1 Samuel 24:1-22
24 Dung sae si Saul marporang mangalo halak Palistim, adong ma na paboahon tu ibana, “Di gurun na di En-gedi do si Daud.”+
2 Dipillit si Saul ma 3.000 tentarana sian sude halak Israel. Diboan ibana ma i mangalului si Daud dohot akka tentarana tu dolok batu inganan ni akka hambing tombak.
3 Dung i, sahat ma si Saul di akka kandang* ni biru-biru na di topi dalan. Adong do disi sada gua. Masuk ma ibana tusi lao buang air.* Hape di tikki i, hundul do si Daud dohot akka tentarana dao di bagasan ni gua i.+
4 Didok tentarana ma tu si Daud, “Ida ma! Nungnga dipasahat Jahowa be musum tu tanganmu.+ Diloas Ibana do ho mangulahon manang aha pe na denggan di roham tu musumi.” Dung i, sipsip ma diseat si Daud ujung ni rompi ni si Saul na ganjang i.
5 Alai dukkon i, gabe dang tenang be roha* ni si Daud+ ala diseat ibana rompi ni si Saul na ganjang i.
6 Didok si Daud ma tu tentarana i, “Dang boi ulahonokku songon i tu tuanku, ai halak na pinillit ni Jahowa do ibana. Dang lomo roha ni Jahowa molo hubahen na jahat tu halak na pinillit ni Jahowa.”+
7 Songon i ma didok si Daud lao mangorai* akka tentarana i. Jala dang diloas si Daud nasida mambahen manang aha tu si Saul. Dung i, kaluar ma si Saul sian gua i manorusson pardalananna.
8 Kaluar ma si Daud sian gua i jala gogo ma dijou ibana si Saul. Ninna ma, “Ale tuanku! Rajanami!”+ Tikki diida si Saul tu pudi, marsomba ma si Daud tu si Saul, pola sahat bohina tu tano.
9 Didok si Daud ma tu si Saul, “Boasa porsea ho tuan tu halak na mandok lao bahenokku na jahat tu ho?+
10 Sadari on, nungnga diida ho songon dia Jahowa pasahatton ho tu tanganku di bagasan ni gua i. Tikki adong halak na mandok asa hupamate ho,+ asi do rohakku tu ho jala hudok do tu ibana, ‘Dang bahenokku na jahat tu tuanku. Ai halak na pinillit ni Jahowa do ibana.’+
11 Ale amang, ida ma! Nungnga huseat ujung ni rompimi, jala hutiop do i nuaeng. Tikki huseat ujung ni rompimi, boi do pamateonku ho alai dang huulahon i. Saonari, nungnga takkas diboto ho, dang marsakkap au mambahen na jahat tu ho manang lao mangalo ho, jala dang mardosa au tu ho.+ Hape sai naeng dipamate ho do au.+
12 Jahowa ma na gabe hakim di tonga-tongatta+ jala Jahowa ma na mambalos sude pambahenanmu tu au.+ Alai anggo au, dang bahenokku na jahat tu ho.+
13 Songon hata ni uppama najolo na mandok, ‘Sian halak na jahat do ro ulaon na jahat.’ Alai anggo au, dang bahenokku na jahat tu ho.
14 Ise ma haroa au? Boasa pola luluan ni raja ni Israel i au? Doshon biang na mate do au. Doshon hutu do au.+
15 Jahowa ma na gabe hakim di tonga-tongatta. Paresoonna do parsoalakku jala marpihak do Ibana tu au.+ Ibana ma na gabe hakim di au jala paluaonna do au sian tangan ni tuan.”
16 Dung sae didok si Daud songon i, didok si Saul ma, “Soaram do i Daud, anakku?”+ Dung i, gogo ma tangis si Saul.
17 Didok si Saul ma tu si Daud, “Ho do na sittong, au do na sala. Dibahen ho do na denggan tu au, hape hubalos do i dohot na jahat.+
18 Sadari on, nungnga dipatudu ho na burju do ho tu au. Ai dang dipamate ho au nang pe nungnga dipasahat Jahowa au tu tanganmu.+
19 Dang adong halak na paluahon musuna naung tartakkup molo so jolo dihahua. Sai dilehon Jahowa ma na denggan tu ho,+ ai nungnga dibahen ho na denggan tu au sadari on.
20 Saonari takkas ma huboto, na lao gabe raja do ho+ jala martahan do harajaon ni Israel di tanganmu.
21 Alai marsumpa ma ho di jolo ni Jahowa,+ na so pamateonmu akka pinopparhu jala unang ma sesa goarhu sian keluarga ni bapakku.”+
22 Dung marsumpa si Daud, mulak ma si Saul tu jabuna.+ Alai lao ma si Daud dohot akka tentarana tu inganan partabunian.+
Surat na di toru
^ Kandang na dibahen sian batu.
^ As. “manutup patna”.
^ Manang “gabe mallobok ma taroktok”.
^ Manang boi do “mangabbati”.
