2 Samuel 12:1-31
12 Disuru Jahowa ma si Natan+ mandapotton si Daud. Dung juppang nasida,+ didok si Natan ma, “Adong ma dua halak bawa di sada kota. Na sada na mora jala na sada nai na pogos.
2 Massai godang do biru-biru dohot lombu ni na mora i.+
3 Alai holan sada do biru-biru ni na pogos i, boru-boru do i, jala gelleng dope. Na dituhor ibana do biru-biru i.+ Dipiaro ibana do biru-biru i jala rap tinggal do bawa na pogos i, akka anakna, dohot biru-biruna i. Nang pe holan saotik sipanganon ni nasida, dibagi do tu biru-biru i, sapanginuman do nasida jala sai diabing-abing do i. Songon boruna do dibahen biru-biruna i.
4 Di sada tikki, ro ma tamu ni na mora i. Naeng dilean na mora i ma ibana mangan. Alai, dang biru-biru dohot lombuna na diseat. Dibuat ibana do anak ni biru-biru ni na pogos i, diloppa ma i lao allangon ni tamuna i.”+
5 Mambege i, muruk situtu ma si Daud jala didok ma tu si Natan, “Songon pastina Jahowa mangolu,*+ ikkon pamateon do bawa na mambahen songon i!
6 Ikkon gararonna do opat hali loppit gatti ni anak ni biru-biru i.+ Ai kejam do pambahenanna i.”*
7 Didok si Natan ma tu si Daud, “Ho do bawa i! Songon on ma hata ni Jahowa Debata ni Israel, ‘Au do na mamillit* ho gabe raja ni Israel.+ Jala Au do na paluahon ho sian tangan ni si Saul.+
8 Hupasahat do sude tu ho rumah tangga ni tuanmu+ dohot akka istrina.+ Hupillit do ho lao mamaretta Israel dohot Juda.+ Molo hurang dope ninna roham, tambaakku dope godang nai.+
9 Boasa ma leas roham mangida Jahowa? Boasa ma diulahon ho sogo ni rohana? Dipamate ho do si Uria halak Het i mamakke podang!+ Dung dipamate halak Ammon ibana, dibuat+ ho do istrina.+
10 Alani i, toktong ma mate hona podang pinopparmu.+ Ai leas do roham mangida Au. Dibuat ho do istri ni si Uria halak Het i gabe istrim.’
11 Songon on ma hata ni Jahowa, ‘Sian keluargam sandiri do bahenokku jea tu ho.+ Buatokku ma sian jolom akka istrim jala lehonokku tu bawa na asing.+ Rap modom ma nasida* dohot bawa i di jolo ni godang halak.+
12 Martabuni-tabuni do ho tikki mangulahon i,+ alai anggo Au patar do i bahenokku di jolo ni sude halak Israel.’”
13 Didok si Daud ma tu si Natan, “Nungnga mardosa be au tu Jahowa.”+ Didok si Natan ma, “Sesaon ni Jahowa do dosami.*+ Alani i, dang pamateonna ho.+
14 Alai, ala nungnga leas roham mangida Jahowa, ikkon mate do anakmu na baru tubu i.”
15 Mulak ma si Natan tu jabuna.
Dung i, dibahen Jahowa ma marsahit anak ni si Daud tubu ni istri ni si Uria i.
16 Martangiang ma si Daud tu Debata na sittong anggiat malum nian anakna i. Marpuasa ma ibana jala modom di lante ni kamarna do ibana saborngin i.+
17 Jongjong ma akka pejabat na di istana i di labbungna. Naeng ditogu nasida ma ibana sian lante i, alai dang olo ibana. Jala dang olo si Daud ditogihon mangan rap dohot nasida.
18 Dung ari papituhon, mate ma dakdanak i. Alai, mabiar do akka parkarejona paboahon tu si Daud. Didok nasida do, “Haru mangolu dope dakdanak i dang olo be ibana mangalusi hita. Lam tapaboa ma naung mate dakdanak i? Sotung lam marsak ibana.”
