i jala hundul ma ibana di jolo ni Jahowa. Didok ibana ma, “Ai ise ma huroa au, ale Jahowa Tuan Natumimbul? Jala ise ma huroa keluargakku, pola dibahen Ho godang na denggan tu au?+
19 Hape godang nai na lao bahenonmu, ale Jahowa Tuan Natumimbul. Dipaboa Ho do aha na lao masa di ari na naeng ro taringot tu pinoppar ni naposomon. Jala on do paretta* na dipaboa Ho tu sude jolma, ale Jahowa Tuan Natumimbul.
20 Dang adong be na boi dohonokku tu Ho, ale Jahowa Tuan Natumimbul. Ai takkas do ditanda Ho au naposomon.+
21 Dibahen Ho do godang na denggan tu au alani hatami dohot alani lomo ni roham. Jala dipaboa Ho do i tu au naposomon.+
22 Alani i ma umbahen na massai sangap Ho,+ ale Jahowa Tuan Natumimbul. Sude na hubege hami patuduhon dang adong na songon Ho,+ jala dang adong Debata asing ni Ho.+
23 Dang adong bangso na asing di tano on na songon bangsom Israel.+ Ale Debata, ditobus Ho do nasida jala dibahen Ho do nasida gabe bangsom.+ Dibahen Ho do akka ulaon halongangan* di nasida+ asa tarbarita goarmu.+ Dipalao Ho do bangso na asing dohot akka debata ni nasida alani bangsom, naung ditobus Ho sian Mesir asa gabe bangsom.
24 Nungnga dibahen Ho bangso Israel gabe bangsom saleleng ni lelengna.+ Jala Ho do na gabe Debata ni nasida,+ ale Jahowa.
25 “Ale Debata Jahowa, pasaut ma janjim taringot tu naposomon dohot taringot tu pinopparhu saleleng ni lelengna. Jala anggiat ma i dipasaut Ho songon na dijanjihon Ho tu au.+
26 Sai anggiat ma dipasangap goarmu saleleng ni lelengna,+ asa didok halak, ‘Jahowa Pamimpin ni Akka Tentara i do Debata ni halak Israel.’ Jala anggiat ma pinoppar ni naposomon toktong gabe raja di jolom saleleng ni lelengna.*+
27 Ale Jahowa Debata ni Israel, Pamimpin ni Akka Tentara, barani pe au mandok songon i di tangiakku ala nungnga dipaboa Ho do tu naposomon, ‘Bahenokku do akka pinopparmu toktong gabe raja.’*+
28 Ale Jahowa Tuan Natumimbul, Ho do Debata na sittong, jala hatami do hasittongan.+ Dijanjihon Ho do akka na denggan tu naposomon.
29 Alani i, sai anggiat ma dipasu-pasu Ho pinoppar ni naposomon asa toktong mamaretta saleleng ni lelengna di jolom.+ Ale Jahowa Tuan Natumimbul, nungnga dijanjihon Ho i jala anggiat ma dipasu-pasu Ho pinoppar ni naposomon saleleng ni lelengna.”+
Surat na di toru
^ As. “mardalan”.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang “Taluhonokku”.
^ As. “na lao pajongjongon ni Jahowa sada jabu di ho”.
^ As. “dung dipeakkon ho rap dohot akka ompum”. Puisi lao manggombarhon hamatean.
^ As. “boni”.
^ Manang boi do “akka anak ni si Adam”.
^ As. “pissangokku ma ibana mamakke tukkot ni jolma”.
^ Manang “tudu-tudu”.
^ Manang “mukjizat”.
^ As. “Jala anggiat ma hot jabu ni naposomon di jolom”.
^ As. “Pajongjongokku do sada jabu di ho”.
