1 Kronika 13:1-14
13 Makkatai ma si Daud tu pamimpin ni na sasaribu, pamimpin ni na sasaratus, dohot tu sude pamimpin.+
2 Dung i didok si Daud ma tu sude halak Israel na marpungu i, “Molo denggan do di rohamuna jala lomo roha ni Jahowa Debatanta, tasuru ma halak manjuppangi haha anggitta di sude huta ni halak Israel. Jala tasuru ma nasida manjuppangi akka malim dohot halak Lepi na tinggal di akka kota+ na adong inganan parmahananna. Dung i tasuru ma nasida ro asa marpungu hita dison.
3 Jala taboan ma muse tuson poti parpadanan+ ni Debatanta i.” Saleleng mamaretta si Saul, dang diurus nasida poti i.+
4 Las ma roha ni sude halak na marpungu i mambege i, ai denggan do i di roha ni nasida.
5 Alani i, dipapungu si Daud ma sude halak Israel mulai sian sunge* na di Mesir sahat tu Lebo-hamat.*+ Ai naeng boanon ni nasida do poti parpadanan ni Debata na sittong i sian Kiriat-jearim.+
6 Lao ma si Daud dohot sude halak Israel tu Baalah,+ tu Kiriat-jearim, huta ni halak Juda. Diboan nasida ma sian i poti parpadanan ni Debata na sittong na martahta di ginjang* ni akka kerubim.*+ Di jolo ni poti parpadanan i do akka halak manjou goar ni Jahowa.
7 Dibuat nasida ma poti parpadanan ni Debata na sittong i sian jabu ni si Abinadab. Alai dipamasuk nasida ma poti i tu gerobak na baru,+ na ditarik ni lombu. Dung i mardalan ma si Uzza dohot si Ahio mangiring-iring gerobak i.+
8 Dung i marpesta ma si Daud dohot sude halak Israel di jolo ni Debata na sittong. Marende ma nasida jala dipakke nasida do harpa, alat musik na martali, rebana,*+ simbal,*+ dohot tarompet.+
9 Alai tikki sahat nasida di inganan pardegean Kidon, naeng madabu ma poti parpadanan i dibahen akka lombu i. Gabe ditiop si Uzza ma poti i.
10 Muruk situtu ma Jahowa tu si Uzza, jala dipamate ma ibana. Ai ditiop ibana do poti i,+ gabe mate ma ibana disi di jolo ni Debata.+
11 Alai jut ma roha ni* si Daud ala muruk situtu Jahowa tu si Uzza. Gabe digoari ma inganan i Peres-uzza* sahat tu sadari on.
12 Laos di ari i gabe mabiar ma si Daud tu Debata na sittong. Didok ibana ma, “Boha nama bahenokku mamboan poti parpadanan ni Debata na sittong tu kotaku?”+
13 Gabe dang diboan si Daud be poti parpadanan i tu Kota ni si Daud. Alai dibahen ibana ma i di jabu ni si Obed-edom halak Gat i.
14 Saleleng tolu bulan ma poti parpadanan ni Debata na sittong i di jabu ni si Obed-edom. Sai dipasu-pasu Jahowa do keluarga ni si Obed-edom dohot sude na di jabuna.+
Surat na di toru
^ Manang “mulai sian Sihor”.
^ Manang “dalan lao tu Hamat”.
^ Manang boi do “di holang-kolang”.
^ Alat musik na sian logam jala bulat.
^ Manang “Alai muruk ma”.
^ Lapatanna, “Tarrimas tu si Uzza”.