19 Diida si Daud ma marhusipi akka parkarejona i. Diboto ibana ma naung mate dakdanak i, jala disukkun ma nasida, “Naung mate do dakdanak i?” Dialusi nasida ma, “Ido. Nungnga mate be dakdanak i.”
20 Hehe ma si Daud sian lante i, maridi ma ibana, dimiahi ma dagingna,+ digatti ma abitna, lao ma ibana tu jabu ni+ Jahowa jala marsomba ma ibana. Dung i, mulak ma ibana tu istana jala disuru ibana ma asa diparade sipanganon jala mangan ma ibana.
21 Disukkun akka parkarejona i ma ibana, “Ai boasa gabe songon on ho tuan? Tikki mangolu dakdanak i, marpuasa do ho jala sai holan na tangis. Alai dung mate ibana, gabe hehe do ho jala mangan.”
22 Didok si Daud ma, “Ai didok rohakku, molo marpuasa au+ jala sai tangis au, gabe asi ma roha ni Jahowa tu au jala pasombuonna mangolu dakdanak i. Alani i ma hubahen songon i tikki mangolu dakdanak i.+
23 Saonari, nungnga mate be dakdanak i. Dang adong be gunana marpuasa au. Ai boi be huroa bahenokku ibana mangolu?+ Au nama mandapotton ibana,+ alai anggo ibana dang boi be mulak tu au.”+
24 Dung i didapotton si Daud ma istrina si Bat-seba jala diapuli ma ibana.+ Rap modom ma nasida* jala ditubuhon ma sada anak. Digoari ma anakna i si Salomo.*+ Holong do roha ni Jahowa tu dakdanak i.+
25 Disuru Jahowa ma Panurirang* Natan+ mambahen goar ni dakdanak i si Jedidia.* Ai holong do rohana tu ibana.
26 Torus ma si Joab marporang mangalo halak Ammon+ na di Rabba.+ Jala ditaluhon ibana ma kota na balga* i.+
27 Disuru si Joab ma halak mandok tu si Daud, “Nungnga marporang au tu Rabba+ jala nungnga hutaluhon kota haroroan ni aek i.*
28 Saonari, papungu ma akka tentara na adong disi, markemah ma hamu jala taluhon ma kota i. Ai molo au na manaluhon kota i, gabe goarhu ma annon na tarbarita.”
29 Dung i, dipapungu si Daud ma sude tentarana, lao ma ibana marporang tu Rabba jala ditaluhon ma kota i.
30 Dibuat si Daud ma mahkota na sian ulu ni si Malkam* jala dipakke ibana ma i. Sian mas do mahkota i. Boratna hira-hira 34 kilogram* jala dibahen do muse akka batu na arga tu mahkota i. Dibuat si Daud do godang arta+ ni pangisi ni kota i.+
31 Diboan si Daud ma muse pangisi ni kota i jala dibahen ma nasida gabe parkarejona. Disuru ma nasida karejo mambola batu, mamakke alat na sian bosi na tajom, mamakke kampak, jala mambahen batu bata. Songon i ma dibahen si Daud tu sude kota ni halak Ammon. Ujungna, mulak ma si Daud dohot akka tentarana tu Jerusalem.
Surat na di toru
^ Sumpa on patuduhon pasti do ikkon saut janji on, songon pastina Debata mangolu.
^ Manang “Ai dang adong asi ni rohana”.
^ Manang “Mangulahon seks ma nasida”.
^ Manang “Nungnga disalpuhon Jahowa be dosami”.
^ Di bahasa Heber lapatanna “Dame”.
^ Manang “Mangulahon seks ma nasida”.
^ Lapatanna, “Dihaholongi Jahowa”.
^ Manang “kota harajaon”.
^ As. “kota aek”.
^ Ra, on patung na disomba ni halak Ammon. Piga-piga hali digoari do on Molek manang Milkom.
^ As. “sada talenta”. Ida Lampiran B14.
